މިހާރު ތިއްބެވި ކައުންސިލަރުންނަކީ "މޮހޮނަށް އޮޑި" ދިން ގޮތަށް ތިބި ބައެއް : އާދަމް ޝަރީފު
މިހާރު ތިއްބެވި ކައުންސިލަރުންނަކީ ބާރުތައް ހަނިކުރެވިފައިވާ، ވަގުތީ ބައެއް ކަމަށާއި އެބޭފުންނަކީ ސަރުކާރުން ނުރުހިއްޖެނަމަ ވަކި ކުރެވޭ ގޮތަށް ތިބި ބައެއް ކަމަށް ކުރީގެ ޑިފެންސް މިނިސްޓަރ އަދި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރު އާދަމް ޝަރީފު އުމަރު ވިދާޅުވެއްޖެއެވެ.
ލޯކަލް ކައުންސިލް އިންތިހާބު ލަސްކުރަން ޖެހުމާ ގުޅިގެން، އެއިންތިހާބު އަވަސް ކުރަން ޖެހޭކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެފައިވާ ޚަބަރެއް މިއަދު ޓްވީޓު ކުރައްވަމުން އާދަމް ޝަރީފު ވިދާޅުވީ، މިހާރު ތިއްބެވި ކައުންސިލަރުންނަކީ "މޮހޮނަށް އޮޑި" ދިން ގޮތަށް ތިބި ބައެއް ކަމަށެވެ.
"ލާމަރުކަޒީ ނިޒާމު ތަންފީޒު ކުރައްވަން މިހާރު ތިއްބެވި ކައުންސިލަރުންނަކީ ބާރުތައް ހަނި ކުރެވިފައިވާ، ވަގުތީ ބައެއް. ސަރުކާރު ނުރުހިއްޖެނަމަ ވަކި ކުރެވޭ ގޮތަށް، 'މޮހޮނަށް އޮޑި' ދިންގޮތަށް ތިބި ބައެއް. ލޯކަލް ކައުންސިލު އިލެކްޝަން ލަސްކޮށްފައި މިހިންގަނީ ޚުދުމުޚުތާރު ވެރިކަމެއް" އާދަމް ޝަރީފު އުމަރު ވިދާޅުވެފައިވެއެވެ.
އާއްމު ސިއްޙަތުގެ ކުއްލި ނުރައްކަލުގެ ހާލަތުގެ މުއްދަތު އިތުރު ކުރުމާ ގުޅިގެން، މާރިޗު މަހުގެ 6 ގައި ކައުންސިލު އިންތިހާބު ނުބޭއްވޭނެ ކަމަށް އިލެކްޝަންސް ކޮމިޝަނުން ވަނީ އަންގާފައެވެ. އަދި އެކަމާމެދު ރައީސް ނަޝީދު ވެސް ވަނީ ކަންބޮޑުވުން ފާޅުކޮށްފައެވެ.
އެގޮތުން ރައީސް ނަޝީދު ވިދާޅުވީ ލޯކަލް ކައުންސިލު އިންތިހާބު ބޭއްވުމަށް ޤާނޫނަށް ބަދަލު ގެންނަން ޖެހޭނަމަ، އެކަންވެސް ކުރުން މުހިންމު ކަމަށެވެ.
