ކޮރޯނާ ވައިރަސް ޖެހުނު މީހުންގެ އަދަދު 1 މިލިއަން ހުރަސްކޮށްފި، މަރުވި މީހުންގެ އަދަދު ބައި ލައްކަ އަށް!
ދުނިޔޭގައި ހަލުވިކަމާއެކު ފެތުރެމުންދާ ކޮރޯނާ ވައިރަސް ޖެހުނު މީހުންގެ އަދަދު އެއް މިލިއަނަށް ވުރެ މައްޗަށް އަރައިފިއެވެ. އެންމެ ފަހުގެ ތަފާސް ހިސާބުތަކަށް ބަލާއިރު ފާއިތުވި ސައުވީސް ގަޑިއިރު ތެރޭގައި ބަލި ޖެހުނު މީހުންގެ އަދަދު ވަނީ 1,014,386 އަށް އަރާފައެވެ. އަދި މަރުވި މީހުންގެ އަދަދުވަނީ ފަންސާސް ހާހަށް ވުރެމައްޗަށް އަރާފައެވެ.
ތަފާސް ހިސާބުތަކަށް ބަލާއިރު މިހާތަނަށް ވައިރަހުގެ އެންމެ ގިނަ ކޭސް ރިޕޯޓުކުރެވިފައިވަނީ އެމެރިކާއިންނެވެ. އެމެރިކާއިން ވަނީ މިހާތަނަށް 244,320 މީހުން ވައިރަހަށް ޕޮސިޓިވްވެފައެވެ. މިއަދަދަކީ އެންމެ ފުރަތަމަ ވައިރަސް ފެނުނު ޗައިނާއިން ވައިރަސް ރިޕޯޓުކުރެވުނު އަދަދަށްވުރެ ތިން ގުނަ އިތުރު އަދަދެކެވެ. އެމެރިކާގައި މިހާ ގިނަ ބަޔަކަށް ވައިރަސް ޖެހުމުގެ ފަހަތުގައި އޮތީ އެމެރިކާގެ ސަރުކާރުން ވައިރަހާއި ދެކޮޅަށް އެޅި ދޯދިޔާ ފިޔަވަޅުތައް ކަމުގައި ގިނަ މާހިރުން ގަބޫލުކުރެއެވެ. އެމެރިކާއިން ވަނީ މިހާތަނަށް 6,062 މީހަކު މަރުވެފައެވެ.
ދެވަނައަށް އެންމެ ގިނައިން ވައިރަސް ރިޕޯޓުކުރެވުނު އިޓަލީއަކީ މިހާތަނަށް ވައިރަހުގެ ސަބަބުން އެންމެ ގިނަ މީހުން މަރުވި ގައުމެވެ. އިޓަލީއިން މިހާތަނަށް 115,242 މީހަކަށް ވައިރަސް ޖެހި 13,915 މީހަކުވަނީ މަރުވެފައެވެ. އިޓަލީގެ އިތުރުން ޔޫރަޕުގެ އެހެން ބައެއް ގައުމުތަކުގައި ވެސް ވައިރަސް ހަލުވިކަމާއެކު ފެތުރެމުން އަންނަ އިރު އޭގެ ތެރޭގައި ސްޕޭން، ޖާރމަނީ އަދި ފްރާންސް ހިމެނެއެވެ.
މެދު އިރުމަތީގެ ގައުމުތަކުގެ ތެރެއިން އިރާން އަކީ ވައިރަސް އެންމެ ގަދައަށް ފެތުރުނު ގައުމެވެ. މީގެ އިތުރުންވެސް ޔޫކޭ، ސްޕިޒްލޭންޑް އަދި ތުރުކީވިލާތުގައި ވެސް ވައިރަސް އަންނަނީ ހަލުވިކަމާއެކު ފެތުރެމުންނެވެ.
މިހާތަނަށް މުޅި ދުނިޔެއިން 180 ގައުމަށް ވުރެ ގިނަ ގައުމުން ވައިރަސް ފެނިފައިވާއިރު ވައިރަސް އެންމެ ފުރަތަމަ ފެނުނު ޗައިނާއިން ވަނީ ބަލި މުޅިން ކޮންޓްރޯލް ކުރެވިފައެވެ. ދުނިޔޭގެ އެހެން ހިސާބުތަކުގައި ވައިރަސް ކޮންޓްރޯލް ނުވެ ވައިރަހުގެ ނުރައްކާ ބޮޑުވަމުން އަންނައިރު މި ވައިރަހަކީ ދެވަނަ ބޮޑު ހަނގުރާމައިގެ ފަހުން ދުނިޔެއަށް ކުރިމަތިވި އެންމެ ބޮޑު ކާރިސާގެ ގޮތުގައި އދ. އިން ވަނީ ސިފަކޮށްފައެވެ.
