ސަރުކާރުން ގަންނަ ވެކްސިންވެސް ރައްޔިތުންނަށް ހިލޭ
ރާއްޖެއިން ފައިސާ ދީގެން ގަންނަ ވެކްސިންތައް ވެސް ރައްޔިތުންނަށް ހިލޭ ފޯރުކޮށްދިނުމަށް ހަމަޖެހިފައިވާކަމަށް ޤައުމީ ވެކްސިން ޕްރޮގްރާމްގެ ހެޑް، ޑރ.ފާތިމަތު ނަޒްލާ ރަފީޤް ވިދާޅުވެއްޖެއެވެ.
ޑރ.ނަޒްލާ މިހެން ވިދާޅުވެފައި ވަނީ ޕީއެސްއެމް ނިއުސްގެ ރާއްޖެ މިއަދު ޕްރޮގްރާމްގައި ވާހަކަ ދައްކަވަމުންނެވެ. ނަޒްލާ ވިދާޅުވީ ކޯވިކްސް ފެސިލިޓީގެ ދަށުން މިވެކްސިން އާބާދީގެ 20 އިންސައްތައަށް ހިލޭ ލިބޭއިރު ރާއްޖެއިން ފައިސާ ދީގެން ގަންނަ ވެކްސިންތައް ވެސް ރައްޔިތުންނަށް ހިލޭ ފޯރުކޮށްދިނުމަށް ވަނީ ނިންމާފައެވެ.
މިހާރު މަސައްކަތް ކުރައްވަމުން ދަނީ ސަރުކާރުން ވެކްސިންތައް ގެނައުމަށްކަމަށް ނަޒްލާ ވިދާޅުވިއެވެ. އަދި ވެކްސިން އުފެއްދޭ މިންވަރު އިތުރުވުމުން އަމިއްލަ ފަރާތްތަކަށް ވެސް ވެކްސިން ގެނައުމުގެ ފުރުޞަތު ހުޅުވިގެންދާނެކަމަށް އުއްމީދު ކުރައްވާކަމަށް ޑރ.ނަޒްލާ ވިދާޅުވިއެވެ.
ކޯވިޑް-19އާ ދެކޮޅަށް އުފައްދާ ވެކްސިންތަކުގެ ތެރެއިން ޑަބްލިއުއެޗްއޯއިން ރައްކާތެރިކަން ކަށަވަރުކުރާ ވެކްސިން އަންނަ އަހަރު ކުރީ ކޮޅު ރާއްޖެއަށް ލިބޭނެ ކަމަށް ނަޒްލާ ވަނީ މީގެ ކުރިން ވިދާޅުވެފައެވެ. ޑރ. ނަޒްލާ ވަނީ ވެކްސިން ޖެހިކަމުގައި ވީ ނަމަވެސް ކޯވިޑް-19 އިން ރައްކާތެރިވުމުގެ ގޮތުން ފަރުދީ ގޮތުން ކުރަން ޖެހޭ ކަންކަން ކުރުމަށް ވެސް އިލްތިމާސް ކުރައްވާފައެވެ.
"ވެކްސިން ދެވޭނެ އެންމެންނަށް ވެސް ވެކްސިން ފޯރު ކޮށްދޭނެ. ވެކްސިން ރާއްޖެއަށް ގެންނަން ޖެހޭނީ ރަޖިސްޓަރ ކޮށްގެން. މިވަގުތު ވެކްސިން ހޯދުމަށް ދަތިވެގެން އުޅޭނީ. އާއްމު ފަރާތްތަކަށް އަދި އެހާ ފަސޭހައެއް ނުވާނެ ވެކްސިން ރާއްޖެއަށް ގެނައުމަށް. ފަހަރުގައި އަންނަ އަހަރު ނިމޭތާ އެ ފުރުޞަތު ހުޅުވިގެންދާނެ ކަމަށް އުއްމީދުކުރަން." ޑރ. ފާޠިމަތު ނަޒްލާ ރަފީޤް ވިދާޅުވިއެވެ.
ރާއްޖޭގައި ފުރަތަމަ ވެކްސިން ޖަހަން ފަށާއިރު އާބާދީގެ 3 އިންސައްތައަށް ވެކްސިން ޖެހުމަށް ވަނީ ނިންމާފައެވެ.
