އިންޑިއާގެ ޔޫޕީއައި ޕޭމަންޓްގެ ހިދުމަތް ރާއްޖެއަށް ތައާރަފުކުރަނީ

އިންޑިއާގެ އިންސްޓެންޓް ޕޭމަންޓް ސިސްޓަމް، ޔުނިފައިޑް ޕޭމަންޓްސް އިންޓަފޭސް (ޔޫޕީއައި) ގެ ހިދުމަތް ރާއްޖޭގައި ފަށަން ނިންމާފައިވާ ކަަމަށް އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. ސުބްރަމާނިއަމް ޖަޔަޝަންކަރު އިއުލާނު ކުރައްވައިފި އެވެ. ފޮރިން މިނިސްޓަރު މޫސާ ޒަމީރުގެ ދައުވަތަކަށް ތިން ދުވަހަށް ކުރައްވާ ދަތުރެއްގައި ޖަޔަޝަންކަރު ރާއްޖެއަށް ވަޑައިގެންފައި ވަނީ މިއަދެވެ. ދަތުރުގެ ފެށުމެއްގެ ގޮތުން ފޮރިން މިނިސްޓްރީގައި މިރޭ ދެއްވި ޕްރެސް ސްޓޭޓްމަންޓެއްގައި އެކްސްޓާނަލް އެފެއާޒް މިނިސްޓަރު ވިދާޅުވީ ޔޫޕީއައިގެ ހިދުމަތް ރާއްޖެއަށް ތައާރަފުކުރުމުގެ ފުރަތަމަ ފިޔަވަޅެއްގެ ގޮތުން މިއަދު އެމްއޯޔޫއެއްގައި ސޮއިކޮށްފައިވާ ކަމަށެވެ.

"އުންމީދު ކުރަނީ ވަރަށް އަވަަހަށް ރާއްޖޭގައި ޔޫޕީއައިގެ ފުރަތަމަ ޓްރާންސެކްޝަން ހިނގާތަން ފެންނާނެ ކަމަށް،" ޖަޔަޝަންކަރު ވިދާޅުވި އެވެ.

މި ކަމުގެ ސަބަބުން ރާއްޖޭގެ ޓޫރިޒަމަށް ވަރަށް ބޮޑު ފައިދާއެއް ކުރާނެ ކަމަށް ބެލެވޭ ކަމަށް ވެސް ވިދާޅުވި އެވެ. ފޮރިން މިނިސްޓްރީގައި މިރޭ ބޭއްވި ރަސްމިއްޔާތުގައި ރާއްޖެއަށް ޔޫޕީއައި ގެނައުމުގެ އެމްއޯޔޫގައި އިކޮނޮމިކް މިނިސްޓްރީ އާއި ނެޝަނަލް ޕޭމަންޓްސް ކޯޕަރޭޝަން އޮފް އިންޑިއާ (އެންޕީސީއައި) އިން ވަނީ ސޮއިކޮށްފަ އެވެ. މިކަމާ ގުޅޭގޮތުން އިކޮނޮމިކް މިނިސްޓްރީން މިރޭ ނެރުނު ނޫސް ބަޔާނެއްގައި ބުނީ އެމްއޯޔޫގެ ދަށުން އުފެދިގެންދާ ގުޅުމުގެ މައިގަނޑު އަމާޒަކީ ރައީސް ޑރ. މުހައްމަދު މުއިއްޒުގެ މެނިފެސްޓޯގައި ތަސައްވުރު ކުރެވިފައިވާ، ކްރިއޭޓާ އިކޮނޮމީގެ ފުރުސަތު ދިވެހިންނަށް ހޯދައިދިނުން ކަމަށެވެ. އަދި އީކޮމާސްގެ ދާއިރާ ތަރައްގީ ކުރުމާއި މާލީ ބާޒާރުގައި ބައިވެރިވުމުގެ ފުރުސަތުތައް އިތުރުކޮށް، މާލީބާޒާރު އިތުރަށް ފުޅާކުރުން ކަމަށެވެ. އެމްއޯޔޫގެ މައިގަނޑު މަގުސަތުތަކުގެ ތެރޭގައި:

• ޑިޖިޓަލް ޕޭމަންޓްސް ސިސްޓަމް ތަރައްގީ ކުރުން
• މާލީ ބާޒާރުގައި ފަރުދުންގެ ބައިވެރިވުން އިތުުރުކުރުން
• އިންޓައޮޕެރަބެލިޓީ
• ހުނަރާއި ގާބިލުކަން އިތުރުކުރުން

އިކޮނޮމިކް މިނިސްޓްރީން އިތުރަށް ބުނި ގޮތުގައި މި ގުޅުމަކީ ޑިޖިޓަލް ޓެކްނޮލޮޖީ ބޭނުންކޮށްގެން އިގުތިސޯދުގެ ހަކަތަ އިތުރު ކުރުމަށް ކުރަމުންދާ މަސައްކަތުގައި އާދެވުނު ވަރަށް މުހިންމު މަންޒިލެއް ކަމުގަ އެވެ. ކުރިއަރާފައިވާ ޑިޖިޓަލް ޓެކްނޮލޮޖީގެ ބޭނުން ހިފުމުގެ މަގުސަދަކީ މިހާރަށް ވުރެ ބޮޑަށް ޝާމިލު، ކުރުންތެރި މާލީ ވެއްޓެއްގެ މަންފާ ދިވެހިންނަށް ލިބިގެން ދިއުން ކަމުގަ އެވެ.