އިމްރާނުގެ ފަރާތުން ޖިންސީ އަނިޔާ ލިބުނު އަންހެންމީހާ ފުލުހުންގެ ވަޒީފާއިން ވަކިކޮށްފި
ހޯމް މިނިސްޓަރު އިމްރާން އަބްދުﷲ ގެ ފަރާތުން ޖިންސީ ގޯނާ ލިބުނު ކަމަށް ބުނާ އަންހެން މީހާ ފުލުހުންގެ ވަޒީފާއިން ވަކިކޮށްފިއެވެ.
މި އަންހެންމީހާއަކީ ފުލުހުންގެ ސިވިލް ސާވިސް ބައިގައި މަސައްކަތް ކުރަމުން އަންނަތާ ވަރަށް ގިނަ އަހަރުތަކެއް ވެފައިވާ މީހެކެވެ.
އޮންލައިން ނޫހެއް ކަމަށްވާ “ވަގުތު” ގައި ރިޕޯޓުކޮށްފައިވާ ގޮތުގައި އަންހެން މީހާ ވަޒީފާއިން ވަކިކޮށްފައިވަނީ ވަޒީފާގެ ޤަވާޢިދުގެ 107 ވަނަ މާއްދާގެ (ހ)އާ ޚިލާފުވެފައިވާތީ ކަމަށް ބުނެއެވެ. އެ އަކުރުގެ 5 ވަނަ ނަންބަރުގައި މޯލްޑިވްސް ޕޮލިސް ސާވިސްއަށް ނުވަތަ ސަރުކާރަށް ހުތުރެއް ލިބޭ ފަދަ އަމަލެއް ކުރުމަކީ އެކަމާ ގުޅިގެން ޑިސިޕްލަނަރީ ފިޔަވަޅު އެޅިދާނެ ކަމެއް ކަމަށް ބުނެފައިވެއެވެ.
ޑިސިޕްލިނަރީ ބޯޑުން އޭނާ ވަޒީފާ އިން ވަކި ކުރުމަށް ނިންމާފައިވާއިރު، އިސްތިއުނާފުގެ މުއްދަތު ހަމަވަންދެން އޭނާ ހުރީ ސަސްޕެންޝަންގައެވެ.
އަންހެން މީހާ ވަޒީފާއިން ވަކި ކޮށްފައިވާއިރު، އޭނާ ވަނީ މިނިސްޓަރު އިމްރާނު އާ މަގުމަތިން ދިމާކޮށް މި މަހުގެ 6 ވަނަ ދުވަހު ވަނީ މަގުމަތީގައި އަޑުއުފުލާފައެވެ.
ރައީސް އޮފީސް ކައިރިން މިނިސްޓަރު ވަޑައިގަންނަވަނިކޮށް އަންހެން މީހާ ވަނީ މިނިސްޓަރާ އެއްވަރަށް ސައިކަލު ދުއްވަމުން އަޑު އުފުލާ ނުރުހުން ފާޅުކޮށްފައެވެ.
މިނިސްޓަރ އިމްރާންގެ ފަރާތުން ޖިންސީ ގޯނާ ލިބުނު މީހާ އެމައްސަލަ މީގެ ކުރިން ދެފަހަރެއްގެ މަތިން ޖެންޑާ މިނިސްޓްރީއަށް ހުށަހެޅުމުން ވެސް އެމައްސަލަ ބަލާފައެއް ނުވެއެވެ.
މިނިސްޓަރު އިމްރާން އަންހެނަކަށް ޖިންސީ ގޯނާ ކުރި ކަމަށް ބުނާ އަޑުއިވޭ އޯޑިއޯއެއް މީގެ ކުރިން މީސް މީޑިއާގައި ވަނީ ދައުރުވެފައެވެ.
އޯޑިއޯގައި އަންހެން މީހާ ވަނީ އަދާލަތު ޕާޓީގެ އޮފީހަށް ގެންގޮސް އޭނާގެ އުރަމަތީގައި ހިފި އަނިޔާކުރި ކުރި ވާހަކަތަކެއް ކިޔައިދީފައެވެ. އޭނާ ކިޔައިދީފައިވާ ގޮތުގައި މިނިސްޓަރުގެ ފަރާތުން ގިނަ އަންހެނުންތަކަށް ވަނީ ފުރައްސާރަ ކުރިމަތިވެފައެވެ.
އެ އޯޑިއޯގައި ވާހަކަދައްކާ މީހާ ކިޔަނީ "ޔުމްނާ"އެއްގެ ވާހަކައެވެ. ބެލެވޭ ގޮތުގައި އެއީ މިނިސްޓަރު އިމްރާންގެ މިހާރުގެ އަނބިކަނބަލުން ޖެންޑާ މިނިސްޓަރީގެ ޑެޕިއުޓީ މިނިސްޓަރު ފާތިމަތު ޔުމްނާއެވެ.
ޔުމްނާއާ އެ ވާހަކަތައް ކުރިން ވެސް ހިއްސާކޮށްފައިވާނެ ކަމާއި ނަމަވެސް އެކަމުގައި ހިމޭނުން ހުންނަކަން ދޭހަވާ ގޮތަކަށް އޯޑިއޯގައި އެ އަންހެން މީހާ ބުނެއެވެ.
