ޚިދުމަތް ދެމުން އަންނަނީ އޯގާތެރިކަމާއެކު: އެޗްޕީއޭ ގެ ރައްދު އިކުރާމް އަށް
ކޮވިޑް-19 އާއި ގުޅިގެން ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ޚިދުމަތް ދެމުން އަންނަނީ އޯގާތެރިކަމާއެކު ކަަމަށް އެއެޖެންސީން ބުނެ، ދިއްގަރު ދާއިރާގެ މެންބަރު އިކުރާމް ޙަސަނަށް ރައްދު ދެއްވައިފިއެވެ.
އެޗްޕީއޭ އިން މިރޭ ނެރުނު ބަޔާނެއްގައި ބުނެފައިވަނީ ކޮވިޑް-19 ކޮންޓްރޯލް ކުރުމަށް ކުރަމުންދާ މަސައްކަތުގައި އެޗްއީއޯސީންނާއި ސިއްޙީ ޚިދުމަތްދޭ މަރުކަޒުތަކުގައި އަދި ކޮވިޑަށް ޓެސްޓު ކުރުމުގައި ދެމުންދާ ޚިދުމަތްތަކަކީ ޕްރޮފެޝަނަލް މިންގަނޑުތަކާއި އެއްގޮތްވާ ގޮތުގެ މަތިން ދެމުންދާ ޚިދުމަތްތަކެއް ކަމުގައެވެ.
ޚިދުމަތް ދިނުމުގައި ކަންކަން އޮޅުން ފިލުވައިދީ އާންމު ފަރާތްތަކުން ކަންބޮޑުވާ ކަންތައްތަކަށް ވެސް އިޖާބަ ދެމުންގެންދާކަން ވެސް އެޗްޕީއޭ އިން ފާހަގަ ކޮށްފައިވެއެވެ.
"މިމަސައްކަތުގައި ސިއްޙީ ޚިދުމަތްތެރީންނާއި ވޮލަންޓިއަރުން ރެއާއި ދުވާލު ރެއާއި ދުވާލު މަސައްކަތް ކުރަނީ އެންމެންގެ ސަލާމަތާއި ރައްކާތެރިކަމަށް އިސްކަންދީގެން ފޯރުކޮށްދޭ ޚިދުމަތް ދިނުމުގައި ޢަމަލު ކުރުމަށް ކަނޑައެޅިފައިވާ މިންގަނޑުތަކާއި އެއްގޮތްވާ ގޮތުގެ މަތިން އަދި އޯގާތެރިކަމާ އެކުގައިކަމަށް ވެސް ދަންނަވަން" އެޗްޕީއޭގެ ބަޔާނުގައިވެއެވެ.
އެޗްޕީއޭއިން މިބަޔާން ނެރެފައި މިވަނީ، ކޮވިޑަށް ޓެސްޓު ކުރަން ސާމްޕަލް ނެގި މީހަކަށް މެންބަރު އިކުރާމް ހަމަލާދިން ކަމުގެ އަޑުތަކެއް ފެތުރިފައި ވަނިކޮށެވެ. ނަމަވެސް އިކުރާމް ވިދާޅުވެފައި ވަނީ މާރާމާރީ ނުހިންގާ ކަމަށާއި، ވީތަދުން އެހާ އަނިޔާވެރިކޮށް ސާމްޕަލް ނަގާ ކުދިން ބައިތިއްބަން ނުވާނެކަމަށް ބުނެވުނު ކަމަށެވެ.
