ކޮވިޑް-19: ދަނބިދޫ އިން މީހަކު ފައްސި ވެއްޖެ
ލ. ދަނބިދޫ ގައި ހޯމް ކަރަންޓީނުގައި ހުރި މީހަކު ކޮވިޑް-19 އަށް ފައްސި ވެއްޖެއެވެ.
މިކަން އާއްމުކޮށް އިއުލާނު ކުރައްވަމުން ދަނބިދޫ ކައުންސިލުން ބުނީ، އެރަށުގައި ހޯމް ކަރަންޓީންގައި ހުރި މީހަކު ކޮވިޑް-19 އަށް ފައްސި ވެފައި ވާތީ، ރައްޔިތުންގެ ސަމާލުކަމަށްޓަކައި އެކަން ދަންނަވާ ކަމަށެވެ.
"އެޗްޕީއޭގެ އިރުޝާދުތަކާ އެއްގޮތަށް ރައްކާތެރިކަމުގެ ފިޔަވަަޅުތައް އެޅުއްވުމަށް ދަންނަވަން" އެރަށު ކައުންސިލުން ބުންޏެވެ.
އެނގިފައިވާ ދަނބިދޫ އިން ކޮވިޑް-19 އަށް ފައްސި ވެފައިވަނީ އުމުރުން 25 އަހަރުގެ އަންހެނެކެވެ.
ރާއްޖެއިން މިހާތަނަށް ކޮވިޑް-19 އަށް ފައްސިވި މީހުންގެ އަދަދު ވަނީ 13،444 އަށް އަރާފައިވާއިރު މީގެ ތެރެއިން މިހާރު ފަރުވާދެމުން ދަނީ 553 މީހަކަށެވެ. އޭގެ ތެރެއިން ހޮސްޕިޓަލުގައި ފަރުވާ ދެމުން އަންނަނީ 47 މީހަކަށެވެ.
ރާއްޖެއިން ކޮވިޑް-19 ބަލީގައި މަރުވި މީހުންގެ އަދަދު އުޅެނީ 48 ގައެވެ.
