ސްކީމް ފެއިލްވެ، ކޮވިޑަށް ވެކްސިން ނުލިބޭނޭ ބުނަން އަދި އަވަސް: ޑރ. ނަޒްލާ
ފަގީރު ގައުމުތަކަށް ކޮވިޑް-19 ވެކްސިން ފޯރު ކޮށްދިނުމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ) އިން ކުރިއަށް ގެންދާ ޕްރޮގްރާމް ފެއިލްވެ، މިބައްޔަށް ވެކްސިން ނުލިބޭނެ ކަމަށް ބުނަން އަދި މާއަވަސް ކަމަށް ހެލްތު އެމަޖެންސީ އޮޕަރޭޝަންސް ސެންޓަރ (އެޗްއީއޯސީ) ގެ ތަރުޖަމާނު ޑރ. ނަޒްލާ ރަފީޤް ވިދާޅުވެއްޖެއެވެ.
ޑަބްލިޔުއެޗްއޯއިން "ކޮވެކްސް"ގެ ދަށުން ވެކްސިންގެ 2 ބިލިއަން ޑޯޒު ފޯރު ކޮށްދިނުމަށް އަމާޒު ހިފައިފައިވާއިރު އަންނަ އަހަރު ނިމުމުގެ ކުރިން އެންމެ ވަލްނަރަބަލް އާބާދީގެ 20 ޕަސެންޓަށް ވެކްސިން ފޯރުކޮށްދެވޭނެ ކަމަށް އެ ޖަމިއްޔާއިން ވަނީ އަންދާޒާ ކޮށްފައެވެ. އޭގެ ތެރޭގައި ހިމެނެނީ ލެޓިން އެމެރިކާ، އޭޝިއާ އަދި އެފްރިކާގެ ފަގީރު އަދި މެދުފަންތީގެ އާބާދީގެ 91 ޤަައުމެކެވެ.
ރާއްޖެ ވެސް ބައިވެރިވާ މިސްކީމްގައި، ކޮވެކްސް ވެކްސިން ރާއްޖޭގެ އާބާދީގެ 20% އަށް ހިލޭ ލިބޭނެ ކަމަށް އެޗްއީއޯސީން ވަނީ ބުނެފައެވެ.
ނަމަވެސް ރޮއިޓާސް އިން ބުނެފައި ވަނީ އެޕްރޮގްރާމް ފެއިލްވެ، 2024 ވަނަ އަހަރާ ހަމައަށް ވެސް ފަގީރު ޤައުމުތަކުގައި އުޅޭ ބިލިއަނެއްހާ ބަޔަކަށް ވެކްސިން ނުލިބިދާނެކަމުގެ ބިރު އޮތް ކަމަށް އިންޓާނަލް ޑޮކިއުމެންޓްތަކުން ހާމަވެފައިވާ ކަމަށެވެ.
އެޗްއީއޯސީން މިރޭ ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ޑރ. ނަޒްލާ ވިދާޅުވީ އެ ޕްރޮގްރާމު މެދުވެރިކޮށް ފައިޒާ އަދި މޮޑާނާ ވެކްސިން ނުލިބުނު ނަމަވެސް، ކޮވެކްސް ފެސިލިޓީގައި ނުވަ ވެކްސިނެއް ހިމެނޭ ކަމަށެވެ.
އޭގެ ތެރެގައި، ދެން އެންމެ އަވަހަށް ހުއްދަ ލިބޭނެކަމަށް ފެންނަ އޮކްސްފޯޑް އެސްޓްރަޒެނެކާ ވެސް ހިމެނެއެވެ.
"އެހެންވީމަ ވެކްސިން އަދި ނުލިބޭނޭ، ނުވަތަ ފެއިލިއާއެއް ކަމަށް ނިންމަން އަދި ތަންކޮޅެއް އަވަސް" ޑރ. ނަޒްލާ ވިދާޅުވިއެވެ.
