ކޮވިޑް-19 ޖެހިފައިވާ އިނގިރޭސި ބޮޑުވަޒީރުގެ ހާލު ދެރަވެ، އައިސީޔޫގައި ފަރުވާދެނީ
ކޮވިޑް-19 އަށް ފައްސި ވެފައިވާ އިނގިރޭސިވިލާތުގެ ބޮޑުވަޒީރު، ބޮރިސް ޖޯންސަން ހޮސްޕިޓަލުގައި އެޑްމިޓްކޮށްފައިވަނިކޮށް، ހާލު ދެރަވުމާ ގުޅިގެން އައިސީޔޫ އަށް ބަދަލުކޮށްގެން ފަރުވާދޭން ފަށައިފިއެވެ.
އިނގިރޭސި ބޮޑުވަޒީރު ހުންނަވާ ގެކޮޅުގެ ތަރުޖަމާނަކު ވިދާޅު ބޮރިސް ހޮސްޕިޓަލުގައި އެޑްމިޓް ކުރައްވާފައިވަނީ ކޮވިޑަށް ޕޮޒިޓިވްވިތާ 10 ދުވަސް ފަހުން ވެސް އެ ބަލީގެ އަލާމާތްތައް ފެންނަމުން ދިޔުމާއި ގުޅިގެން ޓެސްޓުތަކެއް ހެދުމަށާއި ނަމަވެސް އަލާމާތްތައް އިތުރަށް ގޯސްވުމާ ގުޅިގެން މެޑިކަލް ޓީމުގެ އިރުޝާދާއެކު އައިސީޔޫ އަށް ބަދަލުކޮށް ފަރުވާދޭން ފަށާފައިވާ ކަމަށެވެ.
ބޮރިސް އަށް އައިސީޔޫގައި ފަރުވާދޭން ފަށާފައިވާއިރު އިނގިރޭސި ސަރުކާރު ހިންގުމުގެ މަސްއޫލިއްޔަތުތަކާ މިހާރު ހަވާލުވެވަޑައިގެންފައި ވަނީ ފޮރިން ސެކްރެޓަރީ ޑޮމިނިކް ރާބް އެވެ.
ބޮރިސް ކޮވިޑް-19 އަށް ފައްސިވެފައިވާކަން ހާމަކުރެއްވީ މިދިޔަ މަހުގެ 27 ވަނަ ދުވަހުއެވެ.
ބައްޔަށް ޕޮޒިޓިވް ވުމާއެކު ސެލްފް އައިސޮލޭޝަނަށް ބޮރިސް ވަޑައިގެންނެވިއިރު، ވީޑިއޯ ކޮންފަރެންސް މެދުވެރިކޮށް ސަރުކާރު ހިންގުމުގެ ކަންކަން އޭނާ މިހާތަނަށް ދިޔައީ ކުރައްވަމުންނެވެ.
