އާބަން ޑިވޮލޮޕްމަންޓް ބިލު ފާސްކޮށްފި
"އާބަން ޑިވެލޮޕްމަންޓް ބިލް" ރައްޔިތުންގެ މަޖިލީހުން މިއަދު ފާސްކޮށްފި އެވެ.
ރާއްޖޭގެ އެކި ސަރަހައްދުތަކުގައި އާބަން ސެންޓަރުތައް ތަރައްގީ ކުރުމުގެ އުސޫލު ބަޔާންކޮށްފައިވާ އެ ބިލު ސަރުކާރުގެ ފަރާތުން ހުށަހެޅުއްވީ ވިލިނގިލީ ދާއިރާގެ ޕީއެންސީ މެމްބަރު އާޒިމް އަބްދުލް އަޒީޒް އެވެ.
އެ ބިލު ފާސްކޮށްފައިވަނީ 70 މެންބަރުންގެ ވޯޓާއެކު އެވެ. އެ ބިލާ ދެކޮޅަށް 11 މެންބަރަކު ވޯޓު ދެއްވި އެވެ.
އެ ބިލަކީ، އާބަން ސަރަހައްދުތައް ކަނޑައެޅުމާއި އެފަދަ ސަރަހައްދު ތަރައްގީކުރުމާގުޅޭ ކަންކަން ހަރުދަނާކޮށް ގާނޫނީ އޮނިގަނޑެއްގެ ދަށުން ހިންގުމަށް އެކުލަވާލެވުނު ބިލެކެވެ. އެ ބިލުގައި އާބަން ސެންޓަރުތައް ތަރައްގީކޮށް ހިންގުމުގެ އަސާސީ މިންގަނޑުތަކާއި އާބަން ސަރަހައްދުތަކުގައި ހިންގާ ތަރައްގީގެ މަޝްރޫއުތައް މޮނިޓާކޮށް ފިޔަވަޅުއެޅުމާބެހޭ އުސޫލުތައް ބަޔާން ކޮށްފައިވެ އެވެ.
އެ ބިލާ ގުޅިގެން ކައުންސިލް މިނިސްޓްރީ އާއި ސިޔާސީ ޕާޓީތަކުން ކަންބޮޑުވުން ފާޅުކުރި އެވެ. އެ ބިލުގައި ހިމަނާފައިވާ ބައެއް މާއްދާތަކުން ރަށު ކައުންސިލުތަކާ އަދި އަތޮޅު ކައުންސިލުތަކުގެ ބާރުތައް ހަނިވާ ކަމަށެވެ.
އެ ބިލުގައިވާ މާއްދާތަކުގެ ތެރެއިން ކަންބޮޑުވުން އުފެދިފައިވަނީ އެ ބިލުގެ 10 ވަނަ މާއްދާއާ މެދު އެވެ. އެ މާއްދާގައި ބަޔާން ކޮށްފައިވަނީ:
- އާބަން ސަރަހައްދަކީ ލޯކަލް ކައުންސިލެއްގެ އިހްތިސާސްގައި އޮތް ސަރަހައްދަކަށް ވިޔަސް، އެ ސަރަހައްދެއް ޕްލޭން ކުރުމާއި ތަރައްގީ ކުރުމުގެ މަސައްކަތް ކުރާނީ އާބަން އޮތޯރިޓީން.
- އާބަން ސަރަހައްދުތަކުގައި ދޭންޖެހޭ ރަށްވެހިކަމުގެ ހިދުމަތްތައް ދިނުމާއި މުނިސިޕަލް ހިދުމަތްތައް ދިނުމުގެ ބާރު އޮންނާނީ ކައުންސިލްތަކަށް.
- އާބަން ސަރަހައްދު ޕްލޭންކޮށް ތަރައްގީ ކުރުމަށް ކުރަންޖެހޭ ކަންކަން ވިލަރެސްކޮށް، މަސައްކަތް ކުރާނީ ކައުންސިލާއި އޮތޯރިޓީއާ ދެމެދު ލިޔުމަކުން ވެވޭ އެއްބަސްވުމެއްގެ ދަށުން
- ތަރައްގީގެ މަޝްރޫއުތައް ނިމުމާ އެކު އޮތޯރިޓީ އަށް ދީފައިވާ އިހްތިސާސް ނިމުމަކަށް އަންނާނެ.
ބިލާ ގުޅިގެން މަޝްވަރާ ކުރުމަށް މިދިޔަ އޮގަސްޓް މަހު ގައުމީ ތަރައްގީއާ ތަރިކައިގެ ކޮމިޓީއަށް ހާޒިރުވެ ލޯކަލް ގަވަމެންޓް މިނިސްޓްރީގެ ސްޓޭޓް މިނިސްޓަރު މުހައްމަދު ހާޝިމް ވިދާޅުވީ، އެ މިނިސްްޓްރީއަކީ ކައުންސިލުތަކާ ގާތްކޮށް މަސައްކަތް ކުރަން ޖެހޭ މިނިސްޓްރީއަކަށްވާއިރު ބިލާ ގުޅޭގޮތުން ކަންބޮޑުވުންތައް ހުރި ކަމަށެވެ.
ހާޝިމް ވިދާޅުވީ، ބިލުގެ މަސައްކަތް ކޮށްފައިވަނީ އެ މިނިސްޓްރީއާ މަޝްވަރާ ކުރުމެއް ނެތި ކަމަށާއި، އެ ބިލުގައި ލާމަރުކަޒީ ގާނޫނާއި ތައާރަޒުވާ ގިނަ ކަންތައްތަކެއް ކުރި ކަމަށެވެ.
