ތިބާގެ މާޒީއަކީ ދިރިއުޅުމުގައި ކުރިއަށް ދިއުމަށް އޮތް ހުރަހެއް ނޫން!
މާޒީގައި ވެފައިވާ ކަންކަމާއި މެދު ވިސްނާފައި އެކަމާއި މެދު ހިތާމަ ކުރުމަކީ އާންމު ކަމެކެވެ. އެހެން ނަމަވެސް އެކަމުން އަރައިނުގަނެވޭނެ ކަމީ ގަބޫލު ކުރެވޭ ކަމެއް ނޫނެވެ. އެކަމުން އަރައިގަތުމަށް އެކި މީހުންގެ އެހީތެރިކަން ހޯދިދާނެއެވެ. މިސާލަކަށް ތިމާ އެކަމުން ސަލާމަތް ވުމަށް ގާތް އެކުވެރިއެއްގެ އެހީތެރިކަން ހޯދިދާނެއެވެ.
އެންމެ ފުރަތަމަ ކަމަކަށް "ނުވާނޭ" ނުވަތަ "ނުވިއޭ" މި މޭރުމުން ވިސްނުން ދޫކޮށްލާށެވެ. އަދި ކޮންމެ ކަމަކީ ވެސް ވާނެ ކަމެއް ކަމަށް ދެކިގެން މަސައްކަތް ކުރާށެވެ. ފައްސި ވިސްނުމެއް ހުރިހާ ކަމެއްގައި ވެސް ގެންގުޅެން އާދަ ކުރާށެވެ. މާޒީން އަރައިގަތުމަކީ މާ ފަސޭހަ ކަަމެއް ނޫނެވެ. އެހެން ނަމަވެސް ނުވާނޭ ކަމެއްވެސް ނޫނެވެ. ކުޑަ ހިތްވަރަކާއި އެކު މަސައްކަތް ކޮށްލާށެވެ.
ދިރިއުޅުުގައި ހުރިހާ އުފަލެއް ނުލިބޭނެއެވެ. ބައެއް ކަންކަމަކީ ކިތަންމެ ބޭނުންވިޔަސް، ތިމާގެ ސަލާމަތާއި ތިމާގެ ލާބައަށްޓަކައި ނުކޮށް ދޫކޮށްލަން ޖެހޭ ކަންކަމެވެ. އެފަދަ ކަންކަމުން މިންޖު ނުވާނަމަ ތިމާގެ މާޒީގެ އެ ކަޅު ހަނދާންތައް އަބަދުމެ ތިބާގެ ހިތުގައި ބިންވަޅު ނެގިފައިވާނެއެވެ. އެކަމުން މިންޖުވާން ބޭނުންވެ އެހެންނަމަވެސް އެކަމުން މިންޖު ވާން އެއްވެސް މަސައްކަތެއް ނުކުރަނީނަމަ މާޒީގެ ކަނޑުގައި ތިބާ ޣަރަގުވަނީ ހަމަ އަމިއްލަ އަށެވެ.
އެހެން މީހުނަށް ދެވޭނީ ނަސޭހަތެވެ. އެނަސޭހަތް ގަބޫލުކޮށް ތިމާގެ ދިރިއުޅުން އެއަށް ވުރެ ފުރިހަމަ ކުރަން އިތުރަށް މަސައްކަތް ކުރުމަކީ ތިބާ އަމިއްލައަށް ކުރަން ޖެހޭ މަސައްކަތެކެވެ. އެހީތެރިވެދޭނެ މީހުން އަބަދުވެސް ގާތުގައި ވާނެއެވެ. އެއްވެސް ކަމަކީ ހައްލެއް ނުވާ ކަމެއް ނޫނެވެ. ދިރިއުޅުމަކީ މިއީއެވެ. އެކިކަހަލަ އަޑިގުޑަންތައްވެސް ކުރިމަތިވާނެއެވެ. އެކަންކަމާއި ތިމާ ކުރިމަތިލާން ވާނީ ނިކަން ކެރިހުރެއެވެ. އެއްވެސް ޖެހިލުމެއް ނުވާ ހާލުއެވެ. އެހެން ކަންތައް ކުރުމުގެ ސަބަބުން ދެން ތިމާއާއި ކުރިމަތިވާ ހުރިހާ ގޮންޖެހުން ތަކަކާއި ކުރިމަތިލާން އެއްވެސް ފަހެއް ނުޖެހޭނެއެވެ.
