ގްރޭޓަރ މާލެ އިންޑަސްޓްރިއަލް ޒޯންގެ ކުރީގެ އެމްޑީ އަށް ތޫނު އެއްޗަކުން ހަމަލާދީފި
ގްރޭޓާރ މާލެ އިންޑަސްޓްރިއަލް ޒޯންގެ ކުރީގެ މެނޭޖިންގ ޑިރެކްޓަރ އަދި އެމްޑީޕީގެ މާމިގިލި ދާއިރާގެ ރައީސް އިބްރާހީމް ރަޝީދު (މާމިގިލި އިބޫ) އަށް ތޫނު އެއްޗަކުން ހަމަލާ ދީފިއެވެ.
ފުލުހުންގެ މީޑިއާ އޮފިޝަލަކު ވިދާޅުވީ ތޫނު އެއްޗަކުން ލިބިފައިވާ ޒަހަމްތަކަކާއެކު އޭޑީކޭ އަށް މީހަކު ފަރުވާ ހޯދަން ގޮސްފައިވާ ކަމަށް އެހޮސްޕިޓަލުން ރޭ 22:51 ކަންހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.
އޮންލައިން ނޫސް "ފެށުން" ގައި ބުނެފައިވަނީ ތޫނު އެއްޗަކުން ހަމަލާދީ ޒަހަމް ކޮށްލާފައިވަނީ ކުރީގެ ގްރޭޓާރ މާލެ އިންޑަސްޓްރިއަލް ޒޯންގެ އެމްޑީ، މާމިގިލި އިބޫ ކަން އެނޫހަށް އެނގިފައިވާ ކަމަށެވެ. އަދި ހަމަލާދީފައި ވަނީ އިބޫގެ ކޮނޑު ކަށިގަނޑާއި މޭ އާއި ދޭތެރެއަށް ކަމަށް ވެސް މައުލޫމާތު ލިބެއެވެ.
މާމިގިލި އިބޫއަށް ހަމަލާ ދީފައިވަނީ ކަށިމާހިނގުމުގައި ހުންނަ އޭނާ ދިރިއުޅެމުންދާ ގެއަށް ވަންނަން ދަނިކޮށް ކަމަށް ވެސް އެނގިފައިވެއެވެ.
