ސިދްރަތުﷲގެ ޕޯސްޓްމޯޓަމް ރިޕޯޓު އާއިލާއިން ގަބޫލެއް ނުކުރި

އައިޖީއެމްއެޗް ބޭރު ސަރަޙައްދުން މޫދުން ނިޔާވެފައި އޮއްވާ ފެނުނު މުޙައްމަދު ސިދުރަތުﷲ ގެ ޕޯސްޓުމޯޓަމް ރިޕޯޓު ގަބޫލު ކުރުމަށް އާއިލާއިން ދެކޮޅު ހަދައިފިއެވެ.

Ads by STELCO

ސިދުރަތުﷲ ގެ މަންމަ ޝީރީން ޝިހާބުއާ ހަވާލާދީ އޮންލައިން ނޫހެއް ކަމަށްވާ "އަވަސް"ގައި ރިޕޯޓުކޮށްފައިވާ ގޮތުގައި އާއިލާއިން ޕޯސްޓުމޯޓަމް ރިޕޯޓު ގަބޫލުކުރުމަށް ދެކޮޅު ހަދައެވެ.

"ސިދޫ އަކީ މަސްތުވާތަކެތި ބޭނުންކުރާ މީހެއްކަން އަޅުގަނޑުމެންނަކަށް ނޭނގޭ. ޕޯސްޓްމޯޓަމް ރިޕޯޓުގައި ހުރީ ހުސް ދޮގު!" ސިދްރަތުﷲގެ މަންމަ ބުނެފައިވެއެވެ.

އޭނާ އިތުރަށް ބުނީ ޕޯސްޓުމޯޓަމް ރިޕޯޓުގައި ސިދްރަތުﷲ މަރުވީ ގެނބިގެންނޭ އޮތް ކަމުގައި ވިޔަސް ސިދްރަތުﷲގެ ހަށިގަނޑުން އޭނާ މަރުވި ކަމުގެ އެއްވެސް އަލާމާތެއް ފެންނަން ނެތް ކަމަށެވެ.

އަދި ބަނޑު އެއްކޮށް ހިނދި ބަނޑުގެ ތިރިން ބޮޑުބައެއް ނޫފައިގެންފައިވާ ކަމަށާއި ފުރަގަހުން ވަރަށް ބާރަށް މީހަކު ހިފާފަ ހުރި ކަމުގެ ނިޝާނާއި އުނގަނޑުން ތިރީގައި އެއްޗެއް އައްސާފަ ހުރި ކަމުގެ ނިޝާން ވެސް ސިދްރަތުﷲގެ ހަށިގަނޑުން ފެންނަން ހުރި ކަމަށެވެ.

ޕޯސްޓްމޯޓަމްގެ ޕްރިލިމިނަރީ ރިޕޯޓުގައި، އޭނާ ނިޔާވީ ގެނބިގެން ކަމަށް ފާހަގަކޮށްފައި ވެއެވެ. އަދި ސިދުރަތުﷲ ގެ ހަށިގަނޑުގައި ހުރި ޒަޚަމްތަކަކީ މޫދުގައި ހަށިގަނޑު އޮތްއިރު އެއްޗެއް ކައިފައިވުމުގެ ސަބަބުން ލިބިފައިހުރި ޒަޚަމެއް ކަމަށް ބެލެވޭ ކަމަށް ވެސް ޕޯސްޓްމޯޓަމް ހެދި ފަރާތުން ފުލުހުންނަަށް މައުލޫމާތު ދީފައިވެއެވެ.

މީގެއިތުރުން ފުލުހުން ވިދާޅުވެފައި ވަނީ މިމައްސަލައާއި ގުޅިގެން ހެދި ތަހުލީލުތަކުން ސިދުރަތުﷲ މަސްތުވާތަކެއްޗަށް ޕޮޒިޓިވްކަން އެނގިފައިވާ ކަމަށާއި ޕޯސްޓްމޯޓަމްއާ ގުޅިގެން ހަދާ އިތުރު ތަހުލީލުތައް ރާއްޖެއިން ބޭރުން ކުރިއަށްދާ ކަމަށެވެ.