ކޮވިޑް19: އިންޑިއާ މީހުން އަނެއްކާވެސް ތަފާތު ދައްކައިފި " ގޯ ބެކް، ޗައިނާ ވައިރަސް ގޯ ބެކް"
އިންޑިއާ މީހުނަކީ އަބަދުވެސް ތަފާތު ކަންކަން ކުރުމުގައި ނަން ހިނގާ ބަޔެކެވެ. އަނެއްކާ ވެސް އިންޑިއާ ރައްޔިތުންތަކެއް މިވަނީ ތަފާތުކަމެއް ކޮށް ގިނަ ބައެއްގެ ސަމާލުކަމުގެ އިތުރުން މަލާމާތް ވެސް ހޯދާފައެވެ.
އިންޑިއާގެ ވެރިކަން ކުރާ ބީޖޭޕީ ގެ އެކްޓިވިސްޓުން ތަކެއް ބައިވެރިވެ ދާދި ފަހުންވަނީ ކޮރޯނާ ވައިރަހާއި ދެކޮޅަށް އިންޑިއާގައި މުޒާހަރާ ކޮށްފައެވެ. މި މުޒާހަރާގައި އެމީހުން ވަނީ ޗައިނާ ވައިރަސް އެނބުރި ޗައިނާ އަށް ދިއުމަށް ގޮވާލާފައެވެ. މި މުޒާހަރާގައި ހިނގާލުމެއް ވެސް ބާއްވާފައިވާއިރު މި ހިނގާލުމުގައި 25 އަށް ވުރެ ގިނަ މީހުން ބައިވެރިވެފައިވެއެވެ.
އިޖުތިމާއީ ގައިދުރުކަމެއް ނެތި ކުރިއަށް ގެންދިޔަ މި އެއްވުން ރޭވި ފަރާތްތަކަށް ގިނަ ބަޔަކު އަންނަނީ ފާޑުކިޔަމުންނެވެ.
މި މުޒާހަރާ ކުރިއަށް ގެންގޮސްފައިވަނީ ކޮވިޑް19 އާއި ދެކޮޅަށް ކުރާ ހަނގުރާމައާއި ދެކޮޅަށް އިންޑިއާގެ ރައްޔިތުންގެ އެއްބައިވަންތަކަން ދައްކާލުމަށާއި ސިއްހީ ހިދުމަތްތެރިންގެ އަގު ވަޒަންކުރުމުގެ ގޮތުން އިންޑިއާގެ ބޮޑު ވަޒީރު ނަރެންދުރަ މޯދީ އިސްނަގައިގެންބޭއްވި ކެމްޕެއިނެއްގައެވެ. މި ކެމްޕެއިންގައި ، އޭޕްރިލް 5 ވަނަ ދުވަހުގެ ރޭ 9 ޖަހާއިރު 9 މިނެޓަށް ހުރިހާ ކަރަންޓު ބޮކިތަކެއް ނިއްވައި ތެޔޮ ބައްތި އާއި އުއްބައްތި ދިއްލުމުގެ ހަރަކާތެއް ކުރިއަށް ގެންގޮސްފައި ވެއެވެ.
މޯދީ މިގޮތަށް ލައިޓުތައް ނިވާ ތެޔޮ ބައްތި ރޯކުރުމަށް އެދުމާއެކު މޯދީގެ ނަމުގައި ފޭކު މެސެޖުތަކެއް ވެސް ވަޓްސްއެޕާއި ޓްވިޓާގައި ވަނީ ދައުރުވެފައެވެ. އެގޮތުން ތެޔޮ ބައްތި ދިއްލަނީ ކޮރޯނާ ވައިރަސް މަރަން ކަމަށާއި ހުރިހާ ގެއެއްގައި ތެޔޮ ބައްތި ދިއްލުމުން އޭގެ ހޫނުން ވައިރަސް މަރުވާނެކަމަށް ބުނެ ދޮގު މައުލޫމާތު ފަތުރާފައި ވެއެވެ.
ދުނިޔޭގައި ހަލުވިކަމާއެކު ފެތުރެމުންދާ ކޮރޯނާ ވައިރަހުގެ ޖުމްލަ 3,588 ކޭސް ވަނީ އިންޑިއާއިން ރިޕޯޓުކޮށްފައެވެ. އަދި އިންޑިއާގައި 99 މީހަކު ވަނީ ބަލިޖެހިގެން މަރުވެފައެވެ.
ކޮރޯނާ ވައިރަސް ދުނިޔޭގެ 180 އަށް ވުރެ ގިނަ ގައުމަށް ފެތުރިފައިވާއިރު ބަލި ޖެހުނު މީހުންގެ އަދަދުވަނީ 1,269,299 އަށް އަރާފައެވެ. އަދި ބަލީގައި މަރުވި މީހުންގެ އަދަދުވަނީ 69,346 އަށް އަރާފައެވެ.
Ads by STO
