ވަރޗުއަލް ބަހުސަކަށް ބަދަލު ކުރުމުން، ބައިޑަންއާއެކު ބަހުސް ކުރަން ޓްރަމްޕް ދެކޮޅު ހަދައިފި
އެމެރިކާގެ ރިޔާސީ އިންތިހާބުގައި މިފަހަރު ވާދަ ކުރައްވާ ޖޯ ބައިޑަންއާއެކު ވަރޗުއަލް ބަހުސެއް ކުރެއްވުމަށް އެމެރިކާގެ ރައީސް ޑޮނަލްޑް ޓްރަމްޕް ދެކޮޅު ހައްދަވައިފިއެވެ.
ކޮވިޑް-19 އަށް ފައްސި ވުމާއި ގުޅިގެން ޓްރަމްޕް އާއި ބައިޑެން ގެ ބަހުސް ވަރޗުއަލްކޮށް (ވީޑިއޯ ކޮންފަރެންސް މެދުވެރިކޮށް) ބޭއްވުމަށް ނިންމީ އެފަރާތުގެ ވެސް ރައްކާތެރިކަމަށް ވިސްނާފައެވެ. ނަމަވެސް މިގޮތަށް ރިޔާސީ ބަހުސެއް ކުރެއްވުމަށް ޓްރަމްޕް ވަނީ ދެކޮޅު ހައްދަވާފައެވެ.
"އަހަރުމެން ތިގޮތަކާއި އެއްބަހެއް ނުވަން. ތިއީ ބަހުސް ކުރާ ގޮތެއް ނޫން. ބަހުސަކީ ކޮމްޕިއުޓަރަކާއި ދިމާލަށް ބަލަން އިނދެ ކުރާ އެއްޗެއް ނޫން. އަަހަރެންގެ ވަގުތު ތިގޮތަކަށް ބޭކާރެއް ނުކުރާނަން. ތިހެން ބަހުސް ކުރަންޏާ، އެމީހުން ބޭނުން އިރަކު ކަނޑާވެސް ލާނެ" ޓްރަމްޕް ވިދާޅުވެފައިވެއެވެ.
މީގެއިތުރުން އެމެރިކާގެ ރައީސް ވިދާޅުވީ ބަހުސްގެ ސްޓައިލަށް ބަދަލު ގެނެވިފައިވާކަން، ޕްރެސިޑެންޝަލް ޑިބޭޓްސް ކޮމިޝަނުން ކުރިން އެމަނިކުފާނަށާއި އެމަނިކުފާނުގެ ކެމްޕޭނު ޓީމަށް ނާންގާ ކަމަށެވެ. އެހެންކަމުން މިއީ ބަލައިގަނެވޭނެ ކަމެއް ނޫން ކަމުގައި ވެސް ޓްރަމްޕް ވިދާޅުވެފައިވެއެވެ.
ޓްރަމްޕް ގެ އިތުރުން އެމަނިކުފާނުގެ ދަރިކަލުން އެރިކް ޓްރަމްޕް ވެސް ވަނީ މިކަމާއި ނުރުހުން ފާޅު ކުރައްވާފައެވެ. އެރިކް ވަނީ ރިޔާސީ ކެންޑިޑޭޓް ޖޯއި ބައިޑަން، ބަހުސްތައް ރާވާ ފަރާތްތަކުގެ އެހީ ހޯދާ ކަމަށް ވެސް ތުހުމަތު ކުރައްވާފައެވެ.
Ads by STO
