ފްލައިޓްތައް ކެންސަލް ވުމުން ޖަރުމަނު މީހަކު ދިއްލީ އެއަރޕޯޓްގައި ދިރިއުޅޭތާ ދެމަސް
މާރޗް މަހުން ފެށިގެން އިންޑިއާގައި އުދުހުންތައް ހުއްޓާލުމާއި ގުޅިގެން އިންޑިޔާގެ އެކި ހިސާބުގައި ތާށިވެފައި ބައިވަރު މީހުން އެބަ ތިއްބެވެ. މިގޮތަށް ފްލައިޓް ކެންސަލްވި ޖަރުމަނުގެ މީހަކު އޭނާގެ ގައުމަށް ނުދެވި ދިއްލީގެ އިންދްރާ ގާންދީ އިންޓަރނޭޝަނަލް އެއަރޕޯޓްގައި ތާށިވެ، އެތަނުގައި ދިރިއުޅެމުން ގެންދާތާ ދެމަސް ވަނީއެވެ.
40 އަހަރުގެ އެދްގާޑް ޒީބާޓް އަކީ ހެނޯއީ އިން އިސްތަންބޫލަށް ދިޔުމަށްޓަކައި ދަތުރު ކުރި މީހެކެވެ. ފްލައިޓް ކެންސަލް ވުމުން އިންޑިޔާގައި މަޑުކުރަން ޖެހުނީއެވެ. ކުށުގެ ރެކޯޑް އޮތުމުގެ ސަބަބުން ޒީބާޓްއަށް އިންޑިޔާ ވިސާއެއް ނުދިނެވެ. އަދި ހަމަ މި ކަމުގެ ސަބަބުން ޖަރުމަނުން އޭނާ ގެންދާކަށް ބޭނުމެއް ނުވިއެވެ.
އެއަރޕޯޓްގެ އޮފިޝަލަކު ހާމަ ކުރި ގޮތުގައި، ޒީބާޓް އާއި އެކު އިތުރު ހަތަރު މީހަކު ހަފްތާއެއް ވަންދެން ޓަރމިނަލްގައި ތާށިވެފައި ތިއްބެވެ. އެއީ ސްރީލަންކާގެ ދެމީހަކާ، ދިވެހިރާއްޖެ މީހެއްގެ އިތުރުން ފިލިޕީންސް މީހެކެވެ. ނަމަވެސް އެމީހުންގެ ގައުމުތަކުގެ އެމްބަސީތަކާ ގުޅައިދިނުމުން އެ ގައުމުތަކުގެ އެމްބަސީއިންތަކުން ވަނީ އެމީހުން ގެންދިއުމުގެ އިންތިޒާމް ކޮށްފައެވެ. ނަމަވެސް ޒީބާޓް އަކީ ޖަރުމަނުގެ ފުލުހުން ހޯދަމުންދާ ކުށްވެރިއެއްކަމުން، އެހެން ގައުމެއްގައި ހުއްޓާ ގެންދަން ބޭނުން ނުވާކަމަށް ބުނެ ޖަރުމަނުން އޭނާ ނުގެންދިޔައީއެވެ.
އެހެންކަމުން އިންޑިޔާއަށް އެތެރެ ނުވެވި، ގައުމަށްވެސް ނުދެވި ޒީބާޓް ޓަރމިނަލް ގައި ދިރިއުޅެން މަޖުބޫރުވީއެވެ.
އެއަރޕޯޓް މުވައްޒަފުން މައުލޫމާތު ދޭ ގޮތުގައި، މަޖައްލާ އާ ނޫސް ކިޔަމުން، އެތަނުގެ މުވައްޒަފުންނާ ވާހަކަ ދައްކަމުން ޒީބާޓް ދުވަސް ތައް ހޭދަކުރަމުން ދެއެވެ. ނިދަނީ އެތަނުގެ ގޮނޑިތަކުގައި އާއި ތަޅުންގަނޑުގައެވެ. މުޅި އެއަރޕޯޓް ފަސިންޖަރުންނަށް ބަންދުކޮށްފައިވުމުން ޓަރމިނަލްގައި އުޅޭ ހަމަ އެކަނި މީހަކީ ޒީބާޓްއެވެ. ޓާރމިނަލްގެ ފަރާތުން ތަންކޮޅެއް އަރާމުގައި ފައިދަމާލައިން ނިދޭ ގޮތަށް ގޮނޑިއަކާ، މަދިރި ގެއާ ކާއެއްޗެހީގެ އިތުރުން ޒަރޫރީ ބައެއް ސާމާނު އޭނާއަށް ފޯރުކޮށްދިނެވެ.
އެއަރޕޯޓް ހުޅުވުނުހާ އަވަހަކަށް ފުރާނެކަމަށް ޒީބާޓް ބުނެއެވެ. ނަމަވެސް އެއަރޕޯޓް ހުޅުވެން އަދި ކިހާ ދުވަހެއް ނަގާނެކަމެއް ބުނަން އެކަކަށްވެސް ނޭނގެއެވެ.
