"ބަހެއް ނޫން، މިއީ ބާރެއް": އިންޑިއާއިން ތިންވަނަ ނިއުކްލިއާ ސަބްމެރިން 'އަރިދާމަން' އިފްތިތާހުކޮށްފި
އިންޑިއާގެ ކަނޑުގެ އަސްކަރީ ބާރުވެރިކަން އިތުރަށް ވަރުގަދަކުރުމުގެ ގޮތުން، ނިއުކްލިއާ ބާރުގައި ދުއްވާ ތިންވަނަ ބެލިސްޓިކް މިސައިލް ސަބްމެރިން (SSBN) 'އައިއެންއެސް އަރިދާމަން' އެ ގައުމުގެ އަސްކަރިއްޔާއާ ހުކުރު ދުވަހު ގުޅިއްޖެއެވެ. މީގެ އިތުރުން، އިންޑިއާގެ ކަނޑުގެ ސިފައިން ވަނީ 'އައިއެންއެސް ތަރަގިރި' ނަމަކަށް ކިޔާ ޒަމާނީ 'ސްޓެލްތު ފްރިގޭޓް' އެއްވެސް ވަކި ރަސްމިއްޔާތެއްގައި އިފްތިތާހުކޮށްފައެވެ.
މި އުޅަނދުތައް އަސްކަރީ ހިދުމަތަށް ނެރުމުގެ ރަސްމިއްޔާތުތައް ޝަރަފުވެރިކޮށްދެއްވީ އިންޑިއާގެ ޑިފެންސް މިނިސްޓަރު ރާޖްނާތު ސިންގް އެވެ. މި އާ އުޅަނދުތަކާއެކު އިންޑިއާގެ ކަނޑުގެ ސިފައިންގެ ގާބިލުކަމާއި، ކަނޑުމަތީގެ ހަނގުރާމަވެރި ބާރުވެރިކަމަށް ބޮޑު ކުރިއެރުމެއް ލިބިގެންދާނެއެވެ.
އައިއެންއެސް އަރިދާމަން އިފްތިތާހުކުރުމާ ގުޅޭގޮތުން ރަސްމީ ބަޔާނެއް ނެރެފައި ނުވި ނަމަވެސް، މިނިސްޓަރު ސިންގް ވަނީ ހުކުރު ދުވަހުގެ ހެނދުނު 'އެކްސް' ގައި ކުރެއްވި ޕޯސްޓެއްގައި އެކަމަށް އިޝާރާތް ކުރައްވާފައެވެ. އެ މަނިކުފާނު ވިދާޅުވީ، "އަރިދާމަން އަކީ ހަމައެކަނި ބަހެއް ނޫން، އެއީ ބާރެއް" ކަމަށެވެ.
ނީލްގިރި ކްލާސްގެ ހަތަރުވަނަ ސްޓެލްތު ފްރިގޭޓް 'އައިއެންއެސް ތަރަގިރި' އިފްތިތާހުކުރުމުގެ ރަސްމިއްޔާތުގައި ވާހަކަދައްކަވަމުން ސިންގް ވިދާޅުވީ، މިއީ ކަނޑުމަތީގެ ސަލާމަތާއި ރައްކާތެރިކަން ބެލެހެއްޓުމާއި، ކަނޑުފޭރުމާ ދެކޮޅަށް މަސައްކަތްކުރުމާއި، އަދި އިންސާނީ އެހީތެރިކަން ފޯރުކޮށްދިނުމުގެ މިޝަންތަކުގައި ބޭނުންކުރެވޭނެ ވަރަށް ފުރިހަމަ އުޅަނދެއް ކަމަށެވެ.
އައިއެންއެސް އަރިދާމަން އާއެކު، އިންޑިއާގެ ކަނޑުގެ ސިފައިންގެ އޮޕަރޭޝަންތަކުގައި މިހާރު ނިއުކްލިއާ ތިން ސަބްމެރިން ބޭނުންކުރަން ފަށާނެއެވެ. އިންޑިއާގައި އަމިއްލައަށް އުފެއްދި މި ސަބްމެރިންއަކީ 2016 އަދި 2024 ގައި ހިދުމަތަށް ނެރުނު އައިއެންއެސް އަރިހާންތު އަދި އައިއެންއެސް އަރިގާތަށް ވުރެ ގިނަ އަދަދަކަށް ދުރު ރާސްތާގެ ނިއުކްލިއާ މިސައިލް އުފުލުމުގެ ގާބިލުކަން ލިބިފައިވާ އުޅަނދެކެވެ.
7,000 ޓަނުގެ މި އުޅަނދުގައި ކޭ-15 މިސައިލާއި، 3,500 ކިލޯމީޓަރު ދުރުގައި ހުންނަ އަމާޒުތަކަށް ހަމަލާދިނުމުގެ ގާބިލުކަން ލިބިފައިވާ ކޭ-4 ނިއުކްލިއާ މިސައިލްތައް އުފުލޭނެއެވެ. މިފަދަ ހަތަރުވަނަ ސަބްމެރިންއެއް ބަނުމުގެ މަސައްކަތް މިހާރު ވެސް ދަނީ ކުރަމުންނެވެ.
އިންޑިއާ އަކީ އެއްގަމާއި، ވައިގެ މަގުން އަދި ކަނޑުގެ އަޑިން ނިއުކްލިއާ ހަމަލާދިނުމުގެ ގާބިލުކަން ނުވަތަ 'ނިއުކްލިއާ ޓްރިއަޑް' ލިބިފައިވާ މަދު ގައުމުތަކުގެ ތެރެއިން ގައުމެކެވެ. މި ލިސްޓުގައި ދެން ހިމެނެނީ އެމެރިކާ، ރަޝިއާ އަދި ޗައިނާއެވެ. އިންޑިއާގެ ސިޔާސަތަކީ ނިއުކްލިއާ ހަތިޔާރު ހަމައެކަނި ދިފާއީ ބޭނުމަށް ބޭނުންކުރުމެވެ.
އައިއެންއެސް ތަރަގިރިއާ ގުޅޭގޮތުން ޑިފެންސް މިނިސްޓްރީން ބުނީ، މިއީ ރޭޑާރުތަކަށް ފަސޭހައިން ފާހަގަ ނުކުރެވޭނެ 'ސްޓެލްތު' ޓެކްނޮލޮޖީ ބޭނުންކޮށްގެން އުފައްދާފައިވާ އުޅަނދެއް ކަމަށެވެ. މި އުޅަނދުގައި ބްރަހްމޯސް ފަދަ ޒަމާނީ މިސައިލް ސިސްޓަމްތައް ހަރުކުރެވިފައިވެއެވެ.
މިނިސްޓަރު ސިންގް އިތުރަށް ފާހަގަކުރެއްވި ގޮތުގައި، އިންޑިއާގެ ވިޔަފާރީގެ 95 އިންސައްތަ ހިނގަނީ ކަނޑުގެ މަގުން ކަމަށްވާތީ، ވަރުގަދަ ކަނޑުގެ ސިފައިންގެ ބާރެއް އޮތުމަކީ ގައުމުގެ އިގްތިސާދީ އަދި ހަކަތައިގެ ރައްކާތެރިކަމަށް ކޮންމެހެން ބޭނުންތެރި ކަމެކެވެ. އަދި ދުނިޔޭގެ އިންޓަނެޓް ކޭބަލްތައް ވެސް ކަނޑުގެ އަޑީގައި ހުރުމާއެކު، އެ ތަންތަނުގެ ރައްކާތެރިކަން ކަށަވަރުކުރުމަކީ ވެސް އަސްކަރިއްޔާގެ މުހިންމު ޒިންމާއެއް ކަމަށް އެ މަނިކުފާނު ވިދާޅުވިއެވެ.
