ފުލުހުންގެ ބޮލުގައި އަޅުވާފައި ދޫކޮށްލެވޭކަށް ނެތް: ނާޒިމް
މަސްތުވާތަކެތީގެ މައްސަލައަކީ ހައްލުނުވެ އޮތް ބޮޑު މައްސަލައަކަށްވާއިރު، އެކަން ހަމަ އެކަނި ފުލުހުންގެ ބޮލުގައި އަޅުވައިގެން ތިބެވެން ނެތްކަމަށާއި، ޒަމާނާ އެއްގޮތަށް ގާނޫނު ވެސް ބަދަލުވާން ޖެހޭ ކަމަށް ރައްޔިތުންގެ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމް ވިދާޅުވެއްޖެ އެވެ.
ނާޒިމް އެގޮތަށް ވިދާޅުވީ ސަރުކާރުގެ ފަރާތުނ،ް ގަމު ދާއިރާގެ މެންބަރު ޔޫސުފް ނަޝީދު ހުށަހަޅުއްވާފައިވާ މަސްތުވާތަކެއްޗާ ބެހޭ ގާނޫނަށް އިސްލާހު ގެނައުމުގެ ބިލުގެ ބަހުސްގަ އެވެ.
އެ ބިލުގެ މައިގަނޑު ބޭނުމަކީ، މަސްތުވާތަކެތި ވިޔަފާރިކުރުމާއި، މަސްތުވާތަކެތި ޓްރެފިކްކުރުމުގެ ވިޔަފާރި އިތުރަށް ފުޅާވެ، މަސްތުވާތަކެތި ގެންގުޅޭ އަދި ބޭނުންކުރާ މިންވަރު އިތުރުވެ، މަސްތުވާތަކެއްޗާ ގުޅޭ ކުށްތައް އިތުރުވަމުންދާތީ އެކަންކަން ހުއްޓުވުމަށްޓަކައި ގާނޫނު ތަންފީޒުކުރާ ފަރާތްތަކަށް ލިބިދޭ ބާރުތައް އިތުރުކުރުމެވެ.
މަސްތުވާތަކެތީގެ މައްސަލަތަކުގައި މިހާރު އަމަލުކުރަމުންދާ ގޮތަކީ ގާނޫނުގައި ބަޔާންކޮށްފައިނުވާ މަސްތުވާތަކެތީގެ ބާވަތަކާއެކު ފުލުހުން މީހަކު ހިފަހައްޓައިފިނަމަ، ކޯޓު މަރުހަލާގައި އެމީހަކު މިނިވަންވުންކަން ފާހަގަކުރެއްވި އެވެ. ނާޒިމް ވިދާޅުވީ، އެހެން އެކަން ވެގެންދަނީ ޒަމާނާ އެއްގޮތަށް ގާނޫނު ބަދަލުކުރެވެމުން ނުދާތީ ކަމަށެވެ.
"ގާނޫނުގެ ޖަދުވަލުތަކުގައި ބަޔާންކުރެވިފައިނުވާ މަސްތުވާތަކެތި މިހާރު ގިނައިން ރާއްޖޭގައި ބޭނުން ކުރެވެމުންދަނީ. އެއީ މިހާރު މިޒަމާނުގެ ޕާޓީ ޑްރަގްސްއާ، އެކި ކަހަލަ މަސްނޫއީ އުފެއްދުންތަކުން ތައްޔާރު ކޮށްފައި ހުންނަ ޑްރަގްސް. އެހެންވީމަ ޖަދުވަލުގައި ނެތް ޑްރަގެއް ނަގައިގެން ގެންގޮސްފިއްޔާ ކޯޓުން މި ދޫކޮށްލަނީ،" ނާޒިމް ވިދާޅުވި އެވެ.
ގާނޫނުގައި ބަޔާންކޮށްފައިވާ ނުވާ ބާވަތްތަކުގެ ޑްރަގްތަކާއެކު ހިފަހައްޓާ މީހުން ކޯޓު މަރުހަލާގައި މިނިވަންވަމުންދާތީ، މަސްތުވާތަކެއްޗާ ބެހޭ ގާނޫނަށް ޒަމާނާ ގުޅޭ ގޮތަށް އިސްލާހު ގެނައުމަށް ފުލުހުން އެދޭ ކަމަށް ނާޒިމް ވިދާޅުވި އެވެ.
ނާޒިމް ވިދާޅުވީ، މަސްތުވާތަކެތީގެ މައްސަލަތަކުގައި ހައްޔަރު ކުރެވޭ މީހުން ވަކި ހިސާބަކުން މިނިވަންވުމުން، އެކަމުގެ ތުހުމަތު ފުލުހުންނާއި ފަނޑިޔާރުންގެ ބޮލުގައި އެޅުވެމުންދާ ކަމަށެވެ. ނަމަވެސް، އެކަން އޮތީ އެހެން ނޫންކަން ފާހަގަ ކުރައްވާ މެމްބަރު ވިދާޅުވީ، ފަނޑިޔާރުން އެބޭފުޅުންގެ ޒިންމާ އަދާކުރަމުންދަނީ، އެ ފަރާތްތަކަށް ހުށަހެޅޭ ކަރުދާހާއި، ހެކިތަކަށް ބިނާކޮށް ކަމަށެވެ.
"އެމީހުންގެ ކުރިމައްޗަށް ހުށަހެޅިފައި ހުންނަ ކިތާބީ ހެއްކާއި، ޝަފައީ ހެކީގައި ވަރެއް ނެތް ކަމަށް ވަންޏާ، އެމީހުން ދާނީ ދޫވެގެން. އެހެންވީމަ، އަޅުގަނޑުމެންނަށް ފަނޑިޔާރުންގެ ބޮލުގައި ވެސް މިކަން އެޅުވޭކަށް ނެތް،" ނާޒިމް ވިދާޅުވި އެވެ.
ގާނޫނަށް ހުށަހެޅުނު އިސްލާހުގެ ތެރެއިން، މަސްތުވާތަކެއްޗާ ގުޅޭ ކުށްތައް ހުއްޓުވުމަށްޓަކައި ގާނޫނު ތަންފީޒުކުރާ އިދާރާތަކަށް އިތުރު ބާރުތައް ވެސް ލިބިގެންދެ އެވެ.
