މަރުވާ މީހުން ޕާކްތަކުގައި ވަޅުލަން އެމެރިކާއިން ނިންމައިފި
އެމެރިކާގެ ނިއު ޔޯކް ސިޓީގައި ވައިރަސް ޖެހިގެން މަރުވާ މީހުން ، އާންމުކޮށް މީހުން ބޭނުން ކުރަމުންދާ ޕާކުތަކުގައި ވަޅުލުމަށް އެ ގައުމުގެ ސަރުކާރުން ނިންމައިފިއެވެ. މިހާރު މަރުވަމުންދާ މީހުންގެ ރޭޓަށް ބަދަލަށް ނާންނަނަމަ މި ފިޔަވަޅު ވަގުތީ ގޮތުން ވެސް އެޅިގެންދާނެކަމަށް ސަރުކާރާއި ހަވާލާދީ ރިޕޯޓުތައް ބުނެއެވެ.
މިކަން ހާމަކުރަމުން ނިއުޔޯކް ސިޓީ ކައުންސިލް މެމްބަރެއް ކަމަށްވާ މާކް ލެވިން ބުނިގޮތުގައި މިއީ މިވަގުތަށް އެޅެން އޮތް އެންމެ ރަނގަޅު ފިޔަވަޅެވެ. މިކަމަކީ ސީރިއަސް ކަމެއް ކަމަށާއި ނަމަވެސް ވަގުތީ ކަމެއްކަން ވެސް އޭނާ ފާހަގަކުރިއެވެ.
އޭނާ އިތުރަށް ބުނި ގޮތުގައި މިއީ 9/11 ގެ ހާދިސާ ފަދަ ކަމެކެވެ. ނަމަވެސް މަރުވި މީހުންގެ އަދަދު އެއަށް ވުރެ 10 ގުނަ އިތުރު ކަން ވެސް އޭނާ ފާހަގަކުރިއެވެ.
ކޮރޯނާ ވައިރަސް ޖެހިގެން އެމެރިކާ އިން މަރުވާ މީހުންގެ އަދަދު އަންނަނީ އިތުރުވަމުންނެވެ. މިހާތަނަށް ޖުމްލަ 10,490 މީހުން މަރުވެފައިވާއިރު ނިއުޔޯކް ސިޓީގައި އެކަނިވެސް 4,758 މީހަކުވަނީ މަރުވެފައެވެ.
ނިއުޔޯކް ސިޓީގައި މަރުވި މީހުންގެ އަދަދު އިތުރުވެފައިވާއިރު ވަޅުލާނެ ތަނެއް ނެތި ގިނަ މޯޗަރީތައް ވެސް ވަނީ ފުރިފައި ކަމުގައި ރިޕޯޓުތައް ބުނެއެވެެ.
ޕާކުތަކުގައި ވަޅުލުމުގެ މަސައްކަތް ވަރަށް އަވަހަށް ފަށަން ހަމަޖެހިފައިވާ ކަމަށާއި އަމާޒަކީ އިޓަލީ ފަދައިން ސިފައިން ބޭނުންކޮށްގެން މަރުވާ މީހުން ވަޅުލުން ކަމުގައި ވެސް މާކް ވަނީ ބުނެފައެވެ.
2019 ވަނަ އަހަރު ޗައިނާ އިން އެންމެ ފުރަތަމަ ފެނުނު ކޮރޯނާ ވައިރަހުގެ އެންމެ ގިނަ ކޭސް ފެނިފައިވަނީ އެމެރިކާއިންނެވެ. އެމެރިކާ އިން މިހާތަނަށް 356,414 މީހަކު ވަނީ ވައިރަހަށް ފައްސިވެފައެވެ. މި އަދަދަކީ ބަލި އެންމެ ފުރަތަމަ ފެނުނު ޗައިނާއަށް ވުރެ ހަތަރު ގުނަ އިތުރު އަދަދެއް ކަން ވެސް ފާހަގަކޮށްލެވެއެވެ.
