ކޮވިޑް19: ބޭންކު ކާޑުތައް ޑިސްއިންފެކްޓު ކުރުން މުހިންމު
ގިނައިން ބޭނުން ކުރާ ބޭންކު ކާޑުތައް ޑިސްއިންފެކްޓު ނުކުރާނަމަ ކާޑުގައި ސަލްމޮނެއްލާ އާއި އީ ކޮލީ ފަދަ ޖަރާސީމު އަށަގަތުމުގެ ފުރުސަތު ބޮޑުކަމަށް ދިރާސާއަކުން ދައްކައިފިއެވެ.
ބޭންކު ކާޑުތަކުގައި މި ޖަރާސީމްތައް ހަރުލަނީ ކާާރޑު މެޝިންގެ ޒަރީއާއިންނެވެ.
ހެމްޕްސްޓީޑް އެސްތެޓިކްސް ކްލިނިކް ގެ މެޑިކަލް ޑިރެކްޓަރ ޑރ. ޗައިކް އިމާކީ ބުނުއްވި ގޮތުގައި މި ފަދަ ކާޑުތަކުގައި ކޮވިޑް19 ވައިރަސް ހަރުލުމުގެ ފުރުސަތު ކުޑަކަމަށާއި ނަމަވެސް އެއީ ވެދާނެ ކަމެއް ކަމަށެވެ. އަދި އެންމެ ރައްކާތެރި ގޮތަކީ ކާޑުތައް ޑިސްއިންފެކްޓް ކުރުން ކަމުގައިވެސް އޭނާ ފާހަގަކޮށްފައިވެއެވެ.
މީގެ އިތުރުންވެސް އާންމުކޮށް އަތުގައި އަޅައިގެން އުޅޭ ގަޑިއާއި އަނގޮޓި ފަދަ ގަހަނާ ގައިވެސް ޖަރާސީމު އަށަގަތުމުގެ ފުރުސަތު އޮންނަ ކަމަށް އޭނާ ބުނެފައިވެއެވެ.
ކަން މިހެން އޮތްއިރު އެންމެ ރައްކާތެރި ގޮތަކީ ހަފްތާއަކު އެއްފަހަރު މި ތަކެތި ރަނގަޅަށް ޑިސްއިންފެކްޓް ކުރުމެވެ. މާހިރުން ބުނާ ގޮތުގައި ބޭންކު ކާޑުތައް ޑިސްއިންފެކްޓުކުރުމަށް އޭގައި އަލްކޮހޯލް އެކުލެވޭ ވެޓް ޓިޝޫއެއް ނުވަތަ ޑިސްއިންފެކްޓިން ވައިޕްސް ބޭނުންކުރެވިދާނެއެވެ. އަދި ގަހަނާ ޑިސްއިންފެކްޓުކުުރުމަށް އެންމެ ރަނގަޅީ ހޫނު ފެނާއި ސައިބޯންޏެވެ.
ޑަބްލިޔުއެޗްއޯ އިން މީގެ ކުރިން ހާމަކޮށްފައިވާ ގޮތުގައި ރަނގަޅަށް ސައިބޯނި ލައިގެން އަތްދޮންނަނަމަ އާންމުކޮށް ހިފާ ގެންގުޅޭ ތަކެތިން ވައިރަސް އެރުމުގެ ފުރުސަތު ވަރަށް ކުޑަވާނެއެވެ. އޭގެ ތެރޭގައި އާންމުކޮށް ބޭނުންކުރާ ގަހަނާއި ގަޑި ފަދަ ތަކެއްޗާއި ބޭންކު ކާޑުތައް ހިމެނޭކަން ވެސް ފާހަގަ ކުރިއެވެ.
Ads by STO
