Sunday, 15 November 2026
Advertisement
HDC — Share-Below (leaderboard)
ރައްޔިތުންގެ މަޖިލިސް

ދީނީ ގޮތުން ތަފާތު ހިޔާލެއް ފާޅުކުރާ އިރަށް މީހާ ކާފަރުކުރުމަކީ އަޅުގަނޑުމެންގެ ސިޔާސަތެއް ނޫން: ޝަހީމް

ދީނީ ގޮތުން ތަފާތު ހިޔާލެއް ފާޅުކުރާ އިރަށް މީހާ ކާފަރުކުރުމަކީ އަޅުގަނޑުމެންގެ ސިޔާސަތެއް ނޫން: ޝަހީމް
އިސްލާމްދީނާ ގުޅޭ ގޮތުން ތަފާތު ހިޔާލެއް ފާޅުކުރާ ކޮންމެ މީހަކު ކާފަރުކުރުމަކީ މި ސަރުކާރުގެ ސިޔާސަތެއް ނޫން ކަމަށް އިސްލާމިކް މިނިސްޓަރު ޑރ ޝަހީމް އަލީ ސައީދު މިއަދު ވިދާޅުވެއްޖެ އެވެ. ޝަހީމް އެގޮތަށް ވިދާޅުވީ، ރައްޔިތުންގެ މަޖިލީހުގެ އިޖްތިމާއީ ކޮމިޓީގެ ބައްދަލުވުމަށް ހާޒިރުވެވަޑައިގެން ގަލޮޅު އުތުރު ދާއިރާގެ އެމްޑީޕީ މެމްބަރު މުހައްމަދު އިބްރާހިމް (ކުޑޫ) ކުރެއްވި ސުވާލަކަށް ޖަވާބު ދެއްވަމުންނެވެ. ދީނީ ގޮތުން ތަފާތު ހިޔާލުތައް ފާޅުކުރާ މީހުން ރިހެބިލިޓޭޓް ކުރެވޭނެ ނިޒާމެއް ގާއިމްކުރެވިފައި އޮތްތޯ މެމްބަރު އެއްސެވުމުން އެ ސުވާލަށް ޖަވާބު ދެއްވަމުން ޝަހީމް ވިދާޅުވީ، އެފަދަ މީހުންނާ ބައްދަލުކޮށް ވާހަކަ ދައްކާ ނަސޭހްތެރިވަމުންދާ ކަމަށެވެ. އަދި ދީނަށް ފުރުއްސާރަކުރާ މީހުންގެ އާއިލާތަކާ ވެސް މިނިސްޓްރީން ބައްދަލުކޮށް، ވާހަކަ ދައްކަމުންދާކަން ފާހަގަކުރެއްވި އެވެ. ދީނީ ހިޔާލު ތަފާތުވުމަކީ ހައްސާސް މައްސަލައެއްކަން ފާހަގަކުރައްވާ ޝަހީމް ވިދާޅުވީ، މިނިސްޓްރީން ބަލަނީ އެފަދަ ކަންކަމާއި އިހްސާންތެރި ކަމުގެ ނަޒަރަކުން ދެކި، ވާހަކަ ދެއްކުމަށް ކަމަށެވެ.
"އަޅުގަނޑުމެންގެ ސޮސައިޓީ އަދި މިހާރު ކަންތައްތައް ހުރި ގޮތުން މީހަކަށް އަދި ދީނީ ގޮތުން ތަފާތު ހިޔާލެއް ފާޅު ކުރެވޭއިރަށް އެމީހާ ކާފަރުކޮށް، އެމީހާ ލޭ ހުއްދަކޮށް، މުޖުތަމައުއިން ބާކީކޮށް، އެގޮތަށް ގެންދިއުމަކީ އަޅުގަނޑުމެންގެ ސިޔާސަތެއް ނުން،" ޝަހީމް ވިދާޅުވި އެވެ.
އެންމެންނަކީ ދީނީ އިލްމު އުނގެނިފައިވާ ބައެއް ނޫންކަން ޝަހީމް ފާހަގަކުރެއްވި އެވެ. އެހެންކަމުން، ދީނާ ހިލާފު ވާހަކަ ދައްކާ މީހުން އެ ވާހަކަ ދައްކަނީ އެމީހަކަށް ލިބިފައިހުރި އިލްމަކަށް ބިނާކޮށް ކަމަށް ވެސް ވެދާނެ ކަމަށް މިނިސްޓަރު ވިދާޅުވި އެވެ. މިނިސްޓަރު އެހެން ވިދާޅުވެފައިވާއިރު، ރާއްޖެއަކީ ސައްތައިން ސައްތަ މުސްލިމު ގައުމަކަށްވީ އިރު ދީނަށް ފުރައްސާރަކުރުމަކީ ގާނޫނީ ގޮތުން ކުށެކެވެ. މުވާސަލާތީ ވަސީލަތެއް ބޭނުންކޮށްގެން ނުވަތަ އާންމުންގެ ކުރިމަތީގައި އިސްލާމްދީނަށް ފުރައްސާރަކުރުމުގެ ނިޔަތުގައި އެއްވެސް އަމަލެއް ހިންގުމަކީ ވެސް ގާނޫނީ ގޮތުން ކުށެކެވެ. ފާޅުގައި ދީނަށް ފާޑުކިޔައި، ފުރައްސާރަކުރުމުގެ މައްސަލަތައް ދޭތެރެ ދޭތެރެއިން ފެންމަތިވެ އެވެ. މީގެ ކުރިން އެފަދަ މައްސަލަ ތަކުގައި މީހުން ހައްޔަރު ވެސް ކޮށްފައި އެބަ ހުއްޓެވެ. އެ ކޮމިޓީގައި ޝަހީމް ވިދާޅުވީ، ހަރުކަށި ފިކުރުގެ ވިސްނުން ހުންނަ މީހުން ހަންމަތަ ކުރުމުގެ މަސައްކަތް ވެސް މިނިސްޓްރީން ކޮށްފައިވާ ކަމަށެވެ. އެ މަސައްކަތުގެ ތެރެއިން ވަކިން ޖަމާއަތް ހަދައިގެން އުޅޭ އުޅުން ހުއްޓުވައި، އެ ފަރާތްތަކަށް ނަސޭހަތް ދީފައިވާ ކަމަށެވެ. އަދި މީގެ ކުރިން މާލޭގައި ވަކިން ޖަމާއަތް ހަދައިގެން ނަމާދުކުރާ މިސްކިތްތައް ހުރި ނަމަވެސް، މިހާރު ނުހުންނާނެކަން ފާހަގަ ކުރެއްވި އެވެ. ހަނގުރާމައިގެ މައިދާންތަކުން އަނބުރާ ރާއްޖެ ގެންނަ ދިވެހިން ރިހެބިލިޓޭޓް ކުރުމުގެ މަސައްކަތް ވެސް ހޯމް ލޭންޑް އެކްޑް ސެކިއުރިޓީ މިނިސްޓްރީއާއި ފުލުހުންނާއި ގުޅިގެން ކުރިއަށްދާ ކަމަށް ޝަހީމް ވިދާޅުވި އެވެ.

ރިއެކްޝަން

Advertisement
Ooredoo — Truecaller (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.