10 މީހުންނަށްވުރެ ގިނައިން ހޯމް ކަރަންޓީނަށްދާނަމަ ފުރުމުގެ ކުރިން ޕީސީއާރު ޓެސްޓް ހަދަން ފަށަނީ
ރަށްރަށަށް ހޯމް ކަރަންޓީނަށް ދިއުމުގައި، 10 މީހުނަށް ވުރެ ގިނަ މީހުން އެއްތަނެއްގައި ކަރަންޓީނު ވުމަށް ދާ ނަމަ، މާލެއިން ފުރުމުގެ ކުރިން ޕީސީއާރް ޓެސްޓު ހަދަން ޖެހޭ ގޮތަށް އުސޫލަށް ބަދަލު ގެންނަން ގަސްދު ކޮށްފައިވާ ކަމަށް ހެލްތް އިމަޖެންސީ އޮޕަރޭޝަން ސެންޓަރުން ވިދާޅުވެއްޖެއެވެ.
ބުދަ ދުވަހުގެ ރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި ޑރ. އަޙްމަދު ޝަހީދު ވިދާޅުވީ އަދިވެސް މަސައްކަތް ކުރަމުން އަންނަނީ ރަށް ރަށް ބަލި ނުފެތުރޭނެ ގޮތަށް ކަންކަން ކުރުމަށް ކަމަށާއި މާލެއިން ރަށް ރަށަށް ގޮސް ފުރަބަންދު ވާން ޖެހޭ އުސޫލު އެކުލަވާލައި އަމަލުކުރަން ފެށުމުން ރަށްރަށުގައި ބަލި ފެތުރުން ކޮންޓްރޯލް ކުރެވިފައިވާ ކަމަށެވެ. އަދި މި އުސޫލަށް އެންމެން ވެސް އަމަލު ކުރުމުގެ މުހިންމު ކަން ޑޮކްޓަރު ފާހަގަ ކުރެއްވިއެވެ.
ޑރ. ޝަހީދު އިތުރަށް ވިދާޅުވީ އެކި އޮފީސްތަކާއި ބިދޭސީންގެ އިތުރުން އާންމު މީހުންގެ ތެރެއިން ވެސް އެއްތަނެއްގައި ގިނަ ބަޔަކު ފުރަބަންދު ކަރަންޓީންވާނަމަ އަމަލު ކުރަން ޖެހޭނީ ވަކިވަކިން ކަރަންޓީނުވާން ޖެހޭ އުސޫލަކުން ކަމަށެވެ. ނަމަވެސް މި އުސޫލަށް އަމަލު ނުކުރެވޭ ފަރާތްތަކަށް އުސޫލު ބަދަލު ކުރުމަށް ވިސްނަމުން ދާ ކަމަށް ޑޮކްޓަރު ވިދާޅުވިއެވެ.
"މިގޮތަށް ޕީސީއާރު ޓެސްޓްހަދާނީ ދަތުރުކުރުމުގެ 72 ގަޑިއިރު ކުރިން. އޭގެ މާނައަކީ ގްރޭޓަރ މާލެ ސަރަހައްދުން މިގޮތަށް ރަށަކަށް ގޮސް ގިނަ އަދަދެއްގެ މީހުން ކަރަންޓީން ވާން ދާނަމަ، މާނައަކީ 10 މީހުންނަށް ވުރެ ގިނަ އަދަދެއްގެ މީހުން ދާނަމަ ޕީސީއާރު ޓެސްޓް ހަދަން ޖެހޭނެއޭ" ޑރ. އަޙްމަދު ޝަހީދު ވިދާޅުވިއެވެ.
