ޓެރަރިޒަމްގެ ތުހުމަތުކުރެވޭ އިންޑިއާ މީހަކު ހައްޔަރުކޮށް، ފަސް ދުވަހުގެ މުއްދަތެއް ޖަހައިފި
ޓެރަރިޒަމްގެ ތުހުމަތު ކުރެވޭ މީހަކު މިއަދު ހައްޔަރު ކޮށްފިއެވެ.
އެނގިފައިވާ ގޮތުގައި ފުލުހުން މިއަދު ހައްޔަރު ކޮށްފައި ވަނީ އުމުރުން 28 އަހަރުގެ އިންޑިއާ މީހެކެވެ.
މިކަމާމެދު ފުލުހުންގެ މީޑިއާ އޮފިޝަލަކު ވިދާޅުވެފައި ވަނީ 29 ޑިސެމްބަރ 2020 ވަނަ ދުވަހުގެ 13:30 ހާއިރު މާލެއިން ފުރަން ގޮސް އެއާޕޯޓުގައި ހުރި އުމުރުން 28 އަހަރުގެ އިންޑިއާ ފިރިހެނަކު "ބޮމެކޭ" ބުނެ ވާހަަކަ ދައްކާފައިވާ ކަމަށް ތުހުމަތު ކުރެވޭ މައްސަލައެއްގައި ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެެ.
މިމައްސަލައިގައި ފުލުހުންގެ ބެލުމުގެ ދަށަށް ގެންގޮސްފައިވާ މީހާގެ ބަންދާމެދު ގޮތެއް ނިންމުމަށް ކޯޓަށް ހާޒިރު ކުރުމުން މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބަހައްޓަައިގެން ތަހުގީގު ކުރިއަށް ގެންދިޔުމަށް ފަސް ދުވަހުގެ މުއްދަތެއް ދީފައިވާ ކަމަށް ވެސް ފުލުހުން ވިދާޅުވެފައިވެއެވެ.
މިމައްސަލަ ފުލުހުން ދަނީ އިތުރަށް ތަހުގީގު ކުރަމުންނެވެ.
