އިންޑިޔާއިން 2.8 މިލިއަން ގުޅަ ހައިޑްރޮސިކްލޮރޮކުއިން 25 ގައުމަކަށް ހަދިޔާކޮށްފި
ކޮވިޑް-19 އަށް ފަރުވާކުރުމަށް ބޭނުން ކުރެވިދާނެކަމަށް ގިނަ ބަޔަކު ގަބޫލު ކުރާ އަދި މެލޭރިޔާއަށް ފަރުވާ ކުރުމަށް ބޭނުންކުރާ ބޭހެއް ކަމަށްވާ ހައިޑްރޮސިކްލޮރޮކުއިންގެ 2.8 މިލިއަން ގުޅަ އިންޑިޔާއިން އެކި ގައުމުތަކަށް ފޮނުވައިފިއެވެ.
ދުނިޔޭގައި އެންމެ ގިނައިން މި ބޭސް އުފައްދާ ގައުމު ކަމަށްވާ އިންޑިޔާއިން ވަނީ 1.9 މިލިއަން ގުޅަ ޕެރެސެޓްމޯލްވެސް އެކި ގައުމުތަކަށް ފޮނުވާފައެވެ. މިއީ ގައުމުތަކުން ކޮވިޑް-19 އާ ހަނގުރާމަ ކުރުމަށް ދެވޭ ހިލޭ އެހީއެކެވެ.
މީގެ އިތުރުން 87 ގައުމަކަށް އިންޑިޔާއިން ވަނީ ހައިޑްރޮސިކްލޮރޮކުއިން އަދި ޕެރެސެޓްމޯލް ވިއްކާފައެވެ. ކޮރޯނާވައިރަސް އާއި އެކު ޑިމާންޑް ބޮޑުވެގެންދިޔަ މި ދެ ބޭސް ހޯދުމަށް ގިނަގައުމުތަކުން ދަނީ އިންޑިޔާގެ އެހީއަށް އެދެމުންނެވެ. އެގޮތުން އެމެރިކާ އިން ހައިޑްރޮސިކްލޮރޮކުއިންގެ ހަތަރު މިލިއަން ގުޅައަށް އޯޑަރު ކުރުމުން އިންޑިޔާއިން ދޭން އެއްބަސްވެފައިވަނީ 3.5 މިލިއަން ގުޅައެވެ.
ނިއުސް އޭޖެންސީ، އޭ.އެން.އައިގެ ރިޕޯޓް ބުނާގޮތުން މިހާތަނަށް، ބަނގްލަދޭޝްއަށް 2 މިލިއަން، ނޭޕާލަށް 1 މިލިއަން، ބޫޓާނަށް 2 ލައްކަ، ސްރީލަންކާއަށް 1 މިލިއަން، އަފްޣާނިސްތާނަށް 5 ލައްކަ އަދި ދިވެހިރާއްޖެއަށް 2 ލައްކަ ގުޅަ ހައިޑްރޮސިކްލޮރޮކުއިން އިންޑިޔާއިން ވަނީ ފޮނުވާފައެވެ. އިންޑިޔާއިން މި ބޭސް ފޮނުވުމަށް ހަމަޖެހިފައިވާ ލިސްޓްގައި ދެން ހިމެނެނީ ސްޕެއިން، ޖަރުމަން، ބަހްރައިން، ބްރެޒިލް އަދި އިޒްރޭލް އެވެ.
