ކޮވިޑް-19: ލާމު ގަމުން 25 ސިފައިން ފައްސިވެއްޖެ
ލ. ގަމުގައި ޓްރެއިނިން ހަދަމުން ދިޔަ 25 ސިފައިން ކޮވިޑް-19 އަށް ފައްސިވެއްޖެއެވެ.
ގަމުން ކޮވިޑް-19 އަށް ފައްސިވެފައިވަނީ އެމްއެންޑީއެފް ސެންޓްރަލް އޭރިއާގައި ހޯމް ކަރަންޓީނުގައި ތިބުމަށްފަހު ޓެސްޓު ކުރި މީހުންގެ ތެރެއިން 25 މީހެކެވެ.
އެމީހުން ކޭމްޕް ކޮށްގެން ތިބީ ގަމުގެ މީހުން ދިރިނޫޅޭ ސަރަހައްދެއް ކަމަށްވާ (ކަށިކޮލި ނުވަތަ ވައިޓްބޭ) ސަރަހައްދުގައެވެ.
އެމީހުންގެ ސާމްޕަލް ނަގާފައިވަނީ މި މަހުގެ އެއްވަނަ ދުވަހުއެވެ.
ގަން ރީޖަނަލް ހޮސްޕިޓަލުގެ މެނޭޖަރ އަލީ ނަޝީދު ވަނީ ލ. ގަމުގައި ޓްރެއިނިންގ ހަދަމުން ދިޔަ 25 ސިފައިންގެ މީހަކު ކޮވިޑް-19 އަށް ފައްސިވެފައިވާކަން "ދެން" އަށް ކަށަވަރުކޮށްދީފައެވެ.
އަލީ ނަޝީދު ވިދާޅުވީ މިމަހުގެ އެއްވަނަ ދުވަހު ޖުމްލަ 93 ފަރާތެއްގެ ސާމްޕަލް ނަގާފައިވާ ކަމަށާއި، އޭގެތެރެއިން 25 ސާމްޕަލް ފައްސިވެފައިވާ ކަމަށެވެ. އަދި އެ ސާމްޕަލްތަކުގެ ތެރެއިން 24 ސާމްޕަލްގެ ނަތީޖާ އަދި ނުލިބިވާ ކަމަށްވެސް އަލީ ނަޝީދު ވަނީ ވިދާޅުވެފައެވެ.
އަލީ ނަޝީދު އިތުރަށް ވިދާޅުވީ ފައްސިވި އެންމެންގެ ހާލުވެސް ރަނގަޅު ކަމަށެވެ.
ލ. ގަމުން ފައްސިވި 25 މީހުންގެ ކޮންޓެކްޓް ޓްރޭސިން މިހާރު ނިމިފައިވާއިރު، މިކަމާ ގުޅިގެން އިތުރަށް އަޅަން ޖެހޭ ފިޔަވަޅުތައް ހޮސްޕިޓަލުން އަންނަނީ އަޅަމުންނެވެ.
މީގެ ކުރިން ވެސް ގަމުން ހޯމް ކަރަންޓީނުގައި ތިބި ދެމީހަކު ވަނީ ކޮވިޑް-19 އަށް ފައްސިވެފައެވެ. އެ ދެމީހުންވެސް މިހާރު ވަނީ ބަލިން ރަނގަޅުވެފައެވެ.
Ads by STO
