އެމްޑީއެންގެ މައްސަލައިގައި ޑރ.އިޔާޒަށް ޝައިޚް ސައުދާން ރައްދު ދެއްވައިފި
މި ސަރުކާރުން ދީނީ އިލްމުވެރީންގެ އަޑުއައްސަވާކަމަށް ވިދާޅުވެ ، ލާދީނީ ރިޕޯޓް ނެރުނު އެމްޑީއެންއަށް ފިޔަވަޅު އެޅުމުގައި ސަރުކާރުގެ އެއްބާރުލުން ލިބޭ ކަމަށް ދޭހަވާ މޭރުމަކުން ދީނީ އިލްމުވެރިޔާ ޑރ.މުޙައްމަދު އިޔާޟް ޢަބުދުއްލަތީފް ވިދާޅުވުމުން އެކަމަށް ޝައިޚް ޢަބުދުﷲ ސަޢުދާން ރައްދު ދެއްވައިފިއެވެ.
ޑރ.އިޔާޒު ކުރެއްވި ޓްވީޓެއްގައި ވިދާޅުވެފައި ވަނީ މި ސަރުކާރުން ދީނީ ޢިލްމްވެރިންނަށް ފުރިހަމަ ބާރު ވަނީ ދެއްވާފައި ކަމަށެވެ. އަދި 20 ވަރަކަށް ޢިލްމްވެރިން ރައީސުލް ޖުމްހޫރިއްޔާއާ ބައްދަލުކުރަން އެދުމުން ވަގުތުން ފުރުސަތު ދެއްވި ކަމަށެވެ.
"ކަންބޮޑުވުންތައް އަޑު އައްސަވާ ހައްލު ހޯއްދަވައި ދެއްވާނެ ކަމުގެ ޔަގީންކަން ދެއްވި ، ނައިބު ރައީސް ފައިސަލް ދޭތެރެއަކުން ޢިލްމްވެރިންނަށް ގުޅުއްވާ"އިޔާޒް ވިދާޅުވެފައި ވެއެވެ.
އިޔާޒުގެ މި ވާހަކަފުޅަށް ރައްދު ދެއްވާ ސަޢުދާން ވިދާޅުވީ އެމްޑީއެން މައްސަލައިގައި ހައްލު ހޯދައި ދެއްވާނެ ކަމުގެ ޔަގީންކަން ވެސް ދިން ކަމަށާއި އޭގެ ފަހުން އެމްޑީއެން އަދިވެސް ދަނީ "ބާރަށް ބާރަށް ކުރިއަށް ކުރިއަށް" ކަމަށެވެ.
"ތެދެއްމެ! އަޅުގަނޑުމެން ބައްދަލުކުރީ އެމްޑީއެން މައްސަލައިގައި ކަންބޮޑުވުންތައް އެދުވަހު އަޑުއައްސަވާފަ، ހައްލު ހޯދައިދެއްވާނެ ކަމުގެ ޔަގީންކަން ދިން ، އޭގެ ފަހުން އެއް އަހަރު މިވަނީ ، އެމްޑީއެން އަދި ވެސް ދަނީ ފަސްވަނަ ގިޔަރުގަ އެމީހުންގެ ކަންކަމުގަ ބާރަށް ބާރަށް ކުރިއަށް ކުރިއަށް ، މިޔާއެކު ނައިބު ރައީސް (ފައިސަލް) ގުޅުއްވަނީ ވަކި ބަޔަކަށްހެން ހީވަނީ" ސައުދާން ވިދާޅުވެފައި ވެއެވެ.
