"މިސް އިންޑިއާ" އަށް ހޮވުނުއިރު ސުޝްމީތާ ލައިގެން ހުރި ހެދުމުގެ ހަގީގަތް އެނގިއްޖެނަމަ ހައިރާންވާނެ
ނިއުދިއްލީ: 1994 ވަނަ އަހަރު "މިސް އިންޑިއާ" ކަމުގެ ޝަރަފުވެރި ތާޖު އެޅި ބޮލީވުޑް އެކްޓްރެސް ސުޝްމީތާ ސެން ވަނީ އެރޭ އޭނާ ލައިގެން ހުރި ހެދުމާއި ބެހޭ ގޮތުން ކުރިން ނޭނގޭ ބައެއް ކަންކަން ހާމަ ކޮށްފައެވެ.
އެރެއަކީ ވަރަށް ވެސް ބޮޑު ހަފްލާއަކަށް ވެފައި، އެންމެން ވެސް އެ ހަފްލާއަށް ދިޔައީ ވަރަށް ޒީނަތްތެރިވެ، އަގުބޮޑެތި ހެދުން ލައިގެން ކަމާއިމެދު އެއްވެސް ޝައްކެއް ނެތެވެ.
ނަމަވެސް ސުޝްމީތާގެ ވާހަކަ ތަފާތެވެ. ޓީވީ ޝޯއެއްގައި ބައިވެރިވެ، މިސް ޔުނިވާސް މުބާރާތުގައި ބައިވެރިވުމަށް އޭނާއަށް މަގުފަހިވި ގޮތް ކިޔައިދެމުން ސުޝްމީތާ ބުނީ، އެންމެ ފުރަތަމަ ހޮވުނީ މިސް އިންޑިއާ ކަމުގެ މަގާމު ކަމަށެވެ.
"އަހަންނަކީ އާދައިގެ މިޑްލް ކްލާސް އާއިލާއަކުން އައިސްފައިވާ މީހެއް. މިސް އިންޑިއާ މުބާރާތުގައި ބައިވެރިވާން ހޮވި، ފައިނަލާއި ހަމައަށް ވެސް ދިޔަކަމުގެ ވާހަކައާއި އެރޭ ދާން ޖެހޭ ވާހަކަ އަހަރެން އެންމެ ފުރަތަމަ ބުނީ އަހަރެންގެ މަންމަ ކައިރީގައި. އެންމެން ވެސް އެރޭ ލައިގެން ދާނީ ޑިޒައިނަރ ހެދުން ކަމަށް ވެފައި، އަހަރުމެންގެ އެފެންވަރު ނެތުމުން އަހަރެން ހާސްވި. އެކަމަކު މަންމަ އަހަންނަށް ހިތްވަރުދިން. އާދައިގެ ކަޅު ފޮތިކޮޅެއް ގަނެފައި މަންމަ އެހެދުން ފަހަން ހަވާލު ކުރީ އަހަރުމެން އެއިރު ދިރިއުޅުނު އިމާރާތުގެ ތިރީގައި އުޅޭ ހެދުން ފަހާ މީހަކާ. އެމީހާ ކައިރީގައި މަންމަ ބުނި އަހަރެން ޓީވީން ދައްކާނޭ ،އެހެންވީމަ ވަރަށް ރީތިކޮށް ފަހައި ދޭން އެދުނު. އެހެދުމުގެ ބާކީ ފޮތިން ފިނިފެންމަލެއް ހަދާފައި މަންމަ އެހެދުމުގެ މޭމައްޗާއި ދިމާލުގައި ހަރުކުރި. އަދި ކަޅު ކުލައިގެ އާދައިގެ އިސްޓާކީނެއް ގަނެފައި އޭތި ކަފާލާފައި، އަތުގައި އަޅުވާގޮތަށް އިލާސްޓިކް ކޮޅެއް ވެސް ހަރުކުރި. އެހެންވީ އަހަންނަށް ކާމިޔާބީ ލިބުނު ހެދުމަށް" ސުޝްމީތާ ކިޔައިދިނެވެ.
ސުޝްމީތާ ބުނީ އެރޭ އޭނަ ލައިގެން ހުރީ އާދައިގެ ހެދުމެއް ކަމުގައިވިޔަސް، ވަރަށް އަގުހުރި ފިލާވަޅެއް އޭނަގެ މަންމަގެ ފަރާތުން ދަސްވި ކަމަށެވެ.
"އެރޭ ލާނެ އަގުބޮޑު ހެދުމެއް ނެތިގެން އަހަރެން ކަންބޮޑުވީމަ މަންމަ ބުނީ، އަޅާނުލާށޭ. މީހުން އަންނަނީ އަހަރެން ދެކެންށޭ، ހެދުން ބަލާކަށް ނޫނޭ. އެފަދަ މަޤާމެއް ހާސިލު ކުރުމަށް އަހަރެންގެ ވިސްނުމާއި، އުޅުން ހުރި ގޮތް ބަލާށޭ" ސުޝްމީތާ ބުންޏެވެ.
Ads by STO
