ހިއުމަން ޓްރެފިކިންގެ މާނަ ފުޅާކޮށް، އެކުށުން ހޯދާ ފައިސާ ދައުލަތަށް ނެގޭ ގޮތް ހަދަނީ
ރާއްޖޭގައި ހިއުމަން ޓްރެފިކިން މާނަ ކުރާ ގޮތް ފުޅާކޮށް، އެކުށްކުރާ މީހުން ހޯދާ ފައިސާ ދައުލަތަށް ނެގޭ ގޮތަށް ޤާނޫނު ބަދަލު ކުރުމަށް މިއަދު މަސައްކަތް ފަށައިފިއެވެ.
ރައްޔިތުންގެ މަޖިލީހަށް ސަރުކާރުގެ ފަރާތުން މިބިލު ހުށަހެޅުއްވީ ހިންނަވަރު ދާއިރާގެ މެންބަރު ޖީހާން މަޙްމޫދެވެ.
މިބިލުގެ އިބްތިދާއީ ބަހުސް މިއަދު ފަށާފައިވާއިރު އެ ބިލުގައި އެެންމެ ފާހަގަ ކޮށްލެވޭ ބަދަލަކީ ހިއުމަން ޓްރެެފިކިން މާނަކުރާ ގޮތަށް ގެންނަ ބަދަލެވެ.
މީގެކުރިން ރާއްޖޭގައި އެކުށް ރާއްޖޭގައި މާނަ ކޮށްފައި އޮންނަ ގޮތުން، ފައިސާ ނަގާފައި އޮޅުވާލައިގެން މީހުން ގެނެސް އެ މީހުންނަށް އުޖޫރަ ނުދީ މަސައްކަތް ކުރުވުން ފަދަ ކަންތައްތައް ކުރާ މީހުންނާ ދެކޮޅަށް ދައުވާ ކުރަން އުނދަގުލެވެ.
ނަމަވެސް މިހާރު ވަނީ ބިދޭސީ މަސައްކަތްތެރިން ގެނައުމުގައި އެ މީހުންނަށް އޮޅުވާލައި ނަހަމަ ފައިދާ ނެގުމަކީ ހިއުމަން ޓްރެފިކިންގެ ކުށުގެ އަމަލެއް ކަަމަށް ސާފުކޮށް ކަނޑައަޅައިފައެވެ.
ހިއުމަން ޓްރެފިކިން ކަމަށް ބަލަން ހުށަހެޅި ކަންކަން
- ބޭރުގައުމަކުން ރާއްޖެއަށް ގެނައުުން ނުވަތަ ބަދަލުކުރުން އަދި ރާއްްޖޭން އެހެން ގައުމަކަަށް ވެސް މީހަކު ގެންދިއުން ނުވަތަ ބަދަލުކުރުން.
- ރާއްޖޭގެ އެއްތަނުން އަނެއް ތަނަށް ގެންދިއުން ނުވަތަ ބަދަލުކުރުން.
- އެގޮތަށް ގެންނަ މީހަކާ ހަވާލުވުން ނުވަތަ ބެހެއްޓުން.
- ވަޒީފާއަށް ނުވަތަ މަސައްކަތަށް ރެކްރޫޓްކުރުން.
މީގެ އިތުރުން މިބިލުގައިވާ ގޮތުންނަމަ، މީހަކާ މެދު އެގޮތަށް އަމަލުކުރަނީ މީހާގެ ރުހުމާ އެކުގައި ކަމަށް ވިޔަސްް ރުހުން ހޯދީ ބާރުގެ ބޭނުން ކޮށްގެން ނުވަތަ އޮޅުވާލައިގެން ކަމަށް ވާނަމަ ޓްްރެފިކިންގެ ކުށުގެ އަމަލަކަށް އެކަން ވާގޮތަށް ބަދަލު ކުރަން ވެސް ބިލުގައި ހުށަހަޅާފައި ވެއެވެ.
