މަސްވެރިކަމާއި ގުޅޭ މަޝްރޫޢުތަކަށް ފައިސާ ހުރީ ހަމަޖެހިފައި: މިނިސްޓަރު
މަސްވެރިކަމުގެ ސިނާއަތް ކުރިއެރުވުމަށްޓަކައި ކުރަން ޖެހޭ މަސައްކަތަށް ބޭނުންވާ ފައިސާ ހަމަޖެހިފައިވާ ކަމަށް ފިޝަރީޒް މިނިސްޓަރު ޒަހާ ވަހީދު ވިދާޅުވެއްޖެއެވެ.
ރާއްޖެ ޓީވީން ދެއްކި "ފަށާއިރު" ޕްރޮގްރާމުގައި ވާހަކަ ދައްކަވަމުން ފިޝަރީޒް މިނިސްޓަރު ވިދާޅުވީ މަސްވެރިކަމުގެ މަސައްކަތް ވަރަށް ބާރަށް ކުރިއަށްދާ ކަމަށެވެ. އަދި ކުރިއަށް އޮތް ދޮޅު އަހަރެއްހާ ދުވަހުގެ ތެރޭގައި މި ސިނާއަތުގެ މަސައްކަތްތައް ބާރު ދުވެލީގައި ކުރިއަރައިގެންދާނެ ކަމަށް ވެސް މިނިސްޓަރ ޒަހާ ވިދާޅުވިއެވެ.
"އަޅުގަނޑު ދަންނަވާނީ މިހާރު އަޅުގަނޑުމެން މިތިބީ އަޅުގަނޑުމެންގެ ޕްރޮޖެކްޓްތަކަށް ބޭނުންވާ ފައިސާ ސައުދީ ސަރުކާރުންނާއި އެގްޒިމް ބޭންކުން ހަމަޖެހިފައޭ. އެހެންވީމަ އަޅުގަނޑުމެންގެ މަސައްކަތް މިހާރު ވެސް އެބަ ކުރިއަށްދޭ. ކަރުދާހުގައި ކުރާ ހުރިހާ ކަންތައްތައް ނިމިފައި މިހުރީ ދެން އޮތީ އަމަލީ ގޮތުން ކުރަންޖެހޭ މަސައްކަތް" އެޕްރޮގްރާމުގައިި ވާހަކަ ދައްކަމުން މިނިސްޓަރު ޒަހާ ވިދާޅުވިއެވެ.
މަސްވެރިކަމުގެ ދާއިރާއަށް ދިމާވެފައިވާ ގޮންޖެހުންތަކަށް ވެސް އަލިއަޅުވާލައްވަމުން ފިޝަރީޒް މިނިސްޓަރު ވިދާޅުވީ ސަރުކާރުގެ ކުންފުނި މިފްކޯއިން ފެލިވަރުގައި ފިނިކުރި މަސް ބަންދުކުރާނެ ސްޓޯރޭޖް ނެތުމުން ދަތިވާ ކަމަށެވެ. މަސްވެރިން ބާނާ މަސް ރައްކާ ކުރުމަކީ އަގުބޮޑު މަސައްކަތެއްކަން ވެސް މިނިސްޓަރ ފާހަގަ ކުރެއްވިއެވެ.
