ކޮވިޑް-19: އެއްގަމު އުޅަނދު ދުއްވުން ވެސް ރޭގަނޑު 10 ން ފެށިގެން މަނާވާ ގޮތަށް ބަދަލު ގެނެސްފި
މިއަދުން ފެށިގެން، މާލެ ސަރަޙައްދުގައި އެއްގަމު އުޅަނދު ދުއްވުން މަނާ ވާނީ ރޭގަނޑު 10:00 ން އަނެއް ދުވަހުގެ ފަތިހު 5:00 އާއި ހަމައަށް ކަމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ނިންމައިފިއެވެ.
އެޗްޕީއޭއިން މިރޭ ނެރުނު ބަޔާނެއްގައި ބުނެފައިވަނީ މިއަދުން (3 އޮކްޓޯބަރ 2020) ވަކި ގޮތެއް އަންގަންދެން ފެށިގެން މާލެ، ވިލިމާލެ އަދި ހުޅުމާލެ ގައި އެއްގަމު އުޅަނދު ދުއްވުން މަނާ ވާނީ ރޭގަނޑު 10:00 ން ފެށިގެން އަނެއް ދުވަހުގެ ފަތިހު 5:00 އާއި ހަމައަށް ކަމަށެވެ.
އެޗްޕީއޭ އިން އަޅާފައިމިވާ ފިޔަވަޅާއި ގުޅިގެން ދެން މާލެ ސަރަޙައްދުގައި އެއްގަމު އުޅަނދުފަހަރު ދުއްވުން ވެސް މަނާ ވާނީ، ބޭރަށް ނިކުމެ އުޅުން އެ އެޖެންސީން މަނާކޮށްފައިވާ ގަޑީގައެވެ. މިބަދަލު ގެނައުމުގެ ކުރިން އެއްގަމު އުޅަނދުފަހަރު ދުއްވުން މަނާ ކޮށްފައި ވަނީ ރޭގަނޑު 8:00 ން އަނެއްދުވަހުގެ ފަތިހު 5:00 އާއި ހަމައަށެވެ.
ނަމަވެސް ވިޔަފާރި ކުރާ ތަންތަން ބަންދު ކުރުމަށް އަދިވެސް ހަމަޖެހިފައިވަނީ ރޭގަނޑު 9:30 ގައެވެ.
ވަކި ވަގުތަކުން ފެށިގެން އެއްގަމު އުޅަނދުފަހަރު ދުއްވުމާއި ބޭރުގައި އުޅުން އެޗްޕީއޭ އިން މަނާކުރީ، ފެތުރެމުން އަންނަ ކޮވިޑް-19 މާލެ ސަރަޙައްދުގައި ފެތުރޭ މިންވަރު އެއިރު ބޮޑުތަނުން އިތުރުވަމުން އަންނާތީ، ބަލި ފެތުރުން ކޮންޓްރޯލު ކުރުމުގެ ގޮތުންނެވެ.
އެގޮތުން މިފިޔަވަޅުތަކާއެކު ކޮވިޑް ފެތުރެމުން ދިޔަ މިންވަރު ވަނީ ބޮޑުތަނުން މަދުވެފައެވެ. އެގޮތުން ފާއިތުވީ ސެޕްޓެމްބަރު މަހުގެ ގިނަ ދުވަސްތަކުގައި ކޮވިޑަށް ފައްސިވީ މީހުންގެ އަދަދު ހުރީ 100 އަށްވުރެ މަދުންނެވެ. އަދި ބަލިން ފަސޭހަވީ މީހުންގެ އަދަދު ވެސް ދިޔައީ އިތުރުވަމުންނެވެ.
