އިނގެރޭސިވިލާތުގައި ޞިއްހީ އެހީތެރިންގެ ރައްކާތެރިކަމުގެ ސާމާނު ހުސްވަނީ!

ތުރުކީވިލާތުން އިނގެރޭސި ވިލާތައް ގެންދިޔުމަށް ހަމަޖެހިފައިވާ 84 ޓަނުގެ، ޞިއްޙީއެހީތެރިންގެ ރައްކާތެރިކަމުގެ ސާމާނު ލަސްވުމާއި ގުޅިގެން، ބަލިމީހުނަށް ފަރުވާދިނުމުގައި ބޮޑެތި ގޮންޖެހުންތައް އަންނަނީ ކުރިމަތިވަމުންނެވެ.

އެގޮތުން ފުރިހަމަ ރައްކާތެރިކަމުގެ އާލާތް ބޭނުން ނުކޮށް ބަލިމީހުނަށް ފަރުވާ ދޭން ޖެހުމުން، އިސް ސަފުގައި މަސައްކަތްކުރާ ސިއްޙީ އެހީތެރިންގެ ތެރެއިން 80 އަށް ވުރެ ގިނަ މީހުންނަށް ކޮވިޑް-19 ޖެހިގެން ވަނީ މަރުވެފައެވެ. މީގެތެރޭގައި ހިތުގެ އޮޕެރޭޝަނަށް ޚާއްސަ ޑޮކްޓަރުންނާއި، ނަރުހުންނާއި، ތަކެތި އުފުލުގައި އެހީތެރިވާ މީހުންގެ އިތުރުން ހިލޭސާބަހަށް މަސައްކަތްކޮށްދޭ މީހުންވެސް ހިމެނެއެވެ.

އަމިއްލަ ނަފްސު ނުރައްކަލަށް ލައިގެން ބަލިމީހުނަށް ފަރުވާ ނުދެވޭނެކަން އަންގާ ޑޮކްޓަރުން އަންނަނީ އިންޒާރު ދެމުންނެވެ. ތުރުކީ އިން އަންނަ ޝިޕްމަންޓް މިއަދު އިތުރަށް ލަސްވެއްޖެނަމަ ދެން ބަލިމީހުނަށް ފަރުވާދިނުމަށް ޑޮކްޓަރުން ބޭނުންކުރާ ސަލާމާތީ އާލާތް އެއްކޮށް ހުސްވާނެއެވެ. މީގެ ތެރޭގައި ޑޮކްޓަރުން 400،000 ގައުންވެސް ހިމެނެއެވެ. އެހިސާބުން ޑޮކްޓަރުންނަށް އޮންނާނީ ދެގޮތެކެވެ. ރައްކާތެރިކަމަކާއި ނުލާ ބަލިމީހާއާއި ކައިރިވެގެން ފަރުވާ ދިނުން ނޫނީ ބަލީމީހާ މަރުވާން ދޫކޮށްލުމެވެ.