ކޮވިޑް-19: ހޯޑެއްދޫއިން ފަސޭހަވީ މީހުންގެ އަދަދު މިހާރު 23 އަށް
ގދ. ހޯޑެއްދޫއިން ކޮވިޑް-19 އަށް ފައްސިވީ މީހުންގެ ތެރެއިން މިހާރު 23 މީހަކު ބަލިން ފަސޭހަ ވެއްޖެކަމަށް އެރަށު ސިއްޙީ މަރުކަޒުން މައުލޫމާތު ދީފިއެވެ.
އެންމެ ފަހުން އެރަށުން ނެގި ސާމްޕަލެއް ކޮވިޑަށް ފައްސިވީ މިމަހުގެ 17 ވަނަ ދުވަހުގައެވެ. އެދުވަހު ދެމީހަކު ފައްސިވިއެވެ.
ހޯޑެއްދޫ ސިއްޙީ މަރުކަޒުން ބުނެފައިވަނީ ފައްސިވީ މީހުންގެ ތެރެއިން ރޭ 10:00 އާއި ހަމައަށް 23 މީހަކު ކޮވިޑުން ފަސޭހަ ވެއްޖެ ކަމަށެވެ.
މާލެ ސަރަޙައްދު ފިޔަވާ ދެން އެންމެ ގިނަ ބަޔަކު ރާއްޖެއިން ކޮވިޑަށް ފައްސިވެފައިވަނީ ހޯޑެއްދޫ އިންނެވެ. އެރަށުން 44 މީހަކު މިބައްޔަށް ފައްސިވީއިރު މިހާރު އެކްޓިވް ކޭސް ގެ ގޮތުގައި ތިބީ 21 ފަރާތެކެވެ. ނަމަވެސް އޭގެތެރެއިން ދެ މީހަކަށް ގއ. ކޮވިޑް ފެސިލިޓީގައި ފަރުވާ ދެމުންދާތީ މިވަގުތު އެރަށުގައި އެކްޓިވް ކޭސްގެ ގޮތުގައި ތިބީ 19 މީހެކެވެ.
ކޮވިޑް19 އާ ގުޅިގެން އެރަށުގެ 15 ގެއެއް ހުރީ މޮނިޓަރިން އަށް ލައިފައެވެ.
އެ ރަށުން މިހާތަނަށް 358 ސާމްޕަލް ނަގާފައިވާ އިރު، ފައްސިވީ 44 ސާމްޕަލް އެކެވެ. އަދި 302 ސާމްޕަލް ނައްސިވެފައިވާ އިރު، 12 ސާމްޕަލްގެ ނަތީޖާ އަދި ނުލިބެ އެވެ.
