އައްޑޫ ޑްރަގް އޮޕަރޭޝަން: އިތުރު ތިން މީހެއްގެ ވަނަވަރު އާއްމުކޮށް ޝަރީޢަތް ނިމެންދެން ބަންދުކޮށްފި
އައްޑޫ ސިޓީގައި ފުލުހުން ކުރިއަށް ގެންދިޔަ މަސްތުވާތަކެތީގެ ޚާއްސަ އޮޕަރޭޝަންގައި ހައްޔަރުކުރި މީހުންގެ ތެރެއިން އިތުރު ތިން މީހަކު ޝަރީޢަތް ނިމެންދެން ބަންދުކޮށް، އެމީހުންގެ ވަނަވަރު އާއްމުކޮށްފިއެވެ.
އެގޮތުން ޝަރީޢަތް ނިމެންދެން ބަންދު ކޮށްފައިވަނީ ސ. ހިތަދޫ/ ފިނިފަރު ހަސަން އާމިރު(25އ)، އާއި ސ. ހިތަދޫ/ބުލޫބާރޑް ހޫދު ލަތީފް(24އ) އާއި، ސ. ހިތަދޫ/މަންދޫބުގެ ޙުސައިން ސިމާޙު(27އ) އެވެ.
މިމީހުންގެ ތެރެއިން ހޫދު ލަތީފަކީ މިމައްސަލައާ ގުޅިގެން މިމަހުގެ 7 ވަނަ ދުވަހުގެ ވަގުތެއްގައި ހައްޔަރުކޮށް، އެދުވަހު ކޯޓަށް ހާޒިރުކުރުމުން ޝަރީއަތް ނިމެންދެން ބަންދުގައި ބެހެއްޓުމަށް އަމުރުކޮށްފައިވާ މީހެކެވެ.ހަސަން އާމިރާއި ހުސެއިން ސިމާޙު، ޝަރީއަތް ނިމެންދެން ބަންދުގައި ބޭތިއްބުމަށް އަމުރުކޮށްފައި ވަނީ އެދެމީހުންގެ ބަންދާމެދު ގޮތެއް ނިންމުމަށް އިއްޔެ ކޯޓަށް ހާޒިރުކުރުމުންނެވެ.
މިތިން މީހުންނާއެކު މިމައްސަލައިގައި ޖުމްލަ ފަސް މީހަކު މިހާރު ވަނީ ޝަރީޢަތް ނިމެންދެން ބަންދު ކޮށްފައެވެ. ކުރިން ޝަރީޢަތް ނިމެންދެން ބަންދުގައި ބެހެއްޓުމަށް އަމުރު ކޮށްފައިވަނީ ސ.ހިތަދޫ/ފިނިފަރު ޢަބްދުﷲ އިބްރާހިމް (33އ) އާއި ސ. ހިތަދޫ/ކޯޅި މުޙައްމަދު ޔާމީން ނަޞީރު (23އ) އެވެ. އެމީހުން ބަންދުގައި ބެހެއްޓުމަށް އަމުރުކޮށްފައިވަނީ ހިތަދޫ މެޖިސްޓްރޭޓް ކޯޓުންނެވެ.
Ads by STO
