ފުލުހުންގެ އާ ބިލަށް ސީޕީ ހަމީދު ތަޢުރީފު ކުރައްވައިފި
ފުލުހުންގެ ޚިދުމަތްތަކާ ބެހޭގޮތުން ރައްޔިތުންގެ މަޖިލީހުން ފާސް ކޮށްފައިވާ އާ ބިލަށް ކޮމިޝަނަރ އޮފް ޕޮލިސް މުޙައްމަދު ޙަމީދު ތަޢުރީފު ކުރައްވައިފިއެވެ.
ދިވެހި ފުލުހުންގެ ޚިދުމަތުގެ ބިލު މަޖިލިހަށް ހުށަހެޅުއްވީ ރައްޔިތުންގެ މަޖިލިހުގެ ހެންވޭރު ހުޅަނގު ދާއިރާގެ މެންބަރު އަދި އެމްޑީޕީ ގެ ޗެއާޕަރސަން ޙަސަން ލަތީފެވެ. މިބިލު ހުށަހެޅުމާއެކު އެތައް ބައެއްގެ ކަންބޮޑުވުންތައް ވަނީ ބިލާ ގުޅޭގޮތުން އަމާޒުވެފައެވެ.
ޙަސަން ލަތީފު ވިދާޅުވެފައި ވަނީ މިބިލަކީ ހަމަ ސީދާ އެމްޑީޕީގެ ވިސްނުމާ އެއްގޮތަށް ފާސް ކޮށްފައިވާ ބިލެއް ކަމުގައެވެ.
ފުލުހުންގެ ހިދުމަތުގެ މިބިލުގައި ޕޮލިސް ކޮމިޝަނަރާއި ފުލުހުންގެ އިސް މަގާމުތަކަށް ބޭފުޅުން އައްޔަން ކުރުމާއި، ހޯމް މިނިސްޓަރުގެ ދައުރާއި، މަސްއޫލިއްޔަތުތަކާއި، ޒިންމާތައްވެސް ބަޔާން ކޮށްފައިވެއެވެ. އަދި މި ބިލުގައި މައިގަނޑު ގޮތެއްގައި ވަނީ ފުލުހުންގެ ވަޒީފާއަށް އައްޔަން ކުރުމާއި، ލިބިދޭ އިނާޔަތްތަކާއި ހައްގުތަކާއި، ފިޔަވަޅު އެޅޭނެ ހާލަތްތަކާއި އަދަބުތައް ކަނޑައަޅައިފައެވެ.
މިބިލާއި ގުޅޭގޮތުން ސީޕީ ހަމީދު މިއަދު ކުރެއްވި ޓްވީޓެއްގައި ވިދާޅުވެފައި ވަނީ ޕޮލިސް ބޯޑު އުފެދިގެން ދިއުމަކީ ފުލުހުންގެ މުއައްސަސާ އިސްލާހުކުރުމަށް މިހާތަނަށް އެޅިގެންދާނެ އެންމެ ހަރުދަނާ ފިޔަވަޅު ކަމަށާއި ފުލުހުންގެ މުއައްސަސާ އިސްލާހުކުރަން ބޭނުންވާކަން ހާމަވަގެންދާ ޕޮލިސް ބޯޑު އުފެއްދުމުގެ ހިޔާލަކީ މިދިޔަ އަހަރުގެ މެދެއްހާ ހިސާބުން ފެށިގެން، ފުލުހުންގެ އެގްޒެކެޓިވް ލެވަލްގެ ބޭފުޅުން ބާރު އަޅުއްވަމުން ގެންދެވި ކަމެއް ކަމަށެވެ.
"މި އާ ބޯޑުގެ އެންމެ މުހިއްމުއެއް ބޭނުމަކީ، ފުލުހުން ޖަވާބުދާރީ ކުރުވައި، ރައްޔިތުންނަށް ދެވޭ ހިދުމަތުގެ ފެންވަރު ހިފެހެއްޓުން. އަދި ކަނޑައަޅާފައިވާ މަގުސަދުތަކާ އެއްގޮތަށް ފުލުހުން އަމަލު ކުރަމުން ދޭތޯ ވެސް ބެލޭނެ،" ސީޕީ ހަމީދު ވިދާޅުވިއެވެ.
