އޮކްސްފޯޑް ވެކްސިން 90 އިންސައްތަ ކާމިޔާބު
އޮކްސްފޯޑް ޔުނިވަރސިޓީއާއި އެސްޓްރަޒެނިކާ ގުޅިގެން އުފައްދާ ވެކްސިންގެ 90 އިންސައްތަ ކާމިޔާބުކަމަށް އެ ކުންފުނިން ހާމަކޮށްފިއެވެ.
ނޫސްވެރިންގެ ބައްދަލުވުމެއްގައި ވެކްސިންގެ ރައްކާތެރިކަމާ ގުޅޭގޮތުން ކުރެއްވި ސުވާލެއްގެ ޖަވާބުގައި ޗީފް މެޑިކަލް އެޑްވައިސަރ ކްރިސް ވިޓީ ވިދާޅުވީ، މިހާތަނަށް ބެލި ބެލުމުން ވެކްސިންގެ އެދެވޭ ނަތީޖާ ފެންނަކަން ފާހަގަވެފައިވާ ކަމަށެވެ.
މީޑިއާ ރިޕޯޓްތައް ބުނާ ގޮތުން، އިނގިރޭސިވިލާތުގައި އެންމެ ފުރަތަމަ ބޭނުން ކުރަން ފަށާނީ މި ވެކްސިން އެވެ. ވެކްސިނެއް ބޭނުން ކުރުމުގެ ހުއްދަ ދޭނީ އާންމުންނަށް ރައްކާތެރި މިންވަރު އެންމެ ބޮޑަށް ބެލުމަށް ފަހު ކަމަށް ވެސް ކްރިސް ވިޓީ ވިދާޅުވިއެވެ.
އަދި ބްރެޒިލް، އިންޑިއާ އަދި ތުރުކީ ފަދަ ގައުމުތަކަށް މި ވެކްސިންގެ ޝިޕްމަންޓްތަކެއް މިހާރު ވެސް ފޮނުވާފައިވާ ކަމަށް އެސްޓްރާޒެނެކާ އިން ވަނީ ބުނެފައެވެ. ރާއްޖެއިން ވެސް ދަނީ ކޯވިޑް-19 ގެ ވެކްސިން ހޯދުމަށް މަސައްކަތް ކުރަމުންނެވެ. އެގޮތުން ރައީސް ޞާލިޙް ވިދާޅުވެފައިވަނީ ރާއްޖޭގެ ހުރިހާ ރައްޔިތުންނަށް ހިލޭ ވެކްސިން ފޯރުކޮށްދޭނެ ކަމަށެވެ.
އަންނަ އަހަރުގެ ކުރީކޮޅު ރާއްޖެއަށް ކޮވިޑް-19 ވެކްސިންގެ ފުރަތަމަ ބެޗް ލިބޭނެކަމަށް ހެލްތު އިމަޖެންސީ އޮޕަރޭޝަން ސެންޓަރުގެ ތަރުޖަމާނު ޑރ. ނަޒްލާ ރަފީގް މީގެ ކުރިން ވަނީ ވިދާޅުވެފައެވެ. އަންނަ އަހަރު ކުރީކޮޅު ވެކްސިން ލިބުނު ނަމަވެސް، ވެކްސިން ލިބޭނީ އެކި ބެޗް ބެޗަށް އެކި މިންވަރަށް ކަމަށާއި ،ވެކްސިން ލިބެމުންދާ މިންވަރަކުން ވެކްސިން ޖަހާނެ ފަރާތްތައް ގިންތި ކުރުމުގެ މަސައްކަތް ހަލުވިކަމާއިއެކު ކުރަމުންދާ ކަމަށް ނަޒްލާ ވިދާޅުވިއެވެ. އަދި ވަކި ތަރުތީބަކުން އެ ވެކްސިން ޖެހުމުގެ މަސައްކަތް ކުރާނެކަމަށް ޑރ.ނަޒްލާ ފާހަގަ ކުރެއްވިއެވެ.
