އަމާޒަކީ ކޮންގްރެސް ނިމުމުގެ ކުރިން ޕީއެންސީގެ ދަފްތަރު 80،000 އަށް އެރުވުން: ފަލާޙް

ޕާޓީގެ މެންބަރުންގެ އަދަދު 79،000 އަށްވުރެ މައްޗަށް ގޮސްފައިވާކަން ހާމަކުރައްވައި، ކޮންގްރެސްގެ ނިޔަލަށް 80،000 މެންބަރުން ހަމަކުރުމަށް އަމާޒު ހިފާފައިވާ ކަމަށް ޕީއެންސީގެ ޕާލަމެންޓަރީ ގްރޫޕުގެ ލީޑަރު އިބްރާހީމް ފަލާޙު ވިދާޅުވެއްޖެއެވެ.

ޕީއެންސީގެ މަތީ މަޖިލިސް ހުޅުވުމަށް ރޭ ބޭއްވި ރަސްމިއްޔާތުގައި ވާހަކަދައްކަވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތް ދުވަސްވަރު ޕީއެންސީގައި ތިބީ އެންމެ ތިންހާހެއްހާ މެންބަރުންކަން ފާހަގަކުރައްވަމުން ފަލާޙު ވިދާޅުވީ، ފާއިތުވި ދެ އަހަރާއި ބައިގެ މުއްދަތުގެ ތެރޭގައި ޕާޓީއަށް ބޮޑު ކުރިއެރުމެއް ލިބިފައިވާ ކަމަށެވެ. މިވަގުތާ ހަމައަށް ޕާޓީގެ ދަފުތަރުގައި 79،364 މެންބަރުން ރަޖިސްޓްރީވެފައިވާކަން އޭނާ ކަށަވަރުކޮށްދެއްވިއެވެ. އަދި ކުރިއަށް އޮތް ތިން ދުވަހުގެ ތެރޭގައި ކޮންގްރެސްގެ ހަރަކާތްތައް ނިމިގެންދާއިރު، އަށްޑިހަ ހާހުގެ ލަނޑުދަނޑި ހާސިލުކުރެވޭނެ ކަމުގެ ފުރިހަމަ ޔަގީންކަން އެބައޮތް ކަމަށްވެސް އޭނާ ވިދާޅުވިއެވެ.

ރާއްޖޭގެ ސިޔާސީ މަސްރަޙަށް އަލިއަޅުވާލައްވަމުން ފަލާޙު ވިދާޅުވި ގޮތުގައި، 2008ވަނަ އަހަރުން ފެށިގެން ދިވެހިރާއްޖޭގެ ވެރިކަން ފުރޮޅެމުން އަންނަނީ މައިގަނޑު ދެ ފިކުރެއްގެ މެދުގައެވެ. އާންމު ރައްޔިތުން ސިޔާސީ ޕާޓީތަކާ ގުޅެނީ ހަމައެކަނި ނަމަކަށް ނޫންކަމާއި، އެއީ ޕާޓީތަކުގެ ލީޑަރޝިޕްގެ ތަސައްވުރާއި، ޤައުމުގެ މުސްތަޤުބަލާމެދު ގެންގުޅޭ ވިސްނުމަށް ބިނާކޮށް ނިންމާ ނިންމުމެއްކަން އޭނާ ފާހަގަކުރެއްވިއެވެ.

މީގެ އިތުރުން، ރިޔާސީ އިންތިޚާބުތަކުގައި ޕާޓީތަކުން ހުށަހަޅާ މެނިފެސްޓޯތައް ތަންފީޒުކުރާ މިންވަރާއި، ޤައުމުގެ ތަރައްޤީއަށްޓަކައި ސަރުކާރުން ކުރާ މަސައްކަތްތައް ރައްޔިތުން ވަރަށް ގާތުން މޮނިޓަރކުރަމުން ގެންދާކަން ވެސް ފަލާޙުގެ ވާހަކަފުޅުގައި ބަޔާންކުރެއްވިއެވެ.