ކޮވިޑް-19: އޭދަފުށީގައި ކަރަންޓީނު ގައި ހުރި އިތުރު މީހަކު ފައްސިވެއްޖެ
ބ. އޭދަފުށީގައި ހޯމް ކަރަންޓީނުގައި ހުރި އިތުރު މީހަކު ކޮވިޑް-19 އަށް ފައްސި ވެއްޖެއެވެ.
މިފަހަރު އެރަށުން ފައްސިވީ އުމުރުން 27 އަހަރުގެ އިންޑިއާ ފިރިހެނެކެވެ. އެނގިފައިވާ ގޮތުގައި އެމީހާއަކީ ބ. އަތޮޅު ހޮސްޕިޓަލުގެ ލެބޯޓަރީ އަށް ގެންދިޔަ މީހެކެވެ. އެމީހާ ކޮވިޑަށް ފައްސި ވެފައިވާކަން އެނގިފައިވަނީ ކަރަންޓީނު 14 ދުވަހުގެ މުއްދަތު ހަމަކުރުމަށްފަހު ހެދި ޓެސްޓުންނެވެ.
މިއީ އޭދަފުށިން ކޮވިޑަށް ފައްސިވީ 11 ވަނަ މީހާއެވެ. މިއީ ކަރަންޓީނުގައި ހުރި މީހެއްކަމުން އެރަށް މޮނީޓަރިންއަކަށް ނުލާނެއެވެ. އަދި އޭނާއާއި އެހެން އެއްވެސް މީހަކާއި ސީދާ ދިމާވެފައި ނުވާނެ ކަމަށް އެއަތޮޅު ހޮސްޕިޓަލުން ބުނެއެވެ.
އޭދަފުށީގައި ކަރަންޓީނުގައި 18 މީހުން އެބަތިއްބެވެ.
މިހާތަނަށް ރާއްޖެއިން ކޮވިޑް-19 އަށް ފައްސިވީ މީހުންގެ ޖުމްލަ އަދަދު މިހާރު 10،157 މީހުންނެވެ. އޭގެ ތެރެއިން އިއްޔެ މިބައްޔަށް ފައްސި ވެފައި ވަނީ 12 ބިދޭސީންނާއި 47 ދިވެހީންނެވެ. އަދި ބަލިން ފަސޭހަވީ މީހުންގެ ޖުމްލަ އަދަދު މިހާރު ވަނީ 8،950 އަށް އަރާފައެވެ. މިބަލީގައި ރާއްޖެއިން ނިޔާވެފައި ވަނީ 34 މީހުންނެވެ.
