ދަރިފުޅަށް މަގު ދައްކައިދިން ބައްޕަގެ ބަސް: "މަންމައަކީ މަގު މައްޗަށް އެއްލާލި ޖަވާހިރެއް"
ކޮންމެ ބައްޕަޔަކީ ވެސް މިފަދަ ބައްޕަޔަކަށް ވެއްޖެނަމަ ޔަޤީނުންވެސް ދަރިންގެ ޙަޔާތުގެ މިސްރާބު އޮޅި ދިރިއުޅުމުގެ ދަތުރު މަންޒިލަށް ވާސިލްނުވެ ދިރިއުޅުން ހައިޖާނުގެ ކަނޑަކަށް ނުފެތޭނެއެވެ. އަނބިންނަށް އަނިޔާ ކުރުމަކީ މި މުޖުތަމަޢު ތެރޭގައި ވެސް މިހާރު އާންމު ވަމުންދާ ކަމެކެވެ. މީ ވެސް އެފަދަ ވާހަކައެކެވެ. ޙަޤީޤީ ހަދިސާއެއްގެ މައްޗަށް ބިނާކޮށް ލިޔެފައިވާ ވާހަކައެކެވެ.
ދަރިން ބޮޑެތިވެ މީހުންނާއި އިނދެ ދަރިން ލިބުނު ކަމުގައި ވިޔަސް މައިންބަފައިން ނެތް ދުވަހަކު ވެސް އެމީހުންނަށް ވުރެން ދަރީން ބޮޑެއް ނުވާނެއެވެ. ދަރިންގެ ދިރިއުޅުމުގެ ތެރޭގައި އެ ދަރިންނަށް ހައްލު ނުކުރެވޭ މައްސަލަތައް ހައްލުކޮށް ދިނުމަށް އެހީތެރި ވާންޖެހޭ ބަޔަކީ މައިންބަފައިންނެވެ. އަދި އެދަރިން ގޯސް މަގަކުން ދާނަމަ ހަމަ މަގަށް އެޅުވޭތޯ މަސައްކަތް ކުރުމަކީ މައިންބަފައިންގެ ޒިންމާއެކެވެ. އެއީ ދަރިންގެ ދިރިއުޅުމަށް މައިންބަފައިން ވަނުމެއް ނޫނެވެ. އެއީ މައިންބަފައިންގެ ވާޖިބު އަދާކުރުމެވެ.
ކިތަންމެ ރަނގަޅު ތަރުބިއްޔަތެއްދީގެން ބަލާ ބޮޑެތި ކުރިޔަސް ބައެއް ދަރިން މަގު އޮޅިގެން ދެއެވެ. އެއީ ޤަބޫލުކުރަންޖެހޭ ހަޤީގަތެކެވެ. ބައެއް ފަހަރު ދިމާވާ ރައްޓެހިންގެ ސަބަބު ނުވަތަ ދިމާވާ ކަމެއްގެ ސަބަބުން ވެސް އެހެން ވެގެން ދެއެވެ.
ދެމަފިރިއެއްގެ ހުރި ހަމައެކަނި ދަރިފުޅެކެވެ. ބަލާ ބޮޑުކުރީ ދެލޮލުގެ ކޮއި ފަދައިން ލޯބި ދީގެންނެވެ. ރަނގަޅު ތަޢުލީމް ވެސް ދީގެންނެވެ. ނަމަވެސް ދިރިއުޅުމުގެ ދަތުރު ޒަވާޖީ ޙަޔާތެއް ފެށުމަށްފަހު ދެން ވެގެން ދިޔައީ މުޅިން ތަފާތު ގޮތެކެވެ.
މައިންބަފައިން ދިން ތަރުބިއްޔަތާއި ހޯދި ތަޢުލީމީ ސެޓްފިކެޓްތަކުގެ އަގެއް ނެތް ފަދައެވެ. ކައިވެންޏަށްފަހު އެ ދަރިފުޅު ވެގެން ދިޔައީ ހިތްހަރު އަނިޔާވެރިޔަކަށެވެ. އަނބިމީހާގެ އިހްސާސްތައް ނުދަންނަ ބީރަކަށެވެ. އަނބިމީހާގެ ކަރުނަތައް ނުފެންނަ ކަނު މީހަކަށެވެ. ހެޔޮލަފާ މައިންބަފައިންނަށް ދަރިންގެ ފަރާތުން މިފަދަ މަންޒަރުތައް ފެނުމަކީ އެމީހުންގެ ހިތަށް ކެތްވާނޭ ކަމެއް ނޫނެވެ.
ދަރިފުޅަށް ވިސްނައިދޭން އެކި ގޮތްގޮތަށް މަސައްކަތް ކޮށް އެކަން ކާމިޔާބު ނުވުމުން މި ބައްޕަ އަމަލުކުރި ބުއްދިވެރިގޮތް ނިކަން ދެކިބަލާށެވެ.
ދަރިފުޅު އޮފީހުން އައުމުން ދަރިފުޅުގެ މަންމަ ގެނެސް ދަރިފުޅު ކުރިމަތީ ބަހައްޓާފައި ބުންޏެވެ. ދަރިފުޅާއެވެ. ދަރިފުޅު މަންމަ ދެކެ ލޯބިވޭ ހެއްޔެވެ. ދަރިފުޅު އާއެކޭ ބުނުމުން ދެން ބައްޕަ ބުންޏެވެ. އެހެންވިއްޔާ ދަރިފުޅުގެ ބޫޓް ބަލާފައި އެއްކިބަ ބައްޕަގެ އަތަށް ދީބަލާށެވެ. އަދި މި ބޫޓު ކިބައިން ދަރިފުޅުގެ ލޯބިވާ މަންމަ ގައިގައި ޖަހައިފިނަމަ ދަރިފުޅު ކަންތައް ކުރާނީ ކިހިނެތްތޯ ސުވާލުކުރިއެވެ.
ޖަވާބުގައި ދަރިފުޅު ބުންޏެވެ. އަހަރެން ބައްޕަގެ އަތުން ބޫޓް ކިބަ އަތުލައި މަންމަ ހިމާޔަތް ކުރާނަމެވެ. މި މަންޒަރު ބަލަން ދަރިފުޅުގެ އަންހެނުން ދުރުގައި ހުއްޓެވެ. ދެން ބައްޕަ އަނެއްކާ ވެސް ދަރިފުޅާ ސުވާލުކުރިއެވެ. އެހެންވިއްޔާ މިއަދު ދަރިފުޅު ތިހެން ދަރިފުޅުގެ އަނބިމީހާ އަށް އަނިޔާކުރާއިރު މާދަން އެ މަންޒަރު ބަލަން ދަރިފުޅުގެ ދަރިންނަށް ކެތްވާނެ ހެއްޔެވެ؟ މަޑުން ތިބޭނޭހެން ދަރިފުޅަށް ހީވޭ ހެއްޔެވެ؟ ބައްޕަގެ މި ހައިރާން ކުރަނިވި ސުވާލުން ދަރިފުޅު ބަސް ހުއްޓި އިސްދަށަށް ޖަހައިލިއެވެ. އަދި މާފު ކުރާށޭ ބުނާ މައުނަވީ ބެލުމަކުން އަނބިމީހާއަށް ބަލައިލިއެވެ.
ދަރިފުޅު އެތަނުން ދާން ހިނގައި ގަތުމުން ބައްޕަ އިތުރަށް ބުންޏެވެ. ދަރިފުޅާއެވެ. މިއަދު ދަރިފުޅު ތިޔަ އަނިޔާވެރި ވަނީ މާދަމާ ދަރިފުޅަށް ލިބޭ ދަރިންގެ މަންމައަށެވެ. ދަރިފުޅު ތިޔަ ދިރިއުޅުމުގައި އުޅެން ބޭނުން ނުވާނަމަ އޭނާ އަށް އަނިޔާވެރިނުވެ މިނިވަން ކުރާށެވެ. އެކަމަކު ދަރިފުޅު ގޮތެއް ނިންމުގެ ކުރިން ބައްޕަ އަދި އެއް ސުވާލު ދަރިފުޅާ ކުރަން ބޭނުމެވެ. ދަރިފުޅުގެ ކުރިމަތީގައި ތި ހުރި ދަރިފުޅުގެ މަންމައަކީ ބައްޕަ ކޮންތާކުން ކިހިނެއް ހޯދި މީހެއްކަން ދަރިފުޅަށް އެނގޭ ހެއްޔެވެ؟
ޖަވާބުގައި ދަރިފުޅު ނޭނގެޔޭ ބުނާ ކަހަލަ ގޮތަކަށް ބޯ ހޫރާލިއެވެ. ދެން ބައްޕަ ބުންޏެވެ. ދަރިފުޅާއެވެ. އަޑު އަހާށެވެ. ދަރިފުޅު މަންމައަކީ އެހެން މީހެއްގެ އަނިޔާގެ ޝިކާރައަކަށްވި މީހެކެވެ. އަނިޔާ ކޮށްފައި މީހަކު ބޭނުން ނެތިގެން މަގުމައްޗަށް އެއްލައިލި ޖަވާހިރެކެވެ. ބައްޕަގެ މި ޖުމްލަތަކުން ދަރިފުޅަށް އެހެން ދުނިޔެއަކަށް ހޭލެވުނު ފަދައެވެ. މަންޒަރު ބަލަން ހުރި އަނބިމީހާ ގައިގައި ބައްދާލާފައި މާފަށް އެދުނެވެ. މި މަންޒަރު ފެނި އެ ދަރިފުޅުގެ މައިންބަފައިންގެ ލޮލުން ކަރުނަ ފާއްދާލިއެވެ.
ދަރިންނަށް ހެދޭ ގޯސްތައް ބުނެދީ އެދަރިން ހަމަ މަގަށް އަޅުވަން މަސައްކަތް ކުރާށެވެ. ދަރިންގެ ދިރިއުޅުމުގެ ތެރެއަށް ވަދެ އެ ދިރިއުޅުން ހަލާކު ނުކޮށް ދަރިންގެ ދިރިއުޅުން އާރާސްތު ކޮށްދޭ ބަޔަކަށް މައިންބަފައިން ވާށެވެ.
