"އާމްދަނީގެ ގޮތުގައި މިހާތަނަށް 12.8 ބިލިއަން ރުފިޔާ ލިބިފައިވޭ"
މި ހިނގާ 2020 ވަނަ އަހަރުގެ މިހާތަނަށް ދައުލަތަށް އާމްދަނީގެ ގޮތުގައި 12.78 ބިލިއަން ރުފިޔާ ލިބިފައިވާ ކަމަށް ފިނޭންސް މިނިސްޓްރީން ބުނެފިއެވެ.
އެމިނިސްޓްރީން އާންމުކުރި ހަފްތާ މާލީ ރިޕޯޓުން ދައްކާ ގޮތުގައި ދައުލަތަށް އާމްދަނީގެ ގޮތުގައި 12.767 ބިލިއަން ރުފިޔާ ލިބިފައިވާއިރު، މިހާތަނަށް 24 ބިލިއަން ރުފިޔާ ހަރަދުކޮށްފައި ވެއެވެ.
އެއީ މިދިޔަ 2019 ވަނަ އަހަރު ދައުލަތުން އެ މުއްދަތުގައި ހަރަދުކޮށްފައިވާ މިންވަރާ އަޅާ ބަލާއިރު 673 މިލިއަން ރުފިޔާ ދަށް އަދަދެކެވެ.
އެގޮތުން މިރިޕޯޓުން ދައްކާ ގޮތުގައި ރިކަރަންޓް ހަރަދު 16.763 ބިލިއަން ރުފިޔާއަށް އަރާއިރު، އޭގެ ތެރެއިން ދައުލަތުގެ މުވައްޒަފުންނަށް މުސާރައިގެ ގޮތުގައި ދިނުމަށް މި އަހަރުގެ މިހާތަނަށް 8.928 ބިލިއަން ރުފިޔާ ހޭދަކޮށްފައިވެއެވެ. މިދިޔަ އަހަރުގެ އެ މުއްދަތުގައި 9.024 ބިލިއަން ރުފިޔާ ހޭދަކޮށްފައިވެ އެވެ. އަދި ދައުލަތް ހިންގުމަށް ކޮށްފައިވާ ހަރަދުގެ ތެރެއިން މި އަހަރުގެ މިހާތަނަށް 7.657 ބިލިއަން ރުފިޔާ ހޭދަކޮށްފައިވާ އިރު، މިދިޔަ އަހަރުގެ އެ މުއްދަތުގައި 8.349 ބިލިއަން ރުފިޔާ ހޭދަކޮށްފައިވާ ކަމަށް ވެސް ރިޕޯޓުން ދައްކާފައިވެއެވެ.
