ރާއްޖެއިން ޝްރީލަންކާއަށް ދާ ފްލައިޓުތައް ރަތުމަލާނަ އެއާޕޯޓަށް ބަދަލުކުރަނީ
އަވަށްޓެރި ޝްރީލަންކާ އަށް ރާއްޖެއިންދާ ފްލައިޓުތައް އާއްމުކޮށް ޖައްސާ ބަންޑާރަނައިކެ އިންޓަނޭޝަނަލް އެއާޕޯޓުގެ ބަދަލުގައި މީގެ ފަހުން ރަތުމަލާނަ އެއާޕޯޓަށް ބަދަލު ކުރަން އެ ގައުމުގެ ސަރުކާރުން ނިންމައިފި އެވެ.
މިކަން ހާމަކުރައްވަމުން ޝްރީލަންކާގެ ޓޫރިޒަމް މިނިސްޓަރ ޕްރަސަންނަ ރަނަތުންގަ ވިދާޅުވެފައިވަނީ، ރާއްޖޭގެ އިތުރުން އިންޑިއާ ދެކުނުގެ ބައެއް ސަރަހައްދުތަކުންދާ ފްލައިޓުތަކަށް ވެސް، ރަތުމަލާނަ އެއާޕޯޓު ބޭނުންކުރަން ނިންމާފައިވާ ކަމަށެވެ.
ރަތުމަލާނަ އެއާޕޯޓަކީ ޝްރީލަންކާ ގައި އެންމެ ފުރަތަމަ ގާއިމް ކުރި ބައިނަލްއަގުވާމީ އެއާޕޯޓެވެ. 1935 ވަނަ އަހަރު ހުޅުވި އެ އެއާޕޯޓު މިހާރު ބޭނުންކުރަމުން ދަނީ، ޑޮމެސްޓިކް އޮޕަރޭޝަންތަކުގެ އިތުރުން ބައެއް ޕްރައިވެޓް ޖެޓުތަކަށެވެ. އަދި އެ އެއާޕޯޓުގައި ފްލައިޓު ސުކޫލު ވެސް ހިންގައެވެ
ލަންކާގެ ޓޫރިޒަމް މިނިސްޓަރ ވިދާޅުވި ގޮތުގައި ރަތުމަލާނަ އެއާޕޯޓަށް އޮޕަރޭޝަންސް ބަދަލު ކުރުމާ ގުޅޭގޮތުން، ރާއްޖޭގެ ގައުމީ އެއާލައިން މޯލްޑިވިއަންގެ އިތުރުން ދާދިފަހުން ލަންކާއަށް ދަތުރުތައް ފެށި ފްލައިމީ އާވެސް މަޝްވަރާކޮށްފައިވާ ކަމަށެވެ.
ރަތުމަލާނަ އެއާޕޯޓަށް ބައިނަލްއަގުވާމީ ފްލައިޓުތައް އޮޕަރޭޓު ކުރުމުގެ ހުއްދ ކެބިނެޓުން ވަނީ ދީފައެވެ. އަދި މިހާރުވެސް އެއާޕޯޓުގައި 75 ފްލައިޓު އޮޕަރޭޓު ކުރެއެވެ.
"ގާތްގަނޑަކަށް 9،000 އެއްހާ ދިވެހިން ތައުލީމު ހާސިކުރުމަށާއި އެހެނިހެން ކަންކަމުގައި ރަތުމަލާނަ ސަރަހައްދުގައި ދިރިއުޅޭ. އަދި އިންޑިއާގެ ދެކުނުން އަންނަ ގިނަ މީހުނަކީ ވެސް ރަތުމަލާނަ ކައިރީގައި އޮންނަ ބަމްބަލަޕިޓިޔާ އާއި ކޮލްޕިޓީގައި ތިބޭ މީހުން. އެއާޕޯޓު ޓާގެޓް ކުރާނީ މިފަދަ ދަތުރުވެރިންނަށް،" ޓޫރިޒަމް މިނިސްޓަރު ރަނަތުންގަ ވިދާޅުވެފައިވެއެވެ.
