ވެމްކޯ ޑީއެމްޑީ ޝަހީދު މަގާމުން ވަކިކޮށްފި
ވޭސްޓް މެނޭޖުމެންޓް ކޯޕަރޭޝަން (ވެމްކޯ) ގެ ޑެޕިއުޓީ މެނޭޖިން ޑިރެކްޓަރުގެ މަގާމުން ޝަހީދު އިބްރާހީމް ވަކިކޮށްފި އެވެ.
ޝަހީދު، މަގާމުން ވަކިކުރިކަން ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން އަދި މިހާތަނަށް ހާމަކޮށްފައެއް ނުވެ އެވެ. އެކަމަކު ވެމްކޯގެ އޮފިޝަލަކު ވަނީ ޝަހީދު ވަކިކުރިކަން "ދެން" އަށް ޔަގީންކޮށްދީފަ އެވެ. ވަކިކުރި ސަބަބެއް ނުބުނެ އެވެ.
ޝަހީދު ފޯނަށް ޖަވާބު ނުދެތީ އޭނާގެ ކޮމެންޓެއް ލިބޭގޮތް ވަނީ ނުވެފަ އެވެ. ވެމްކޯގެ ޑީއެމްޑީއަކަށް ޝަހީދު އައްޔަންކުރީ އޭޕްރީލް މަހުގެ 23 ވަނަ ދުވަހު އެވެ.
ސިފައިންގޭގައި ވެސް ގިނަ ދުވަސްތަކެއް ހޭދަކުރި ޝަހީދު ވަނީ ޕީއެެންސީގެ ސެނެޓުގެ ކައުންސިލު މެންބަރުގެ މަގާމުވެސް އަދާކޮށްފަ އެވެ.
ޝަހީދު ޑީއެމްޑީގެ މަގާމުން ވަކިކޮށްފައިވާއިރު އިރު، ފެނަކައިގެ ކުރީގެ ޑީއެމްޑީ އިބްރާހިމް ނާއިފް އަކީވެސް ވެމްކޯގެ ޑީއެމްޑީއެކެވެ. ވެމްކޯގެ ކުރީގެ ޑީއެމްޑީ އަށް ހުންނެވި ރައްޔިތުންގެ މަޖިލީހުގެ ކުރީގެ މެންބަރު މުހައްމަދު އަބްދުލް ކަރީމް (ރުކުމާ) ވަނީ ފެނަކައިގެ ޑީއެމްޑީގެ މަގާމަށް ބަދަލުކޮށްފައެވެ.
ވެމްކޯގެ މެނޭޖިން ޑިރެކްޓަރަކީ މާލޭ ސިޓީ ކައުންސިލްގެ ކުރީގެ ސެކްރެޓަރީ ޖެނެރަލް މުޖުތަބާ ޖަލީލެވެ.
