ކޮވިޑް-19: ލ. ގަމުން އިތުރު 10 ސިފައިން ފައްސިވެއްޖެ
ލ. ގަމުން ކޮވިޑަށް އިތުރު 10 ސިފައިން ފައްސި ވެއްޖެއެވެ.
އެނގިފައިވާ ގޮތުގައި ގަމުން ފައްސިވެފައި ވަނީ އެރަށުގައި ޓްރެއިނިން ހަދަމުން ދިޔަ ސިފައިންތަކެކެވެ. އެގޮތުން އިއްޔެ ވެސް 25 ސިފައިން ކޮވިޑް-19 އަށް ފައްސި ވެފައިވެއެވެ.
ގަމުން ކޮވިޑް-19 އަށް ފައްސިވެފައި ވަނީ އެމްއެންޑީއެފް ސެންޓްރަލް އޭރިއާގައި ހޯމް ކަރަންޓީނުގައި ތިބުމަށްފަހު ޓެސްޓު ކުރި ސިފައިންގެ ބޭކަލުން ތަކެކެވެ.
އެމީހުން ކޭމްޕް ކޮށްގެން ތިބީ ގަމުގެ މީހުން ދިރިނޫޅޭ ސަރަހައްދެއް ކަމަށްވާ (ކަށިކޮލި ނުވަތަ ވައިޓްބޭ) ސަރަހައްދުގައެވެ.
އިއްޔެ ފައްސިވީ މީހުންގެ ސާމްޕަލް ނަގާފައި ވަނީ މި ހިނގާ އޮކްޓޯބަރު މަހުގެ އެއްވަނަ ދުވަހުއެވެ.
ގަން ރީޖަނަލް ހޮސްޕިޓަލުގެ މެނޭޖަރ އަލީ ނަޝީދު ވަނީ ލ. ގަމުގައި ޓްރެއިނިންގ ހަދަމުން ދިޔަ 25 ސިފައިންގެ މީހަކު ކޮވިޑް-19 އަށް ފައްސިވެފައިވާކަން "ދެން" އަށް އިއްޔެ ކަށަވަރުކޮށްދީފައެވެ.
އަލީ ނަޝީދު ވިދާޅުވީ މިމަހުގެ އެއްވަނަ ދުވަހު ޖުމްލަ 93 ފަރާތެއްގެ ސާމްޕަލް ނަގާފައިވާ ކަމަށާއި، އޭގެތެރެއިން 25 ސާމްޕަލް ފައްސިވެފައިވާ ކަމަށެވެ. އަދި އެ ސާމްޕަލްތަކުގެ ތެރެއިން 24 ސާމްޕަލްގެ ނަތީޖާ އަދި ނުލިބިވާ ކަމަށް ވެސް އަލީ ނަޝީދު ވަނީ ވިދާޅުވެފައެވެ.
މިއަދު ފައްސިވީ އިތުރު 10 ސިފައިންނާއެކު މިހާރު އެރަށުން ފައްސިވީ ސިފައިންގެ ޖުމްލަ އަދަދު ވަނީ 35 އަށް އަރާފައެވެ.
