އެޕަލް އިން އެއް މިލިއަން ފޭސް ޝީލްޑް ދެނީ

ކޮވިޑް19 އާއި ހަނގުރާމަކުރަމުން އަންނަ ސިއްހީ ހިދުމަތްތެރިންނަށްޓަކައި އެއް މިލިއަން ފޭސް ޝީލްޑް ހަދިޔާ ކުރުމަށް އެޕަލް ކުންފުނިން ނިންމައިފިއެވެ.

Ads by WAMCO

އެޕަލް ގެ ސީއީއޯ ޓިމް ކުކް އިއުލާނުކޮށްފައިވާ ގޮތުގައި އައިފޯނު މެނުފެކަޗަރާ އިން ފޭސް ޝީލްޑު ހެދުމުގެ މަސައްކަތް މިހާރު ދަނީ ކުރިއަށް ގެންދަމުންނެވެ.

އެޕަލް ކުންފުނިން މިހާރުވެސް ދަނީ އެކުންފުނީގެ އަމިއްލަ ޑިޒައިނަކަށް ފޭސް ޝިލްޑު ހެދުމުގެ މަސައްކަތްް ކުރިއަށް ގެންދަމުންނެވެ. އެތެރެ ފެންނަ ގޮތަށް ހަދާފައި ހުންނަ މި މާސްކު ޗައިނާ އާއި އެމެރިކާގައި ދަނީ ބޭނުން ކުރެވެމުންނެވެ.

އަލަށް ހަދަން ހަމަޖެހިފައިވާ އެއް މިލިއަން ޝީލްޑު ފޮނުވާނީ ދުނިޔޭގެ އެކި ކަންކޮޅުތަކުން މި ޝީލްޑުތަކުގެ ބޭނުން އެންމެ ބޮޑަށް ޖެހިފައިވާ ގައުމުތަކަށް ކަމުގައި ވެސްް އެޕަލް ކުންފުނިން ހާމަކުރެއެވެ.

އެޕަލް ކުންފުނީގެ ސީއީއޯ ޓްވިޓަރ ގައި ހިއްސާކުރި ވީޑިއޯއެއްގައި އިތުރަށް ބުނެފައިވާ ގޮތުގައި މީގެ އިތުރުން ވެސް 20 މިލިއަން ސާރޖިކަލް މާސްކު ވެސް ދުނިޔޭގެ އެކި ހިސާބުތަކަށް ފޮނުވާނެއެވެ. އަދި މީގެ އެންމެ ފުރަތަމަ ޝިޕްމެންޓް މިހާރު ކެލިފޯނިއާގެ ހޮސްޕިޓަލަކަށް ފޮނުވާފައިވާކަމަށް ވެސް އެ ވިޑިއޯގައި ވަނީ ހާމަކޮށްފައެވެ.

މިހާތަނަށް ގިނަ ޝިޕްމެންޓު ފޮނުވާފައިވަނީ އެމެރިކާގެ ހިސާބުތަކަށް ނަމަވެސް ދުނިޔޭގެ އެހެން ހިސާބުތަކަށް ވެސް ފޮނުވުމަކީ އެ ކުންފުނީގެ އަމާޒެއް ކަމަށް ސީއީއޯ އިތުރަށް ބުނެފައިވެއެވެ.

ކޮރޯނާ ވައިރަހުގެ ބިރު ދުނިޔޭގެ އެކި ހިސާބުތަކުގައި ބޮޑުވެ، ސިއްހީ ރައްކާތެރިކަމަށް ބޭނުންވާ މާސްކާއި ޝީލްޑު ފަދަ ތަކެތީގެ ޑިމާންޑުވަނީ ބޮޑުވެފައެވެ. އަދި ބައެއް ގައުމުތަކުގައި މި ތަކެތި ހުސްވެފައިވާކަން ވެސް ފާހަގަކޮށްލަން ޖެހެއެވެ.