އިމްރާން މާފުށީ ޖަލަށް ޒިޔާރަތް ކުރައްވައި ގައިދީންނާ ބައްދަލު ކުރައްވައިފި
ހޯމް މިނިސްޓަރު އިމްރާން އަބްދުﷲ، މާފުށީ ޖަލަށް ޒިޔާރަތް ކުރައްވައި، ހައި ސެކިއުރިޓީ ޔުނިޓްތަކުގައި ތިބި ގައިދީންނާ ބައްދަލު ކުރައްވައިފިއެވެ.
ކަރެކްޝަންސް އިން ބުނީ މިނިސްޓަރުގެ ޒިޔާރަތުގައި ހައި ސެކިއުރިޓީ ޔުނިޓްތަކުގެ ކަންތައްތައް ބައްލަވާލައްވާފައިވާ ކަމަށެވެ. އަދި ހައި ސެކިއުރިޓީ ގޮޅިތަކަށް ވަކި ވަކިން ޒިޔާރަތް ކުރައްވައި، އެ ގޮޅިތަކުގައި ތިބި ގައިދީންގެ ކަންބޮޑުވުންތައް އައްސަވާފައިވާ ކަމަށެވެ.
މިނިސްޓަރު އިމްރާން މިއަދު ޖަލަށް ވަޑައިގަތީ، މޯލްޑިވްސް ކަރެކްޝަނަލް ސާވިސްގެ ހިދުމަތްތައް އޮންލައިންކޮށް ފޯރުކޮށްދޭ ޕޯޓަލްގެ ޓަރައިލް ވާޝަން ތައާރަފް ކޮށްދެއްވުމަށެވެ.
މޯލްޑިވްސް ކަރެކްޝަނަލް ސާވިސްގެ އީ-ސާވިސް ޕޯޓަލް "އެޓަމްސް" ލޯންޗް ކުރުމަށް މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން މިނިސްޓަރ ވަނީ ގައިދީން ރިހިބިލިޓޭޓްކޮށް އަނބުރާ މުޖްތަމައުއަށް ނެރުމަށް ގައިދީންގެ އާއިލާތަކުގެ އެހީތެރިކަން ބޭނުން ވާނެ ކަމަށް ވިދާޅުވެފައެވެ.
އެޓަމްސް އީ-ސާވިސް ޕޯޓަލްއަކީ ކަރެކްޝަނަލް ސާވިސްއިން އާންމު ރައްޔިތުންނަށް ދެމުންގެންދާ ހިދުމަތްތައް ފަސޭހަކަމާއެކު ފޯރުކޮށްދިނުމަށް ތައްޔާރު ކޮށްފައިވާ އޮންލައިން ޕޯޓަލްއެކެވެ.
