ސަރުކާރުދެކެ އައި ރުޅިން ތިންޓަނު ޓޮމާޓޯ ކޯރަކަށް އުކާލައިފި
ކޮވިޑް19 ބަލިމަޑުކަމާއެކު އިންޑިއާ ފުރަބަންދު ކުރުމުން އޭގެ ނޭދެވޭ އަސަރު އެންމެ ބޮޑަށް ކުރި ބަޔަކީ މެދު ފަންތީގެ ވިޔަފާރިވެރިންނެވެ. އޭގެ ތެރެއިން ވެސް އާންމުކޮށް މަގުމަތީގައި އެއްޗެހި ވިއްކަން އުޅުނު މީހުންނާއި ދަނޑުވެރިން ހިމެނެއެވެ. ބުރަ މަސައްކަތުން ހައްދާ ތަރުކާރީ ކޮޅު ނުވިކި އެ ހަލާކުވެގެންދާތަން ބަލަން ޖެހިފައި ތިބި ކިތަންމެ ދަނޑުވެރިންނެއް އެބަ ތިއްބެވެ.
މިއީ ވެސް އެފަދަ ދަނޑުވެރިއެއްގެ ވާހަކައެވެ. ސަރުކާރުން އަޅާފައިހުރި ފިޔަވަޅުތަކާއެކު ބުރަ މަސައްކަތުން ހެއްދި ޓޮމާޓޯ ކޮޅު އުކާލަންޖެހުނީއެެވެ. ރިޕޯޓުތައް ބުނާ ގޮތުގައި މި ދަނޑުވެރިޔާ ވަނީ ކުޑަ ވޭން އެއްގައި ޓޮމާޓޯ ވިއްކުމަށް މަސައްކަތް ކޮށްފައެވެ. ނަމަވެސް ފުލުހުން އެކަމަށް ހުރަސް އަޅައި އޭނާ އާއި މެދު ކަންތައް ބެހެއްޓި ގޮތުން ހިތްހަމަ ނުޖެހި ތިން ޓަނުގެ ޓޮމާޓޯ އަޅާލަން ޖެހުނީ ކޯރަކަށެވެ.
އެ ދަނޑުވެރިޔާ ވަނީ ޓޮމާޓޯތައް އަޅާލާ މަންޒަރު ވީޑިއޯކޮށް އާންމުކޮށްފައެވެ. މިވީޑިއޯގައި އޭނާ ވަނީ ސަރުކާރުން އަޅާފައި ހުރި ފިޔަވަޅުތަކަށް ވަރަށް ބޮޑަށް ފާޑުކިޔައި ހިތްހަމަ ނުޖެހުން ފާޅުކޮށްފައެވެ.
އޭނާ އިތުރަށް ބުނި ގޮތުގައި ދެ ދުވަހަށް ވުރެ ގިނަ ދުވަހު ނުވިކި ހުންނަނަމަ ޓޮމާޓޯތައް ހަލާކުވާ ކަމަށާއި ކުރެވޭނެ އެެއްވެސް ކަމެއްނެތި ޖެހެނީ އުކާލާށެވެ. އަދި އޭނާ އެ ވީޑިއޯ ރެކޯޑުކޮށްފައިވަނީ އެ ސްޓޭޓު ގެ އެމްޕީ އަށް އެ ފެންނާނެ ކަމުގެ އުންމީދުގައި ކަމަށް ވެސް ބުނެފައިވެއެވެ.
ދަނޑުވެރިންގެ އިތުރުން ގިނަ ކިރު ވިއްކާ މީހުން ވެސް އަންނަނީ ކިރު ނުވިއްކި އެ އުކާލަން ޖެހެމުންނެވެ.
ނުރައްކާތެރި ކޮރޯނާ ވައިރަކަށް އިންޑިއާއިން މިހާތަނަށް 1,251 މީހުން ޕޮސިޓިވް ވެފައިވާއިރު 32 މީހަކު ވަނީ މިބަލީގައި މަރުވެފައެވެ.
