ކޮވިޑް-19 އާ ގުޅިގެން ދައުލަތުން ކުރި ހަރަދުތައް 2.6 ބިލިއަނަށް

ކޮވިޑް-19 ބަލިމަޑުކަމާ ގުޅިގެން ދައުލަތުން ކުރި ހަރަދުތައް 2.6 ބިލިއަން ރުފިޔާއަށް އަރާފައިވާ ކަމަށް ތަފާސް ހިސާބުތަކުން ދައްކައިފިއެވެ.

Ads by STELCO

ފިނޭންސް މިނިސްޓްރީން އެންމެ ފަހުން އާންމުކުރި ތަފާސް ހިސާބުތަކަށް ބަލާއިރު، މިމަހުގެ 19 އާ ހަމައަށް ސިއްހީ އަދި އިޖުތިމާއީ ކަންކަމަށް ވަނީ 1.32 ބިލިއަން ރުފިޔާ ހަރަދުކޮށްފައެވެ. އަދި އިގުތިސޯދީ ކަންކަމަށް ވަނީ 1.36 ބިލިއަން ރުފިޔާ ހޭދަކޮށްފައެވެ.

މީގެ ތެރެއިން އެންމެ ބޮޑު ޚަރަދެއް ކޮށްފައިވަނީ ނެޝަނަލް ޑިޒާޒްޓާ މެނޭޖްމެންޓު އޮތޯރިޓީއަށެވެ. އެ އޮތޯރިޓީއަށް ވަނީ 787.8 މިލިއަން ރުފިޔާ ހޭދަކޮށްފައެވެ. ދެން އެންމެ ގިނަ ހަރަދު ހިނގި ހެލްތް މިނިސްޓްރީ އިން ވަނީ މިދިޔަ ހަފްތާގައި 203.8 މިލިއަން ރުފިޔާ ހޭދަކޮށްފައެވެ.

މީގެ އިތުރުން ވެސް ދައުލަތުންވަނީ ކޮވިޑް-19 އާ ގުޅިގެން ވަޒީފާ ގެއްލި އާމްދަނީއަށް ބުރޫ އެރި ފަރާތްތަކަށް އިންކަމް ސަޕޯޓުގެ ގޮތުގައި ޖުމްލަ 143.8 މިލިއަން ރުފިޔާ ދޫކޮށްފައެވެ. އަދި ކޮވިޑް ރިކަވަރީ ލޯން ސްކީމުން 1.1 ބިލިއަން ރުފިޔާ ދޫކުރިއިރު، ކަރަންޓް ބިލަށް ސަބްސިޑީގެ ގޮތުގައި 62.8 މިލިއަން ރުފިޔާ ވެސް ދޫކޮށްފައިވެއެވެ.