ކޮވިޑް-19 ރާއްޖެއިން ފިލައިގެނެއް އަދި ނުދޭ: އެޗްއީއޯސީ
ރާއްޖެއިން ކޮވިޑް-19 އަދި ފިލައިގެން ނުދާ ކަމަށާއި ކުރިން ކަންތައް ކުރިއަށް ގެންދިޔަ ގޮތަށް އޮފީސްތަކުގެ މަސައްކަތްތައް އަދި ނުރޭވުމަށް ހެލްތު އިމަޖެންސީ އޮޕަރޭޝަން ސެންޓަރ (އެޗްއީއޯސީ) އިން އިލްތިމާސް ކޮށްފިއެވެ.
ސާވެލެންސް ޑޭޓާއަށް ބަލާއިރު، މިފަހަކަށް އައިސް ރާއްޖޭގައި ކޮވިޑް-19 ފެތުރުނު މިންވަރު ދަށަށް ގޮސްފައިވީ ނަމަވެސް، އިއްޔެއާއި މިއަދު އެއަދަދުތައް މިވަނީ 30 އިން މައްޗަށް އަރާފައެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެޗްއީއޯސީ ގެ ތަރުޖަމާނު ޑރ. ނަޒްލާ ރަފީޤް ވިދާޅުވީ ފާއިތުވި 3-2 ހަފްތާ އާއި އަޅާބަލާއިރު ފްލޫ ކްލިނިކްތަކުން ފައްސިވާ މީހުންގެ އަދަދު އިތުރުވާން ފަށާފައިވާ ކަމަށެވެ.
"ކޭސްތަކުގެ އަދަދު ކޮންމެވެސް ވަރަކަށް މިދޭތެރެއިން މަދުވެގެން ދިޔަ ނަމަވެސް މިގޮތަށް ފްލޫކްލިނިކް ޕޮޒިޓިވިޓީ މައްޗަށް ދަންޏާ މިއީ އަޅުގަނޑުމެން ވަރަށް ސަމާލުވާންޖެހޭ ކަމެއް. މިހާރު މި ދެމުންދާ ދޫތަކާއެކު އަނެއްކާ ވެސް ޕޮޒިޓިވިޓީ އިތުރުވުމުގެ ފުރުސަތު އޮންނާނެ އަބަދުވެސް އަޅުގަނޑުމެން މި ދައްކާގޮތަށް ރައްކާތެރިކަމުގެ ފިޔަވަޅުތަކާ، ގައިޑްލައިންތަކުގައިވާ ގޮތަށް ކަންތައްތައް ނުގެންދެވޭނަމަ،" ޑރ. ނަޒްލާ ވިދާޅުވެފައިވެއެވެ.
ޑރ. ނަޒްލާ ވިދާޅުވީ ކޮންމެ އިރަކުވެސް ކޭސްތައް އިތުރުވެދާނެ ކަމަށާއި މަސައްކަތުގެ ސައިޓްތަކާއި އޮފީސްތައް އަދި ސްކޫލުތަކާއި މެޑިކަލް ހިދުމަތްދޭ ތަންތައް މޮނީޓާ ކުރުމުގެ މަސައްކަތްތައް ކުރަމުންދާ ކަމަށެވެ.
"އެގޮތުން ސަރުކާރުގެ 133 އޮފީހަކާއި 42 ޕްރައިވެޓް އޮފީސް އަދި 20 ސްކޫލު/ކޮލެޖާއި 35 މެޑިކަލް ހިދުމަތްދޭ ތަންތަން އިންސްޕެކްޓު ކޮށްފައިވޭ" ޑރ. ނަޒްލާ ވިދާޅުވިއެވެ.
