Tuesday, 17 November 2026
Advertisement
HDC — Share-Below (leaderboard)
ސަރުކާރު

މާލީ ގޮތުން ބާރުވެރިކުރަން ތިން ކައުންސިލަކަށް ހަތަރު ފަޅު ރަށެއް ހަވާލުކޮށްފި

މާލީ ގޮތުން ބާރުވެރިކުރަން ތިން ކައުންސިލަކަށް ހަތަރު ފަޅު ރަށެއް ހަވާލުކޮށްފި
ލޯކަލް ކައުންސިލުތައް މާލީ ގޮތުން ބާރުވެރިކުރުމަށް ފަޅު ރަށް ލިބޭ ގޮތަށް ރައީސް ޑރ. މުހައްމަދު މުއިއްޒު އިއުލާނު ކުރައްވާފައިވާ ސިޔާސަތުގެ ދަށުން، އެކަމަށް އެދި ޕްރޮޕޯސަލް ހުށަހެޅި ތިން ކައުންސިލަކަށް ހަތަރު ފަޅު ރަށެއް ހަވާލުކުރުމުގެ އެއްބަސްވުމުގައި ސޮއިކޮށްފި އެވެ. ރަށު ފެންވަރުގައި ރައްޔިތުން ކުރާ މަސައްކަތްތަކާއި ރައްޔިތުންގެ މަންފާއަށް ބޭނުން ކުރެވޭ ގޮތަށް ކައުންސިލުތަކަށް ފަޅު ރަށްތައް ދޫކުރަން ސަރުކާރުން ނިންމާފައި ވަނީ ނިމިދިޔަ އަހަރުގެ ޖެނުއަރީ މަހުގެ 18 ވަނަ ދުވަހު އެވެ. އެގޮތަށް ނިންމާފައި ވަނީ މަސްވެރިކަމާއި ދަނޑުވެރިކަމާ އަދި އިގުތިސޯދީ ބޭނުންތައް ފިޔަވައި އެ ނޫން ބޭނުންތަކަށް ފަޅު ރަށްތައް ދޫކުރުމާ ބެހޭ ގަވާއިދަށް، އޭރުގެ ހައުސިން، ލޭންޑް އެންޑް އާބަން ޑިވެލޮޕްމަންޓް މިނިސްޓްރީން ގެނައި އިސްލާހެއްގަ އެވެ. ގަވާއިދުގެ ދަށުން ކައުންސިލުތަކުގެ އިހުތިސޯސްގައި ނުހިމެނޭ ފަޅު ރަށްތަކަށް ވެސް އެދެވެ އެވެ. ސަރުކާރުން ދަނީ ލާމަރުކަޒީ ނިޒާމު ހަރުދަނާ ކުރުމަށް، ޕްލޭނަކާ އެކު ވަކި ވިސްނުމެއްގެ ތެރެއިން މަސައްކަތް ކުރަމުންނެވެ. ރައީސްގެ 100 ދުވަހުގެ ވައުދުތަކުގެ ތެރޭގައި ހިމެނިގެން ގަވާއިދަށް އިސްލާހު ގެނެސް ކައުންސިލުތައް ބާރުވެރިކުރަން ފެށި މަސައްކަތްތަކުގެ ތެރެއިން ހުޅުވާލި ފުރުސަތުގައި ޕްރޮޕޯސަލް ހުށަހެޅި ކައުންސިލުތަކަށް ފަޅު ރަށްތައް ހަވާލުކުރުމަށް ނިންމައި، 3 ކައުންސިލަކަށް 4 ރަށެއް މިއަދު ވަނީ ހަވާލުކޮށްފަ އެވެ.

ފަޅު ރަށްތައް ހަވާލުކުރެވުނު ކައުންސިލުތަކަކީ:

  • ރ. އިނގުރައިދޫ ކައުންސިލަށް އެ އަތޮޅު ނެޔޮ
  • ދ. އަތޮޅު ކައުންސިލަށް އެ އަތޮޅު މިނިމަސްގަލި އަދި ފެންފުށި
  • ލ. މާވަށް ކައުންސިލަށް އެ އަތޮޅު ބޮޑުމާބުޅައި
މާލީ ގޮތުން ކައުންސިލުތައް ބާރުވެރިކުރުމަށް ފަޅު ރަށްތައް ހަވާލުކުރުމުގެ އެއްބަސްވުމުގައި ފިނޭންސް އެންޑް ޕްލޭނިން މިނިސްޓްރީގެ ފަރާތުން ސޮއިކުރެއްވީ ސްޓޭޓް މިނިސްޓަރު އަހްމަދު މާޒިން އެވެ. ދ. އަތޮޅު ކައުންސިލުގެ ފަރާތުން ސޮއިކުރައްވާފައި ވަނީ ކައުންސިލުގެ ރައީސް އަހްމަދު ޝާފިއު އެވެ. އިނގުރައިދޫ ކައުންސިލުގެ ފަރާތުން ރައީސް މުހައްމަދު ޖަލީލު އަދި މާވަށު ކައުންސިލުގެ ފަރާތުން ސޮއިކުރެއްވީ ރައީސް އަހްމަދު މޫސާ އެވެ. އެކަމަށް ހާއްސަކޮށް ބޭއްވި ރަސްމިއްޔާތު ކުރިއަށްދިޔައީ ޕްލޭނިން މިނިސްޓްރީގަ އެވެ. ރަސްމިއްޔާތުގައި ސިޓީސް، ލޯކަލް ގަވަމެންޓް އެންޑް ޕަބްލިކް ވޯކްސް މިނިސްޓަރު އާދަމް ޝަރީފް އުމަރުގެ އިތުރުން އެ މިނިސްޓްރީގެ ވެރިންނާއި ޕްލޭނިން މިނިސްޓްރީގެ ވެރިން ބައިވެރިވެވަޑައިގެންނެވި އެވެ. މިއީ ރާއްޖޭގެ އެންމެ އަގު ބޮޑު އެސެޓްތައް ލާމަރުކަޒުކުރެވި، ރައްޔިތުންގެ އަތްމައްޗަށް ދޫކޮށްލެވޭ ފުރަތަމަ ފަހަރެވެ. އެގޮތުން 28 ރަށެއް ދޫކުރުމަށް ހަމަޖައްސާފައިވާއިރު، އެ ރަށްތަކާ މެދު އަމަލުކުރާނެ ގޮތް ކަނޑައަޅައި، ރައްޔިތުންގެ ބައިވެރިވުމާ އެކު ރައްޔިތުންގެ ސީދާ މަންފާއަށް ވަނީ ހާއްސަކޮށްފަ އެވެ. ކައުންސިލުގެ އިހުތިސޯސުން ބޭރުން، ފަޅު ރަށްރަށް ކައުންސިލުތަކަށް ދޫކުރެވޭ ފުރަތަމަ ފަހަރަކީ މި އެވެ. އަދި މިއީ ލާމަރުކަޒީ ނިޒާމުގެ ތާރީހުގައި ދައުލަތުގެ ވަސީލަތްތައް ލާމަރުކަޒުކުރެވި، ކައުންސިލުތައް ބާރުވެރިކުރެވޭ ފުރަތަމަ ފަހަރެވެ. އާމްދަނީ ހޯދަން ރަށްތަކުގައި ކުރަމުން އަންނަ ބައެއް މަސައްކަތްތަކަށް ފަޅު ރަށްތައް ހޯދުމަށް އެދުމުގެ ފުރުސަތު މިހާރު ވެސް އޮތީ ހުޅުވިފަ އެވެ.

ރިއެކްޝަން

Advertisement
HDC — Sidebar (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.