ދިވެހި އުޚުތަކު އެހީތެރިވެދޭ ސީރިޔާ ކުއްޖެއްގެ ހިތުގެ އެދުން : "ކޮންމެވެސް ދުވަހަކުން ދައްތަ ދެކިލަން އުންމީދު ކުރަން"
އަހަރެމެން ކޮންމެ މީހެއްގެ ދިރިއުޅުމުގައި ވެސް އުންމީދުތަކެއް ވެއެވެ. ދުނިޔެމަތީގައި ހާސިލުކުރަން ބޭނުންވާ ކަންކަމާއި ބާއްޖަވެރި އުޚުރަވީ ހަޔާތެއް ހޯދުމުގެ އުންމީދުތަކެއް ވެސް ވެއެވެ. މިއަދު އަހަރެމެންގެ ދިވެހި މުޖުތަމަޢުއަށް ނަޒަރު ހިނގާލާއިރު، ދިވެހި ކޮންމެ އާއިލާއެއްގެ ވެސް އަޒުމަކީ އެ ބައެއްގެ ދަރިންނަށް ރަނގަޅު ތަޢުލީމެއް ހޯދައިދިނުމެވެ. އަދި އެ ތަޢުލީމުގެ ސަބަބުން އެ ކުދިންގެ ދެ ދުނިޔެ ބާއްޖަވެރި ކޮށްދިނުމުގެ އުއްމީދުގައެވެ.
ތުއްތު ޅަ ދަރިންނަށް ރަނގަޅު ތަޢުލީމެއް ލިބުމަކީ ކޮންމެ މައެއްގެ ބަފައެއްގެ ދުޢާއެވެ. މިއީ ނިކަމެތި ހާލުގައި ތިބި ސީރިޔާގެ މައިންބަފައިންގެ ވެސް ދުޢާއެވެ. ނަމަވެސް މިއަދު އެ ޤައުމުގައި އޮތް ދާޚިލީ ހަމަނުޖެހުމުގެ ސަބަބުން ތަޢުލީމުން މަހްރޫމް ވެފައިވާ އެތައް ކުދިންނެއް އެބަތިބިއެވެ. ހިތް ކަތިލާނެ ފަދަ ދަތި ހާލުގައި، ދެއިރު މުއްތި ކުރާނެ ކާ އެތިކޮޅެއް ނުލިބިފައި ތިބި ނަމަވެސް ސީރިއާގެ ލޯބިލޯބި ތުއްތު ކުދިންގެ ވެސް ހުވަފެންތަކެއްވެއެވެ. ޑޮކްޓަރަކަށް، ނަރުހަކަށް ، ޓީޗަރަކަށް ނޫނީ އިންޖީނިއަރަކަށް ވުމުގެ ހުވަފެންތަކެވެ. އެހެން ނަމަވެސް އެ ކުދިންގެ މައިންބަފައިންގެ މާލީ ހާލަތު ހުރިގޮތުން އެ ކުދިންނަށް ކިޔަވައިދިނުމުގެ ތަނަވަސް ކަމެއް މިއަދު ނެތެވެ. އެ ހުވަފެންތަކުގައި ކުލަ ޖެއްސޭނެ ގޮތެއް ނެތެވެ.
އިންޓަނޭޝަނަލް އެއިޑް ކެމްޕޭން (އައިއޭސީ) އިން 2019 ވަނަ އަހަރުގެ މާޗް މަހުގެ ތެރޭގައި ހުޅުވާ ކިޔަވައިދޭން ފެށި އަލޫކާ ސްކޫލަކީ ކިޔެވުމުން މަހްރޫމުވެފައި ތިބި އެތައް ސަތޭކަ ކުދިންނަކަށް އައު އުންމީދެއް ލިބިގެން ދިޔަ ސުކޫލެކެވެ. ސީރިއާގެ އިޑްލިބްގައި ހިންގާ އަލޫކާ ސްކޫލަކީ ދިވެހި ރައްޔިތުންގެ އެހީއާއެކީ ހިންގާ ސްކޫލެކެވެ. އަލޫކާ ސްކޫލް ހިންގުމުގެ މަސައްކަތަކީ އިންޓަނޭޝަނަލް އެއިޑް ކެމްޕޭން (އައިއޭސީ) އާއި އިންޓަނޭޝަނަލް ދެ ޕާޓްނަރުންކަމަށްވާ އައިއެޗްއެޗް އަދި އޮލިވް ގްރޯވްއާ ގުޅިގެން ކުރަމުންދާ މަސައްކަތެކެވެ. މީގެއިތުރުން އިދްލިބްގައި އަލޫކާ ސްކޫލުގެ އަމަލީ މަސައްކަތް ކުރަމުން ދަނީ އައިއެޗްއެޗްއެވެ.
ސަމާ މަދަރުސާގަ ކިޔަވަނީ
ސީރިއާގެ އަލޫކާ ސްކޫލުގައި ކިޔަވަމުންދާ ކުއްޖެއް ކަމަށްވާ ލޯބި ލޯބި ތުއްތު ސަމާއަށް، ރާއްޖޭގައި ސަމާއަށް އެހީވަމުންދާ ދިވެހި އުޚުތެއް ސިޓީއެއް ފޮނުވިއެވެ. އެ އުޚްތާ ފޮނުވި ސިޓީގެ އިބާރާތްތައް މި ބަޔާން ކޮށްލަނީއެވެ.
ދައްތަގެ ލޯބިވާ ސަމާއަށް،
ދައްތަގެ ފަރާތުން ސަލާމް މި ފޮނުވަނީ ނުހަނު އުފާވެރިކަމާ އެކުއެވެ.
ހާލު ކިހިނެއް؟ މަންމައާއި ބައްޕަގެ ހާލު ކިހިނެއް؟ އާއިލާގައި ކިތައް އެއްބަނޑުއެއްބަފާ ކުދިން ތިބޭ؟ ތިފަދަ ލޯބި ކުއްޖަކަށް އެހީވުމުގެ ފުރުސަތު ލިބުނީތީ ދައްތަ ވަރަށް އުފާވެއެވެ. އަދި ދައްތަ އެންމެ އުފާވާ އެއްކަމަކީ ދައްތަގެ ދަރިއެއް ނެތަސް، ﷲ ގެ ރަޙްމަތުން ތިފަދަ ރީތި އަންހެން ދަރިއަކަށް އެހީވެ ޚިދުމަތް ކޮށްދިނުމުގެ ފުރުސަތު ލިބުމެވެ.
ދައްތަގެ ފަރާތުން ބޭނުންވާ އެއްވެސް ކަމެއް އެބަހުރިތަ؟ އިންޝާ ﷲ އެކަން ކޮށްދެވޭތޯ މަސައްކަތް ކުރާނަމެވެ. ދައްތަގެ ދުޢާއަކީ ސަމާއާއި ސަމާގެ އާއިލާއަށް ހެޔޮ ރަޙްމަތް ލެއްވުމެވެ. އަދި ސީރިއާގެ ހުރިހާ ތުއްތު ކުދިންނާއި އާއިލާތަކަށް ހަމަޖެހުމާއި އުފާވެރިކަމާއި ދުޅަހެޔޮ ސިއްހަތެއް މެދުވެރި ކޮށްދެއްވުމެވެ.
ދައްތަގެ ސިޓީ ކުރުކޮށްލާނަމެވެ. ސަމާ ބޭނުންވާ ކަމެއް ހިމަނާލާފައި ސިޓީއެއް ފޮނުވައްޗެވެ.
ބަރާބަރަށް ނަމާދުކޮށް، ﷲ އަށް ދުޢާ ކުރައްޗެވެ. މި ސިޓީ ސަމާގެ މަންމައަށް ދައްކާލައްޗެވެ. ވީޑިއޯ ކޯލް މެދުވެރިކޮށް އަދިވެސް އެއްފަހަރު ބައްދަލުވާނެ ކަމަށް އުންމީދު ކުރަމެވެ.
ލޯބިވާ،
ދައްތަ
ދިވެހިރާއްޖެ
ސީރިއާގެ އަލޫކާ ސްކޫލުގައި ކިޔަވަމުންދާ ދަރިވަރު ސަމާއަށް ކިޔެވުމަށް އެހީވަމުންދާ ދިވެހިރާއްޖޭގެ ދައްތަ ފޮނުވި ސިޓީގެ ޖަވާބުގައި ސަމާ ސިޓީއެއް ފޮނުވިއެވެ.
އައްސަލާމްއަލައިކުމް
ދައްތަ އަށް،
އަހަރެމެން ދެމީހުންނަށް އެކަކު އަނެކަކު ނޭނގުނަސް ދައްތަ ދެކެ އަހަރެން ވަރަށް ލޯބިވެއެވެ. އަދި ދައްތަ ކޮށްދެއްވި އެކި މަސައްކަތާ ހެދި ލޯބިވަމެވެ އެކަމުގެ ސަބަބުން އަހަރެންގެ ހިތަށް އުފާވެރިކަން ލިބެއެވެ. އަހަރެން ﷲ ކިބައިން އެދެނީ ދައްތައަށް ހެޔޮ ސިއްހަތެއް ދެއްވުމެވެ. ﷲ ގެ ހެޔޮ ރަޙްމަތުން އަހަރެން ރަނގަޅެވެ. އަހަރެން ހަމައެކަނި އެދޭ ކަމަކީ އަމިއްލަ ޤައުމުގައި ރައްކާތެރިކަމެވެ. ހަމަނުޖެހުން ތަކުގެ ސަބަބުން ރައްކާތެރިކަން ހޯދުމަށް އެއްތަނުން އަނެއްތަނަށް ބަދަލު ބަދަލުވެ ބަދަލުވެ ވަރުބަލި ވެއްޖެއެވެ. އަހަރެން ދިރިއުޅެމުން ދަނީ މަންމައާއި ބައްޕައާއި ކުޑަ ފިރިހެން ކޮއްކޮއާއެކުއެވެ. އެއްޗެއް ދޭން ދައްތަ ބޭނުންނަމަ އަހަރެމެންނަށް ފިނިއިރު ލާ ހެދުން މިވަގުތު ވަރަށް ބޮޑަށް ބޭނުމެވެ. އެކަމަކު އެއީ ދައްތަ އެ ތަކެތި ގަތުމުގައި ޤާބިލްކަން ހުރިއްޔާއެވެ. ދައްތަ އަހަރެންނަށް ތި ދޭ އެހީތެރިކަމަކަށް ވަރަށް ބޮޑަށް ޝުކުރުވެރިވާ ވާހަކަ ބުނަން ބޭނުމެވެ. އަހަރެން މިހާރު މިދަނީ ޤުރުއާން ދަސްކުރަމުންނެވެ. އެގޮތުން ކުދި ކުދި އާޔަތްތައް ދަސްކުރަމެވެ. ކޮންމެވެސް ދުވަހަކުން ދައްތަ ދެކިލަން އުންމީދު ކުރަމެވެ. އަދި އެކަމަށް ބޭނުންވެގެން ވަމެވެ. އަހަރެން ދައްތައަށް ކުރެހުމެއް ހެދީމެވެ. ދައްތައަށް އެ ކަމުދާނެ ކަމަށް އުންމީދު ކުރަމެވެ.
ލޯބިވާ
ސަމާ
ސަމާ ދައްތައަށް ކުރަހާދިން ކުރެހުން
މިއީ ދިވެހިރާއްޖެއާއި އެތައް ހާސް މޭލު ދުރުން ސީރިއާއިން ފޮނުވި ސިޓީއެކެވެ. ސަމާ ފަދަ ސީރިއާގައި ދިރިއުޅޭ އެތައް ސަތޭކަ ކުދިންނެއް އެ ދިވެހި އަންހެން އުޚުތާ ފަދަ އިޙްސާންތެރިއެއްގެ އިންތިޒާރުގައިވެއެވެ. ދުރުގައި ތިއްބަސް މަންމައެއްގެ ކުލުނުގެ އިންތިޒާރުގައި ތިބި ޔަތީމު ކުދިން ވެސް ސީރިއާގައި މަދެއް ނޫނެވެ. އެ ދިވެހި އުޚުތާގެ ދަރިއެއް ނެތަސް މިއަދު އޭނާއަށް ތުއްތު މައުސޫމު ކުއްޖެއްގެ ހިތުގެ ފުން ލޯބި ލިބިފައިވެއެވެ. ދަރިއެއް މަންމައެއް ދެކެވާ ފަދަ ލޯބި ސަމާގެ ފަރާތުން މިއަދު އެ އުޚުތާއަށް ލިބިފައިވެއެވެ.
މިއަދު ދިވެހިންގެ ތެރެއިން ކޮންމެ ފަރާތަކަށް ވެސް އަލޫކާ ސްކޫލުގައި ކިޔަވަން ބޭނުންވެ އެކަން ނުކުރެވިފައި ހުރި ކުއްޖަކަށް އެހީވުމުގެ ފުރުސަތު އެބައޮތެވެ. މާލީ ގޮތުން އެހީވާނެ އޯގާތެރި ހިތެއް ބޭނުންވެފައިވާ ކުދިން އެބަތިބިއެވެ. އަދި ލޭ ގޮތުން ނޫނަސް މި ކުދިންނަކީ ތިބާގެ ދަރިންނެކޭ އެއްގޮތަށް އަޅާލުމުގެ ފުރުސަތު ކޮންމެ ދިވެހި ރައްޔިތަކަށް މިއަދު އިންޓިނަނޭޝަނަލް އެއިޑް ކެމްޕޭނުން ފޯރުކޮށްދެއެވެ.
އަ އަލޫކާ ސްކޫލާ ބެހޭ މަޢުލޫމާތު އައިއޭސީގެ ފޭސްބުކް ޕޭޖް https://web.facebook.com/IACMaldives/މެދުވެރިކޮށް ލިބިގެންދާނެއެވެ. މީގެއިތުރުން، އަލޫކާ ސްކޫލުގެ ޚާއްސަ ފޭސްބުކް ޕޭޖެއް ހަދާފައިވާއިރު، އެ ޕޭޖް މެދުވެރިކޮށް މިވަގުތު އެ ސްކޫލުގައި ތަޢުލީމް ހޯދަމުންދާ ދަރިވަރުންގެ އަޕްޑޭޓް ލިބިގެން ދާނެއެވެ. މީގެއިތުރުން، އަލޫކާ ސްކޫލްގެ ފޭސްބުކް ޕޭޖް ފޮލާރ ކުރެއްވުމުން މި ހުރިހާ މަޢުލޫމާތުތަކެއް ލިބިގެންދާނެއެވެ.
އައިއޭސީއިން ހުޅުވާލާ މި ފުރުސަތުގެ ދަށުން، ދިވެހި ކޮންމެ ރައްޔިތަކަށް ވެސް މި ސްކޫލުގެ ދަރިވަރެއް އަމިއްލަ ދަރިއަކަށް ހަރަދުކުރާ ފަދައިން މަހުން މަހަށް ސްކޫލް ފީ ދައްކައިދީ އެ ކުދިންގެ ކިޔެވުމުގެ ޚަރަދު ބެލެހެއްޓިދާނެއެވެ. އައިއޭސީއިން ހާމަކުރާ ގޮތުގައި، ކުރިޔަށް އޮތް ދުވަސްތަކުގެ ތެރޭގައި އަލޫކާ ސްކޫލްގެ ދަރިވަރުންނާއި ބެހޭ އިތުރު މަޢުލޫމާތާއި އެކުދިންނާއި ގުޅުން ބަދަހި ކުރުމުގެ ފުރުސަތު ސްޕޮންސަރ ކުރާ ފަރާތަކަށް ލިބިގެން ދާނެއެވެ. އެގޮތުން އެ ކުދިން ސްކޫލުގެ ޤުރުއާން މުބާރާތެއް ނުވަތަ ކޮންސަޓެއްގައި ބައިވެރިވެއްޖެ ނަމަ އެ ކަމުގެ ތަފްސީލާއި އަދި ޢީދު ފަދަ ދުވަސްތަކުގައި އެ ކުދިންނަށް ހަދިޔާ ދިނުމުގެ ފުރުސަތު ހުޅުވާލެވިގެން ދާނެއެވެ.
އައި އޭ ސީގެ
މަސައްކަތަށް
އައްސަރި
ބަހާ
ސާބަސް
ދެން
……..