ޕީޖީ ކަމުން ވަކިވުމަށްފަހު އެއްއަހަރު ވަންދެން ވަކީލުކަން ނުކުރެވޭ ގޮތް ހަދައިފި
ޕްރޮސެކިއުޓާ ޖެނެރަލް (ޕީޖީ)ގެ މަގާމުން ވަކިވުމަށްފަހު، އެއް އަހަރު ވަންދެން ވަކީލުކަން ނުކުރެވޭ އިސްލާހު ރައީސް އިބްރާހިމް މުހައްމަދު ޞާލިޙު މިއަދު ތަސްދީގު ކުރައްވައިފިއެވެ.
ޕްރޮސެކިއުޓާ ޖެނެރަލް ގެ ޤާނޫނަަށް ތިންވަނަ އިސްލާހު ގެނައުމުގެ މިބިލަކީ މިދިޔަ އޮގަސްޓު މަހުގެ 31 ގައި ރައްޔިތުންގެ މަޖިލީހުން ފާސްކުރި ބިލެކެވެ.
ރައީސް ތަސްދީގު ކުރެއްވި މިބިލުގައި ބުނެފައިވާ ގޮތުގައި ޕީޖީ ކަމުން ވަކިވުމަށްފަހު ފުރަތަމަ އެއް އަހަރުގެ މުއްދަތުގައި ޕީޖީގެ ހައިސިއްޔަތުން އެ މީހަކު އަދާކުރި މަސްލަހަތާ ފުށުއަރާ ވަޒީފާއެއް ނުވަތަ މަސައްކަތެއް، އެ މަގާމުން ވަކިވާ މީހަކު ކޮށްގެން ނުވާނެ އެވެ.
މީގެ ކުރިން ޕީޖީކަމުން ވަކިވުމާއެކު މައްސަލަތަކުގައި ދައުލަތާ ދެކޮޅަށް ވަކާލާތު ކުރުމަށް ހުރަހެއް ނެތް ނަމަވެސް، މިއަދު ތަސްދީގު ކުރެއްވި އިސްލާޙާއެކު ދެން އެފުރުސަތެއް ނޯންނާނެއެވެ.
މީގެއިތުރުން މިބިލުގައިވާ ގޮތުންނަމަ ޕީޖީގެ ޒިންމާ އަދާކުރުމުގައި ހިފަހައްޓަން ޖެހޭ ހަމަތަކާއި، އިތުރު ވަޒީފާއެއް އަދި މަގާމެއް ފުރުއްވައިގެން ނުވާނެ ކަމަށް ވެސް ހިމަނާފައި ވެއެވެ. އަދި ޕީޖީއަށް އެއްވެސް ބާވަތެއްގެ ވިޔަފާރިއެއް ވެސް ނުހިނގޭނެ ކަމަށް މިބިލުގައިވެއެވެ.
